Ni usiidi Titu ca hermanu
2
Peru lii bisiidi casi na stiidxa Cristu.
2 Bisiidi ca hermanu ni ma nagola sa ca jneza,
ucueeza ca laacaꞌ,
ne cuꞌ xpiaani caꞌ.
Cadi iree chu ca de ni runi cre caꞌ,
ne cadi guiaana dxí ca de ganaxhii saa caꞌ,
ne cadi iree ca gana.
3 Zaqueca bisiidi ca hermana ni ma nagola sa modo naquiiñe sa ca xpinni Dios.
Cadi iníꞌ cabe binni ne cadi xhudxi cabe,
sínuque usiidi ca ni jneza pur modo ibani caꞌ,
4 para guꞌya ca gunaa ni nahuiini ruꞌ,
ti ganaxhii ca xheela ca ne ca xiiñi caꞌ,
5 cuꞌ xpiaani caꞌ ne guiaana ca para si xheela caꞌ,
guni ca xhiiña ca jneza,
gaca ca nachaꞌhui ne binni,
ne uzuuba ca stiidxa xheela caꞌ,
ti qué gapa binni xi pur iníꞌ stiidxa Dios.
6 Laca bisiidi cani nahuiini ru cuꞌ xpiaaniꞌ.
7 Uzá jneza,
biluíꞌ laacabe modo ibani cabe.
Ne zaqueca ora usiidi lu laacabe,
bisiidi laacabe jneza ne cadi quite neu laacabe.
8 Biyubi modo iníꞌ lu ti qué gapa cabe xi pur iníꞌ cabe lii.
Zacá zatuí lú tutiica ucaa lú ni rusiidi luꞌ,
purti qué zadxela ximodo gaꞌni ná laanu.
9 Bilidxe cani runi xhiiña binni uzuuba ca stiidxa xpixuaana caꞌ,
ne guni ca ni usieche laacaꞌ.
Cadi icabi ruaa caꞌ,
10 nin cuana ca sti xpixuaana caꞌ,
sínuque guni ca xhiiña ca jneza,
ti zacá guꞌya irá binni pabiáꞌ sicarú stiidxa Dios ni bilá laanu.
11 Ma bihuinni pabiáꞌ nachaꞌhui Dios,
ne pur enda nachaꞌhui stibe ca zanda ilá irá binni.
12 Ne laca pur laani rusiidi be laanu usaana nu irá ni bini nu dxi caꞌru gunibiáꞌ nu laabe,
ne irá ni riulaꞌdxi binni guidxilayú guni,
ti ma cadi ibani nu ndaani guidxilayú ri modo na ique nu,
sínuque modo riulaꞌdxi be,
13 laga cabeza nu enda nayeche uníꞌ be udii be laanu,
o zanda gabi nu dxi iduꞌya nu enda nandxóꞌ guedané Jesucristu,
Dios stinu ni bilá laanu.
14 Laa bidii xpida pur laanu para bilá laanu de lu ná enda nadxabaꞌ,
ne bisiá laanu para gaca nu xpinni peꞌ ne icá ique nu guni nu ni jneza.
15 Bisiidi irá nga laacabe,
ucané laacabe cadi cui sa cabe atrá,
ne bilidxe laacabe,
qué chi dxiꞌbuꞌ.
Biiya gá qué uchee luꞌ,
ti qué gapa cabe xi pur ma qué ulabi cabe lii.