6
Hermanu ni cayuni xhiiña binni la?
naquiiñe uzuuba stiidxa xpixuaana ti qué chuꞌ tu iníꞌ Dios nin ni rusiꞌdi nu.
2 Ne pa laca hermanu xpixuaana be la?
cadi pur nga qué izaalaꞌdxi be guni be ni na,
sínuque jma rusi ucaa ique be guni be xhiiñaꞌ,
purti hermanu stibe ni nadxii be cayacané be.
Byuíꞌ ni ne bisiidi ni.
Enda ruyubi gapa bidxichi
3 Tutiica usiidi adxé para ni gudxe lii ca,
ne qué ricaa stiidxa Jesucristu Señor stinu nin ni runi cre nu la?
4 zeda gaca tobi ni rudxiiba laca laa ne qué ganna gastiꞌ.
Cadi nazaaca,
nisi cuyubi icaa yu né xiixa diidxaꞌ.
Racá nga ruzulú enda ruyubi tidi lú stobi,
enda ridinde,
enda runiná saa ne diidxaꞌ,
ne enda qué runi cre saa.
5 Qué riaana dxí cabe de tinde cabe,
purti ma bicahui xquenda biaani cabe,
ma qué ganna cabe xii nga dxandíꞌ.
Zácaxa cabe ti modo para gapa binni bidxichi nga chi nanda Cristu.
Bixele de laacabe.
6 Dxandí ricu ca xpinni Cristu,
pa guieche né ca biaꞌ napa si caꞌ.
7 Gasti qué ñedané nu ndaani guidxilayú ne gasti qué ziné nu ra chuu nu.
8 Nga runi,
zaa naca gapa nu bidxichi,
inque si napa nu ni idóꞌ no ne ni gacu nu,
nga si guieche né nu.
9 Cani ruyubi gapa bidxichi la?
riaba ndaani ná binidxabaꞌ,
ne rizabilaꞌdxi ni qué iquiiñeꞌ,
ni runiná si binni.
Rusiuꞌdxu ni xpida cabe ne runitilú ni laacabe.
10 Enda ranaxhii bidxichi nga xcu enda ruchee.
Nuu tu huaree chu de Dios pur laani ne nabé huayacaná.
Guni Timoteu irá ni biaana ladxi náꞌ sin idxibi
11 Peru lii,
yáquexa ma xpinni Dios lii,
bixele de irá nga.
Biꞌni pur ibani lu jneza ne pur sa lu gaxha de Dios.
Cadi usaanu de guni cre lu laa,
ne gunaxhii laa de idubi ladxidóꞌ loꞌ.
Cadi iree lu gana,
ne uca nadóꞌ.
12 Bidxii lú ni runi cre luꞌ.
Ma napu enda nabani ni qué zaluxe,
biiya gá qué chi undaa lu ni,
purti para nga uníꞌ né Dios lii,
ne uníꞌ lu nezalú stale binni ma runi cre lu Cristu.
13-14 Yanna,
ni chi tidxe lii rarí di la?
chi tidxe ni lii nezalú Dios ni rudii enda nabani irá xixé,
ne nezalú Jesucristu ni qué nidxibi niníꞌ ni dxandí dxi zuhuaa lú Poncio Pilatu.
Nezalú cabe cayabe lii guꞌnu irá ni biaana ladxi nouꞌ guꞌnuꞌ,
ne biꞌni ni jneza casi nexhe guꞌnu ni,
dede dxi gueeda Jesucristu Señor stinu.
15 Zuseenda Dios laabe dxi gudixhe gueeda be.
Laa nga tobi lucha Dios ni risaca ne ni nandxóꞌ,
xaíque sti irá rey ne irá xixé ni runi mandar.
16 Laa ti qué ziuu dxi gatiꞌ,
ne nabé nayaꞌni ra nuu dede iruti qué zanda idxiña.
Nin ti binni guidxilayú qué huayuuya laa ne qué zanda guꞌya laa.
Lausisaca laabe purti iruti ru nandxóꞌ casi laabe.
Amén.
17 Gudxi cani napa bidxichi cadi aca nayá né ca xpidxichi caꞌ,
ne cadi icá lú ca ni purti zanda guiaana ca sin gastiꞌ.
Sínuque icá lú ca Dios ni nabani purti laa rudii laanu irá ni usieche laanu.
18 Gudxi laacabe gaca cabe nachaꞌhuiꞌ,
gacané cabe binni de idubi ladxidóꞌ cabe,
ne cadi gaca cabe naguibiꞌ,
sínuque iquiiñe cabe xpidxichi cabe para acané cabe stobi.
19 Zacá zutopa lú cabe ni dxandí risaca ne ni iquiiñe laacabe stobi dxi,
ne ma qué zundaa cabe enda nabani ni qué zaluxe.
20 Timoteu,
gupa dxiichi dxiiña ni biaana neuꞌ.
Qué chi ucaa diaꞌgu ca diidxa ricaa yu né cabe ni cadi zeeda de Dios,
nin ni na cabe enda biaani peru cadi dxandíꞌ.
21 Nuu caadxi zinanda ni,
ne biree chu de ni runi cre.
Dios cuꞌ ndaaya lii.
Amén.