4
Zeeda Jesucristu casi rey para cuidxi cuenta irá binni.
Nezalú be ne nezalú Dios cayabe lii
2 güi lu stiidxa be.
Byuíꞌ ni ora tiisi,
pa ruluíꞌ zacaa cabe ni o neca ruluíꞌ qué zacaa cabe ni.
Bicuudxi laacabe,
biluíꞌ laacabe paraa cuchee cabe,
ne bilidxe laacabe.
Zacá bisiidi laacabe sin ixhacalaꞌdxuꞌ.
3 Purti zadxiña dxi ma qué zaná cabe ucaa diaga cabe cani rusiidi ni dxandíꞌ,
sínuque zuyubi cabe adxé adxé tu usiidi laacabe ni chuꞌlaꞌdxi cabe.
4 Zudxii deche cabe ni zeeda de Dios ne jma zacá ique cabe ni riguixhe binni.
5 Peru lii,
biiya qué chi utiixhi cabe iꞌcuꞌ,
ne cadi ixhacalaꞌdxi lu enda naná ni gueeda luguiá luꞌ.
Bicaa ique güi lu stiidxa Cristu ne biꞌni irá ni bisaana Dios ladxi nouꞌ.
6 Ma nanna mayaca guuti cabe naa.
Ma cadxiña xhioraꞌ.
7 Bine xhiiña Dios dede biaꞌ ra gunda tiꞌ,
qué nixele de ni rune cre.
Casi ñaca bixooñe ne irá stipa stinneꞌ,
ne yanna ma yendaya lu raya.
8 Cabeza ti premiu naa saca bine xhiiña jneza.
Zudii Señor ni naa dxi ganda dxi icaa ni.
Laa huaxa juez ni runi jneza.
Cadi para naa siaꞌ napa be,
sínuque ne para irá ni cá lú guiuba ganda dxi gueeda be purti nadxii laabe.
Ra canaba Pablu gueeda Timoteu
9 Biyubi gueda guuyu naa nagueenda.
10 Purti ma bisaana Demas naa.
Jma cá ique ni nuu ndaani guidxilayú riꞌ,
ne ma ze Tesalónica.
Crescente ze Galacia,
ne Titu ze Dalmacia.
11 Ma Lucas si nuu ne naa raríꞌ.
Biyubi Marcu guedanéu ora gueeduꞌ,
purti zanda acané naa lu xhiiña Dios.
12 Ma ze Tíquico Efeso.
Naa biseenda laa raqué.
13 Dané xhamarra ni bisaana Troas,
ralidxi Carpu,
ora gueeduꞌ,
ne ca libru stinneꞌ.
Ne qué chi usiaandu ca guiꞌchi stinneꞌ.
14 Nabé huayuniná Alejandru,
herrero que,
naa.
Zuquixe Señor irá ni laabe.
15 Biiya gá lii ne laabe,
purti nabé huacaa lú be ni rusiꞌdi nu.
16 Primé tiru bichiña cabe naa ra nuu justicia iruti qué ñacané naa.
Irá ca bisaana ca naa.
Rinaba lu Dios cadi uquixe ni laacabe.
17 Peru Señor huaxa qué nixele de naa ne ucané naa biree de raqué.
Casi ñaca bilá naa de ruaa lion,
ne zacá gunda yegüé stiidxa Cristu lade irá cani cadi judíu.
18 Ne nanna zulá Señor naa de irá ni nadxabaꞌ,
ne zapa chaahui naa dede idxiña dxi chiné naa ibáꞌ ra runi mandar.
Qué chuꞌ dxi guiaana dxí nu de usisaca nu laabe.
Amén.
Diuxi ne ndaayaꞌ
19 Bidii diuxi Prisca ne Aquila ne irá binni lidxi Onesíforo.
20 Biaana Erasto ndaani guidxi Corinto.
Ne Trófimo huará,
bisaana laa Mileto.
21 Biyubi gueedu ante ganda ca beeu nanda.
Ucuaa stiuxi Eubulo,
Pudente,
Linu,
Claudia,
ne ca xcaadxi hermanu.
22 Chuꞌ né Señor Jesucristu lii ne cuꞌ Dios ndaaya irá tu.
Amén.