GUIꞌCHI BICAA SAN PABLU LU FILIMON
1
Naa nga Pablu.
Yeguayuaa purti cayune xhiiña Jesucristu.
Naa ne Timoteu cucáꞌ du guiꞌchi ri lú luꞌ,
Filimón,
hermanu ni nadxii du,
ni runi né laadu dxiiña tobi si,
2 ne lú irá ca xpinni Cristu ni rie cultu raliꞌdxuꞌ,
ne lú hermana Apia ne hermanu Arquipo ni runi né laanu xhiiña Dios.
3 Dios Bixhoze nu ne Señor Jesucristu cuꞌ ndaaya laatu ne quixhe dxí ladxidóꞌ to.
Pabiáꞌ nadxii Filimón Señor
4 Cada inié nia Dios ruzeete lii ne rudiee diuxquixe laa,
5 purti ma gunna pabiáꞌ runi cre lu Señor Jesús ne pabiáꞌ nadxii lu laa ne irá ca xpinni Dios.
6 Nuu tu bini cre ra biꞌya pabiáꞌ zinandu ni runi cre luꞌ.
Rinaba lu Dios acané laacabe guiene chaahui cabe pabiáꞌ sicarú irá ni rudii Cristu ca xpinni.
7 Nabé nayeche nuaaꞌ,
ne ma nuu gana ladxiduáꞌ pur modo huayanaxhii lu ca xpinni Dios,
purti huasieche lu ladxidóꞌ irá caꞌ.
Canaba Pablu Filimón uchagalú Onésimo
8 Yáquexa naca apóstol sti Cristu ñanda niguixhe xi ñuꞌnuꞌ,
9 peru jma racaladxe inaba ni lii purti nadxii saa nu.
Tobi la?
ma nagolaꞌ,
ne stobi,
yeguayuaa purti cayune xhiiña Cristu.
10 Rinaba lii pur Onésimo xiiñe neza Cristu.
Ndaani lidxi guiiba ri uca be xiiñe ra ucaniá laabe bini cre be.
11 Chiqué qué niquiiñe be de esclavu stiuꞌ,
peru yanna ma zaquiiñe be para lii ne para naa.
12 Cudxigueta laabe ra nuu luꞌ.
Bichagalú laabe casi nuchagalú lu naa.
13 Ñacaladxe ñaana nia laabe ra nuaa riꞌ,
ra yeguayuaa purti byue stiidxa Cristu,
para ñacané be naa casi ñacanéu naa pa ñuu lu raríꞌ.
14 Peru qué zune gasti sin ganna xi nouꞌ.
Qué racaladxe guꞌnu xiixa purti si cayabe ni lii,
sínuque purti guiale ni de ndaani ladxidóꞌ loꞌ.
15 Zándaca bixele be de lii xadxí huiini ti icoou piouꞌ laabe yanna.
16 Ma cadi casi esclavu si sínuque ma casi biꞌchi lu ni nadxii luꞌ.
Nadxiee laabe,
lii jma rusi naquiiñe ganaxhii lu laabe.
Gupa laabe casi xpinni lu ne casi biꞌchi lu neza Señor.
17 Yanna,
pa napu naa casi tobi ni runi neu dxiiña tobi si la?
bichagalú laabe casi nuchagalú lu naa.
18 Ne pa huayuni be lii xiixa o nuzaabi be lii la?
naa quixe ni.
19 Rarí naa piaꞌ cucaa ndiꞌ:
Naa quixe ni,
sin gabe lii laca nuzaabi lu naa xpida luꞌ.
20 Biꞌni ni canaba lii ri purti ma xpinni Señor lii.
Bisieche ladxiduáꞌ casi enda biꞌchi neza Cristu.
21 Cucaa ndi lú luꞌ,
ti rabe zuni lu ni canaba riꞌ,
ne nanna zuꞌnu jma que nga.
22 Laca rinaba lii guni chaahui lu ra guiaanaꞌ.
Purti nanna canaba tu lu Dios chaa ra nuu tu,
ne rabe zacabi be laatu.
Zuseenda be naa ra nuu tu.
Diuxi
23 Ucuaa stiuxi Epafras ni yeguayuaa nia purti cayuni xhiiña Cristu Jesús,
24 ne sti Marcu ne Aristarco ne Demas ne Lucas,
cani cayacané naa.
25 Jesucristu Señor stinu cuꞌ ndaaya laatu.
Amén.