Casi ti soldadu sti Jesucristu
2
Ne lii la?
xiiñeꞌ,
ma nannu nuu Dios para acané cani nuu né Cristu Jesús tobi si.
Bidii lugar acané be lii.
2 Irá ni biꞌyu bisiide binni,
bisiidi ni cani nannu zanda usiidi ni stobi.
3 Guca soldadu chaꞌhui sti Jesucristu.
Cadi ixhacalaꞌdxu ora tidi lu ra nagana.
4 Qué zanda gaca tuuxa soldadu ne gapa sti dxiiña tobi si tiru,
purti naquiiñe guiaana be para guni be irá ni na xaíque stibe.
5 Zaqueca ni riguite juegu laca naquiiñe quite jneza,
pacaa qué zacaa premiu.
6 Ne ni guni dxiiña rañaa la?
nirudóꞌ laa icaa ni udii rañaa stiꞌ.
7 Biiya chaahui ni cayabe lii riꞌ,
ne zusiene Señor lii irá ni.
8 Bietenalaꞌdxi xi na stiidxa Cristu ni canayuéꞌ.
Za be de David ne bibani be de lade gueꞌtuꞌ.
9 Cayacanaꞌya ne yeguayuaa casi gubaana purti cayué stiidxa be que.
Naa yeguayuaa peru stiidxa be cadi yeguyoo.
10 Qué riguiche ruaa tide irá ni,
para gacaniá cani gulí Dios,
ti laca ganda ilá ca ra gacané ca Jesucristu tobi si,
ne gapa ca enda nayeche ni qué zaluxe.
11 Ndi nga laani:
Pa gati né nu laabe la?
laca zabani né nu laabe.
12 Ne pa gacaná nu pur laabe la?
laca zuni mandar né nu laabe.
Pa udxíꞌ deche nu laabe la?
laabe laca zudxii deche be laanu.
13 Peru neca uchéꞌ né nu laabe,
laabe qué zuchee né be laanu,
purti qué zuchee né Dios ni ma uníꞌ.
Guni Timoteu dxiiña casi riulaꞌdxi Dios
14 Bisietenalaꞌdxi ca hermanu irá nga,
ne gudxi laaca nezalú Señor cadi icaa yu ca xiixa diidxa huati si,
purti qué racané ni irutiꞌ,
sínuque ruchenda si ni cani guna diaga ni.
15 Bicaalaꞌdxi guꞌnu dxiiña modo chuꞌlaꞌdxi Dios ti qué gapu xi pur ituí lú lu nezalú.
Bisiidi stiidxa be jneza.
16 Cadi icaa yu lu diidxa ni cadi zeeda de Dios,
nin intiica diidxa ni qué racané irutiꞌ,
purti cani runi zacá la?
ze dxi jma rusi zixele ca de Dios.
17 Zeda gaca ni casi ti enda huará ni ruuti ne ricá.
Zareeche ni lade binni.
Zacá canausiidi Himeneu ne Fileto.
18 Ma qué runi cre ca ni dxandíꞌ,
ne na ca ma bisibani Dios ca gueꞌtuꞌ.
Zacá caguu cabe xizaa caadxi ni ma runi cre.
19 Peru cani ma xpinni Dios la?
qué zanda ibiꞌxhiꞌ,
purti ma stibe laacaꞌ,
casi cá lu guiꞌchiꞌ:
“Runibiáꞌ Señor uná nga ni dxandí xpinni.”
Ne laca cá:
“Ni dxandí xpinni Señor la?
naquiiñe ixele de irá ni cadi jneza.”
20 Ndaani ti yoo roꞌ nuu traste de oro ne de plata,
ne laca nuu de yaga ne de yu,
caadxi para ora aca xiixa risaca ne xcaadxi para irá dxi.
21 Para iquiꞌñe nu lu xiixa ni risaca ne guni nu xhiiña Señor la?
naquiiñe ixele nu de irá ni nadxabaꞌ,
ne óraque zaquiꞌñe nu para intiisi ni nachaꞌhuiꞌ.
22 Stale ni cadi jneza riguba yu cani nahuiini ruꞌ.
Bixele de laacani ne bidxii lú ibani lu jneza.
Bini cre Dios ne gunaxhii binni ne biyubi cadi tinde tu,
lii ne irá cani canaba lu Dios de idubi ladxidóꞌ para acané laacaꞌ.
23 Cadi ulabi lu diidxa huati si ni qué riníꞌ gastiꞌ,
purti ma nannu rutinde si ni binni.
24 Biꞌni casi naquiiñe guni cani cayuni xhiiña Señor:
cadi uyubu diidxaꞌ,
sínuque guca nachaꞌhui ne irá binni,
bisiidi laacabe jneza ne cadi iree lu gana.
25 Uníꞌ ne diidxa nadóꞌ ora culidxe lu cani qué na icaa stiidxa Dios.
Zanda ca ucuudxi be ladxidóꞌ caꞌ,
inaba ca perdón laabe,
ne ganna ca xii nga dxandíꞌ.
26 Ne zacá zaxele lú ca ne zaree ca lu ná binidxaba ra naaze laaca para uzuuba ca stiidxaꞌ.