RAIROPA GUIꞌCHI BICAA SAN PABLU LU CA XPINNI CRISTU NI NUU TESALONICA
1
Naa nga Pablu.
Naa ne Silvanu ne Timoteu cucáꞌ du guiꞌchi ri lú tu,
hermanu caꞌ,
ca xpinni Cristu ni nuu ndaani guidxi Tesalónica,
cani ma nuu né Dios Bixhoze nu ne Señor Jesucristu tobi si.
2 Rinaba laacabe cuꞌ cabe ndaaya laatu ne quixhe dxí cabe ladxidóꞌ to.
Modo usaba ná Dios cani qué nulabi laa
3 Hermanu caꞌ,
naquiiñe cadi guiaana dxí du de udíꞌ du diuxquixe Dios pur laatu.
Jneza guni du ni purti caduꞌya du ze dxi jma rusi ziyuni cre tu,
ne jma rusi cayanaxhii saa tu,
de irá xixé tu.
4 Nga runi ratiica chuu du lade ca xpinni Dios ruluí du pabiáꞌ rieche né du laatu.
Rui né du laaca pabiáꞌ runi cre tu ne modo qué huaxhacalaꞌdxi tu neca cayaani ná cabe laatu ne cadiꞌdi tu ra nagana.
5 Zacá nga rihuinni jneza runi Dios.
Cayacaná tu yanna purti xpinni be laatu,
peru zacané ni para ihuinni ma nuu tu para chuꞌ tu ra runi mandar be.
6 Peru zuni Dios jneza.
Zusaba ná cani cayaani ná laatu ca.
7 Ne laca zudii iziilaꞌdxi cani cayacaná casi laanu.
Zuni be ni dxi guiete Señor Jesús de ibáꞌ ne ca ángel ni jma nandxóꞌ stiꞌ.
8 Purti ziete lade bele para usaba ná cani qué nicaa stiidxaꞌ,
ne qué ñunibiáꞌ Dios.
9 Zundaa be laaca ra qué ziuu dxi iree ca lu ná enda naná,
ne qué ziuu ca ra nuu be,
ne qué zuuya ca enda sicarú ne enda nandxóꞌ stibe,
10 dxi gueeda be para usisaca ca xpinni be laabe.
Irá ca zudxiiba ca laabe.
Ne laatu ziuu tu lade cabe purti bini cre tu stiidxa be ni byuí né du laatu.
11 Pur nga runi qué riaana dxí du de iní né du Dios pur laatu ti ganda usihuinni tu cadi pur gana si gulí be laatu.
Laca rinaba du laabe acané be laatu ne enda nandxóꞌ stibe,
ti gaca tu nachaꞌhui biaꞌ gudixhe be gaca tu,
ne acané be laatu lu dxiiña ni cayuni tu purti runi cre tu Cristu.
12 Zacá zusisaca tu Jesucristu Señor stinu pur modo nabani tu,
ne laa zusisaca laatu purti uca ca nachaꞌhui ne laatu,
laa ne Dios.