RAIROPA GUIꞌCHI BICAA SAN PABLU LU TIMOTEU
1
Naa nga Pablu.
Naca apóstol sti Jesucristu purti gudixhe Dios gaca ni.
Canayué nia binni stiidxa enda nabani ricaa nu ra riuꞌ né nu Cristu Jesús tobi si.
2 Cucaa guiꞌchi ri lú lu,
Timoteu,
xiiñe ni nadxieeꞌ.
Rinaba lu Dios Bixhoze nu ne Cristu Jesús Señor stinu guiá lii,
cuꞌ ndaaya lii,
ne quixhe dxí ladxidóꞌ loꞌ.
Usihuinni Timoteu xi runi cre
3 Zinanda Dios de idubi ladxiduáꞌ casi biꞌni ca bixhoze golaꞌ,
ne cada inié nia laabe ridxí ne huaxhinni rinaba laabe pur lii,
ne rudiee diuxquixe laabe.
4 Rietenaladxe pabiáꞌ biina lu dxi biree ra nuu luꞌ.
Yanna ñacaladxe ñuuya lii ti nidxá ladxiduáꞌ de enda nayecheꞌ.
5 Laca rietenaladxe pabiáꞌ runi cre lu Dios casi bini cre jñoou bida ne jñoouꞌ,
Na Loida ne Na Eunice.
Ne nanna zacaca runi cre lu de idubi ladxidóꞌ loꞌ.
6 Dxi gudixhe naya luguiá luꞌ,
bidii Dios gracia lii para guꞌnu xhiiñaꞌ.
Biquiiñe ni casi zeda yuꞌnuꞌ,
cadi gapu siouꞌ ni.
7 Purti bidii Dios laanu Espíritu stiꞌ,
cadi para guni laanu namuxeꞌ,
sínuque para udii stipa laanu udxíꞌ lú nu,
ne acané laanu ganaxhii nu binni,
ne cuꞌ xpiaani nu.
8 Nga runi cayabe lii güi lu stiidxa Señor sin idxiꞌbu ne cadi ituí lú lu tisi yeguayuaa pur laabe,
sínuque uyuu né laadu lu enda naná ni nexhe para cani güi stiidxa be,
biaꞌ stipa udii Dios lii.
9 Laa bilá laanu ne ulee chu laanu para laa,
cadi pur ni bini nu,
sínuque purti nga ucalaꞌdxi be.
Dede dxi caꞌru cha guidxilayú maca gudixhe be gaca be nachaꞌhui ne laanu ra chuꞌ né nu Cristu Jesús tobi si.
10 Yanna ma bihuinni ni ra beda ulá Jesucristu laanu lu ná enda guti,
ne beda udii enda nabani ni qué zaluxe cani guni cre stiidxaꞌ.
11 Gulí Dios naa güe stiidxaꞌ,
ne biseenda naa chi usiide ni cani cadi judíu.
12 Nga runi cayacanaꞌya yanna.
Peru cadi catuí luaꞌ,
purti ma nanna dxiꞌche tu rune cre,
ne nanna dxiꞌche zanda gapa be irá ni gudixhe lu ná be dede dxi gueeda be.
13 Yenanda ni bisiide lii purti nga nga ni dxandíꞌ.
Cadi ixele lu de ni runi cre nu,
nin usaanu de ganaxhii lu binni.
Zanda ganaxhii saa nu purti nuu né nu Cristu Jesús tobi si.
14 Napa nu Espíritu Santu ndaani ladxidóꞌ no,
ne laa zacané lii guꞌnu ni bisaana Dios ladxi nouꞌ.
15 Nannu xi biꞌni ca de Asia naa.
Bisaana ca naa stubeꞌ,
ra zeeda Figelo ne Hermógenes.
16 Peru rinaba lu Dios guiá hermanu Onesíforo ne binni lidxi purti stale tiru bisieche naa.
Neca yeguayuaa qué nituí lú be,
17 sínuque casi bedandá be Roma beda yubi be naa dede ra bidxela be naa.
18 Ne nannu pabiáꞌ ucané be laanu ndaani guidxi Efeso.
Rinaba lu Dios guiá laabe dxi cuidxi cuenta binni.