Dxi gueeda Cristu
3
Laca naquiiñe gannu jma nagana zaca ni ora mayaca izaa xhi guidxilayú.
2 Purti zuyubi binni para laa si,
ne nisi bidxichi zacá ique caꞌ.
Zuni ca laaca nandxóꞌ ne zaca ca nayáꞌ,
ne zaguiñe yu ca stiidxa Dios.
Ma qué zuzuuba ca stiidxa jñaa ca ne bixhoze caꞌ ne qué zulabi ca laacabe.
Zabani ca modo na ique caꞌ ne nin zanna ca pa nuu Dios.
3 Qué zanaxhii ca binni ne qué ziá ca irutiꞌ,
ne nisi zazá ca zaníꞌ ca binni.
Qué zanda ucueeza ca laca laaca de guni ca ni na ique caꞌ.
Zuniná cabe binni ne zaca nanalaꞌdxi cabe irá ni jneza.
4 Zutoo cabe xhamigu cabe,
ne qué zuni lú cabe guni cabe intiisi,
ne zudxiiba cabe laca laacabe.
Zuyubi cabe ni chuꞌlaꞌdxi cabe lugar de nuyubi cabe Dios.
5 Zaná cabe runi cre cabe Dios,
peru qué zusihuinni cabe enda nandxóꞌ stiꞌ.
Qué chi idxaagu casi laacabe.
6 Lade cabe zeeda cani richuu ralidxi binni riguite ique ca gunaa nahuiini ique,
cani nanna nabé huachee,
cani rinanda irá ni ruluiꞌlaꞌdxiꞌ.
7 Ruyubi ca iziidi ca de iráꞌ,
peru qué zanda guiene ca ni dxandíꞌ.
8 Chiqué uyuu chupa bruju bicaa lú Moisés,
Janes ne Jambres.
Casi biꞌni cabe que,
zaqueca cayuni cani canaucaa lú ni dxandí yanna.
Ma bicahui xquenda biaani cabe ne ma qué zaquiiñe cabe para lade cani runi cre.
9 Peru qué zaguite cabe binni xadxí,
purti zuuya ca nahuati si cabe,
ne zeda iluxe cabe casi cani bicaa lú Moisés que.
Ni na Pablu guni Timoteu
10 Peru lii,
ma nanna chaahui lu ni bisiideꞌ ne modo bibaneꞌ,
xi cá ique guneꞌ,
ne xi rune cre.
Qué huaxhacaladxe irutiꞌ,
sínuque huayanaxhieeꞌ iráꞌ,
ne nannu irá ni udide
11 ra uzabi nanda cabe naa,
ne irá modo ucanaꞌyaꞌ.
Ne laca nannu xi bizaaca ndaani guidxi Antioquía,
Listra ne Iconio,
pabiáꞌ uzá nanda cabe naa,
peru bilá Señor naa de irá ni.
12 Zacaca zaca irá ni racalaꞌdxi sa modo na Cristu Jesús,
zazabi nanda cabe laacaꞌ.
13 Peru cani canauchee ne canausiguii la?
ze dxi jma rusi zinitilú caꞌ.
Caguite ca binni ne caguite binidxaba laacaꞌ.
14 Peru lii,
qué chi undaa lu ni ma biziidi luꞌ,
ni nanna dxichi lu dxandíꞌ.
Runibióuꞌ ni bisiidi ni lii,
15 purti dede dxi nahuiini lu biziidi lu ni cá lu Xquiꞌchi Dios ni zanda usiene lii ximodo ilá binni ra guni cre Cristu Jesús.
16 Irá Xquiꞌchi Dios,
Espíritu Santu uníꞌ xi icá,
ne nuu ni para usiidi ni laanu ne para ulidxe ni laanu ne para gabi ni laanu paraa cuchéꞌ nu ne para acané ni laanu ibani nu casi na Dios,
17 ti iziidi chaahui ca xpinni Dios para ganda guni irá ni riree ndu.