4
Laatu,
cani napa ni cayuni xhiiñaꞌ,
cadi quite si tu laacaꞌ,
sínuque laguni ni jneza para laacaꞌ.
Laguietenalaꞌdxi laca napa tu xpixuaana tu ibáꞌ.
Lainíꞌ né Dios
2 Cadi guiaana dxí tu de iníꞌ né tu Dios,
ne lagataná ora cayuni tu ni,
ne laudii diuxquixe laa.
3 Laca lainíꞌ né Dios uxhale ti neza para güi du stiidxa Cristu ni qué ñanna binni chiqué.
Purti pur laani yeguayuaa.
4 Ne lainaba ganda usiene chaahue ni binni casi nexhe gune ni.
5 Lasá jneza nezalú cani qué runi cre,
ti iree ndu ni guni tu lade caꞌ.
6 Lagüíꞌ diidxa jneza,
ni guiaba binni.
Lauyubi ganna tu modo icabi tu laacaꞌ.
Diuxi
7 Zabi hermanu Tíquico laatu ximodo nuaaꞌ.
Nadxii du laa ne qué huasaana de guni né laadu xhiiña Señor.
8 Para nga nga cuseenda laabe ra nuu tu,
para gabi be laatu ximodo nuu du,
ne para acané be laatu udxii lú tu.
9 Ziné hermanu Onésimo laabe,
binni xquidxi tu que.
Laca nadxii du laa,
ne qué riaana dxí de guni xhiiña Señor.
Iropa cabe zabi cabe laatu xi irá cayaca raríꞌ.
10 Laicaa stiuxi Aristarco ni yeguayuaa niaꞌ,
ne sti Marcu xprimu Bernabé.
Casi huayabe laatu,
pa che be ra nuu tu la?
lauchagalú laabe.
11 Ne laca laicaa stiuxi Jesús ni rabi cabe Justu que.
De lade ca hermanu judíu,
guionna si cabe huayacané cabe naa güe nia binni modo runi mandar Dios.
Ne nabé huasieche cabe naa.
12 Ne laicaa stiuxi Epafras,
binni xquidxi tu ni cayuni xhiiña Cristu.
Qué riaana dxí be de iníꞌ né be Dios pur laatu de idubi ladxidóꞌ be.
Rinaba be uzuhuaa chaahui tu,
ne ucaa ique tu guni tu irá ni na Dios.
13 Naa nanna pabiáꞌ riguu xa ique be laatu,
laatu ne cani nuu ndaani guidxi Laodicea ne Hierápolis.
14 Laicaa stiuxi Doctor Lucas,
hermanu ni nadxii nu,
ne sti Demas.
15 Laudii diuxi ca hermanu ni nuu ndaani guidxi Laodicea.
Laca laudii diuxi hermana Ninfas ne cani rie cultu ralidxi.
16 Ora ma biuunda guiꞌchi ri lade tu la?
lauseenda ni ra nuu ca hermanu ni nuu Laodicea.
Ne laaca useenda ca guiꞌchi ni bicaa lú ca guꞌnda tu.
17 Lagabi Arquipo guꞌya unduuxe chaahui dxiiña ni bisaana Señor ladxi náꞌ.
18 Rarí ma naa piaꞌ cucaa diuxi riꞌ.
Naa nga Pablu.
Laguietenalaꞌdxi yeguayuaa.
Dios cuꞌ ndaaya laatu.
Amén.