GUIꞌCHI BICAA SAN PABLU LU TITU
1
Naa nga Pablu ne naca apóstol sti Jesucristu para acaniá cani ma gulí Dios,
ti guni cre chaahui caꞌ,
ne usiide laaca ni dxandíꞌ,
ti ibani ca modo na be
2 ne icaa ca enda nabani ni qué zaluxe.
Qué rusiguii be,
ne dede dxi caꞌru cha guidxilayú uníꞌ be zacaa nu enda nabani ca.
3 Bidxiña dxi uluíꞌ be ni binni ne bisaana be ni ladxi naya güe ni.
Cayune ni purti laabe gudxi be naa gune ni.
Laabe bilá be laanu.
4 Cucaa guiꞌchi ri lú lu,
Titu,
xiiñe neza Jesucristu ni runi cre nu.
Rinaba lu Dios Bixhoze nu ne Señor Jesucristu,
ni bilá laanu,
cuꞌ ndaaya lii ne quixhe dxí ladxidóꞌ loꞌ.
Xi irá naquiiñe guni Titu Creta
5 Bisaana lii lu isla Creta para unduuxe lu dxiiña bizulú nu,
ne irá guidxi cui lu ti hermanu gola,
quixhe lu laa sa niru lú ca xpinni Cristu ni nuu ndaani guidxi que,
casi bisiide lii guꞌnu ni.
6 Naquiiñe cui lu tobi ni nabani jneza,
ni qué gapa chupa chonna gunaa sínuque xheela si.
Ne guꞌyu pa runi cre ca xiiñi be Cristu ne pa qué riníꞌ binni laaca purti rizá gueela ca ne qué ruzuuba ca diidxaꞌ.
7 Purti ora ma naca cabe xaíque la?
ma biaana xhiiña Dios lu ná cabe.
Nga runi naquiiñe gaca ni tobi ni nabani jneza,
ne cadi tobi ni ruyubi gaca ni na si,
nin ni nandáꞌ ique,
nin ni rixudxi,
nin ni ruyubi diidxaꞌ,
ne nin ni runi ni cadi jneza para si gapa bidxichi.
8 Sínuque gaca ni tobi ni nuu para uchagalú binni ora tiica gueda guiete ralidxi,
ni nachaꞌhuiꞌ,
ni nanna ucueeza laa,
ne ni runi jneza,
ni rucaalaꞌdxi guni ni na Dios,
ne qué runi ni na ique.
9 Gaca ni tobi ni runi cre stiidxa Cristu casi pe biziidi ni,
ti ganda acané xcaadxi ra usiidi ni,
ne laca para ganda useegu ruaa cani rucaa lú ni.
10 Purti cayasa stale cucaa lú ni yanna,
jma rusi lade ca judíu ni ma bini cre Cristu.
Riníꞌ ca ni zeeda si de xiga ique caꞌ,
ne riguite ca binni.
11 Ca nga nga naquiiñe guieegu ruaa,
purti canauchenda ca caadxi hermanu ne idubi familia stiꞌ.
Cusiidi cabe laaca ni cadi jneza,
ne cayuni cabe ni para si gapa cabe ni idxá cueꞌ cabe.
12 Laca tobi de laacabe,
ti hombre nuu xpiaani de Creta,
uníꞌ xi naca ca binni xquidxi ra na:
“Ca binni laadu nisi rusiguii caꞌ.
Zeda gaca ca casi biꞌcuꞌ,
nalá ca ne nachaaba caꞌ.”
13 Ne dxandí ni,
nga runi cayabe lii aca néu laacabe naduxhuꞌ,
ti iziidi cabe chi nanda cabe stiidxa Cristu jneza,
14 ne ma cadi ulabi cabe irá cuentu ribee ca judíu,
nin ni riguixhe binni ni qué riná icaa ni dxandíꞌ.
15 Para cani cá ique ni nachaꞌhui la?
irá ni nachaꞌhui para laacaꞌ.
Peru para cani qué runi cre,
cani cá ique ni nadxaba la?
gasti ni nachaꞌhui para laacaꞌ,
purti dede xquenda biaani ca ne ladxidóꞌ ca nayuudxuꞌ.
16 Na ca runi cre ca Dios,
peru pur ni runi ca rihuinni cadi dxandí ni.
Feu xpiaꞌ caꞌ,
ne qué runa caꞌ.
Qué zaquiiñe ca para ni nachaꞌhuiꞌ.