PRIME GUIꞌCHI BICAA SAN PABLU LU CA XPINNI CRISTU NI NUU TESALONICA
1
Naa nga Pablu.
Naa ne Silvanu ne Timoteu cucáꞌ du guiꞌchi ri lú tu,
hermanu caꞌ,
ca xpinni Cristu ni nuu ndaani guidxi Tesalónica,
cani ma nuu né Dios Bixhoze nu ne Señor Jesucristu tobi si.
Rinaba laacabe cuꞌ cabe ndaaya laatu ne quixhe dxí cabe ladxidóꞌ to.
2 Qué riaana dxí du de udíꞌ du diuxquixe Dios pur irá tu,
ne cada iní né du laabe ruzeꞌte du laatu.
3 Runi tu xhiiña Dios purti runi cre tu laa ne nadxii tu laa,
ne qué huasaana tu de icá lú tu Jesucristu Señor stinu.
Ne irá nga ruzeꞌte du lu Dios ora riní né du laa.
4 Hermanu caꞌ,
nadxii Dios laatu,
ne nanna dxichi du gulí be laatu.
5 Purti dxi ucuaa tu stiidxa Cristu la?
qué nicaa tu ni pur modo byuí né du ni laatu,
sínuque purti biꞌni Espíritu Santu dxiiña luguiá tu.
Ne uní du de idubi ladxidóꞌ do purti nanna du dxandí ni cayuí du.
Laaca tu nanna tu ximodo uzá du lade tu para gunda ucané du laatu.
Rieche Pablu modo runi cre binni Tesalónica
6 Ne dxi ma ucuaa tu stiidxa Dios la?
bizulú tu bibani tu modo ca biꞌya tu uzá du lade tu,
modo biluíꞌ Señor laatu.
Ne bisieche Espíritu Santu laatu ra ucuaa tu ca diidxa que,
neca udiꞌdi tu ra nagana.
7 Zacá guca tu ti ejemplu para irá ca xpinni Cristu ni nuu Macedonia ne ni nuu Acaya,
8 purti laatu bicheeche tu stiidxa Señor irá ladu.
Ne cadi binni Macedonia ne Acaya si nanna pabiáꞌ runi cre tu Dios,
sínuque dede cani nuu zitu ma nanna ni.
Ne yanna ma cadi naquiiñe güi né du ni laacabe,
9 purti ma laape cabe cayuíꞌ cabe modo bichagalú tu laadu dxi uyuu du ra nuu tu,
ne modo bisaana tu ca bidóꞌ para cayuni tu ni na tobi lucha Dios ni nabani.
10 Laca cayuíꞌ cabe pabiáꞌ cá lú tu ibigueta Xiiñi Dios de ibáꞌ.
Cuzeete Jesús ni bisibani be de lade gueꞌtu que.
Laa zulá laanu dxi usaba ná be binni guidxilayú.