Zeeda ti hombre ne enda nandxóꞌ sti binidxabaꞌ
2
Hermanu caꞌ,
rarí ma chi uzeꞌte du dxi gueeda Señor Jesucristu,
dxi gueda caa laanu.
2 Rinaba du laatu cadi chuꞌ tuuxa utiixhi ique tu nin cuꞌ xizaa laatu,
gabi laatu ma beeda Señor.
Cadi guni cre tu laacabe neca na cabe Espíritu Santu biluíꞌ ni laacabe,
o nga uníꞌ cabe ra cultu,
nin pa guiete ni lu xiixa guiꞌchi useenda cabe lú tu na cabe laadu biseꞌnda du ni.
3 Nin de ti modo qué chi udii tu lugar usiguii cabe laatu.
Purti qué zadxiña dxi que,
dede qué gaca irá ni ma nexhe gacaꞌ.
Ziasa stale binni zucaa lú Dios,
ne laca zeeda ti hombre nuu né binidxabaꞌ,
ni ma nexhe initilú.
4 Zucaa lú be irá ni zeeda de Dios ne irá ni quixhe binni usisaca.
Dede zadxiña dxi cui be jlugar Dios ndaani yuꞌdu stiꞌ,
ma na be Dios laabe.
5 Qué rietenalaꞌdxi tu gudxe ni laatu dxi nuaa lade tu la?
6 Peru nuu ni cucueeza de gueeda be ante ganda xhi be,
ne laatu nanna tu tu laa.
7 Ma cayaca xhiiña be,
peru qué zeeda be dede qué ixele ni cucueeza laabe que.
8 Oraque zeeda be,
peru zadxiña dxi guuti Señor Jesús laabe ne bi iree ndaani ruaa.
Casi guꞌya be gueeda Jesús,
zunitilú enda nandxóꞌ sti laabe.
9 Zedané hombre que enda nandxóꞌ sti binidxabaꞌ.
Zuché be lú binni,
zácaxa ca cayuni be milagru ne stale enda ridxagayaa.
10 Zuni be irá ni ganda para quite be cani maca nexhe initilú,
cani qué niná nicaa ni dxandí para nilá.
11-12 Qué riná ca guni cre ca ni,
nga runi rudii Dios lugar irenda caꞌ ne guni cre ca ni cadi dxandíꞌ,
ti zacá guiaba ná ca purti jma uyuulaꞌdxi ca ni nadxabaꞌ.
Maca ulí Dios laatu
13 Nadxii Señor laatu,
hermanu caꞌ,
ne naquiiñe cadi guiaana dxí du de udíꞌ du diuxquixe Dios pur laatu,
purti maca gulí be laatu dede dxi bizulú guidxilayú,
para ilá tu ra usiá Espíritu Santu ladxidóꞌ to ne guni cre tu ni dxandíꞌ.
14 Para nga uníꞌ né be laatu ra byuí né du laatu stiidxa Jesucristu Señor stinu,
ti ganda isaca né tu laa.
15 Hermanu caꞌ lauzuhuaa chaahuiꞌ,
ne cadi usiaanda tu irá ni bisiꞌdi du laatu dxi nuu du lade tu,
nin ni huacáꞌ du lú tu.
16-17 Nabé nadxii Dios laanu ne uca nachaꞌhui ne laanu,
nga runi bidii laanu ti enda nayeche ni qué zaluxe,
ne gudixhe ni sicarú para laanu.
Yanna rinaba du laabe ne Jesucristu Señor stinu usieche cabe ladxidóꞌ to ne acané cabe laatu iníꞌ tu ne guni tu puru si ni nachꞌhuiꞌ.