3
Bisietenalaꞌdxi laacabe uzuuba cabe stiidxa presidente ne cani runi mandar ndaani xquidxi cabe sin ucaa lú cabe laacaꞌ,
ne chuꞌ cabe para guni cabe intiica ni jneza.
2 Cadi iníꞌ cabe binni,
ne cadi uyubi cabe diidxaꞌ,
sínuque gaca cabe nadóꞌ,
ne gaca cabe nachaꞌhui ne irá binni.
3 Purti laanu laca guca nu nahuati chiqué,
qué nuzuꞌba nu stiidxa Dios,
ne uzá renda nu,
ucuá nu yaga lu ná irá enda nadxaba biluiꞌlaꞌdxi nu guni nu.
Bibani nu para si guniná nu stobi ne tidi nu lú,
ne uca nanalaꞌdxi saa nu.
4 Peru bidxiña dxi biluíꞌ Dios pabiáꞌ nadxii laanu ra bilá laanu.
5 Bilá be laanu cadi purti bini nu xiixa enda nachaꞌhui,
sínuque purti biá be laanu.
Bisiá be ladxidóꞌ no,
bisaana be laanu casi nacubi ne bidii be Espíritu Santu laanu acané laanu ma cadi ibani nu casi bibani nu chiqué.
6 Bichá tipa be ladxidóꞌ no de Espíritu Santu pur ni biꞌni Jesucristu pur laanu.
7 Ne zacá bixá stonda nu pur enda nachaꞌhui stibe,
ne yanna ma cá lú nu udii be laanu enda nabani ni qué zaluxe.
8 Dxandí ni,
ne racaladxe guꞌya lu iziidi chaahui cabe ni,
ti ucaa ique irá ni ma runi cre Dios guni jneza.
Nga nga ni risaca ne ni riquiiñe para irá binni.
9 Peru cadi udiiu lugar icaa yu né cabe diidxa huati,
nin usirooba cabe historia sti ca bixhoze gola cabe nin tinde diidxa cabe pur ley sti Moisés,
purti enda huati si nga riuu né cabe ne gasti zabee ndu cabe ne laani.
10 Pa nuu tuuxa nisi rutinde ca hermanu la?
udinde né laa biaꞌ chupa tiru,
ne pa qué na ulabi lii la?
uladxi laa.
11 Ne biaꞌ ni biꞌni be ca,
nannu ma biree chu be,
ne laca laabe biyubi be quiba donda ique be.
12 Chi useenda Artemas o Tíquico ra nuu luꞌ.
Casi chindá cabe biꞌni pur chi guuyu naa Nicópolis,
purti raqué rabe utiide ca beeu nanda riꞌ.
13 Ucané Apolo ne abogadu Zenas biaꞌ ganda.
Bidii ni caquiiñe ca ti cadi guiaadxa gasti laaca neza che caꞌ.
14 Ne zacá zaziidi ca xpinni nu gaca nachaꞌhui ne acané cani caquiiñeꞌ,
ti iquiiñe xpida caꞌ.
Diuxi
15 Irá ni nuu né naa rarí cuseenda stiuxi luꞌ.
Bidii diuxi irá cani nadxii nu,
cani runi cre ni runi cre nu.
Dios cuꞌ ndaaya irá xixé tu.
Amén.