GUIꞌCHI BICAA SAN PABLU LU CA XPINNI CRISTU NI NUU FILIPOS
1
Naa nga Pablu.
Naa ne Timoteu runi du xhiiña Jesucristu,
ne cucáꞌ du guiꞌchi ri lú tu,
hermanu caꞌ,
ca xpinni Dios ni nuu ndaani guidxi Filipos,
laatu ne ca xaíque stitu ne ca diácono ni nuu lade tu.
2 Dios Bixhoze nu ne Señor Jesucristu cuꞌ ndaaya laatu ne quixhe dxí ladxidóꞌ to.
Caníꞌ né Pablu Dios pur cani ma bini cre
3 Cada guedasilú tu naa,
nabé rudiee diuxquixe Dios,
4 ne rieche ora inié nia laa pur laatu.
5 Purti dede dxi bizulú bini cre tu qué huayaana dxí tu de acané tu naa ra canayué stiidxa Cristu.
6 Dede chiqué bizulú Dios cayuni laatu nachaꞌhuiꞌ,
ne nanna qué zusaana ndahui be ni sínuque de ra iluxe ni dxi gueeda Jesucristu.
7 Cadi cosa de enda ridxagayaa nga isaca tu para naa biaꞌ cá,
purti didi laaga tu ndaani ladxiduáꞌ,
ne tobi si huayuni né tu naa dxiiña ni bidii Dios naa.
Qué huasiaanda tu naa ra yeguayuaa casi nuaa yanna riꞌ,
nin ra zuhuaa lu justicia para inié dxandí ni na stiidxa Cristu,
ne jneza chi nanda binni ni.
8 Dios nanna pabiáꞌ nadxiee irá tu,
casi nadxii Cristu laanu,
9 ne rinaba laabe acané be laatu jma rusi ganaxhii saa tu ne guiene chaahui tu xi racalaꞌdxi be,
10 ti ganna tu cui tu ni dxandí risaca.
Zacá zabani tu jneza,
ne qué zadxela donda luguiá tu dxi gueeda Cristu.
11 Ne zacané Jesucristu laatu ganda iquiiñe xpida tu para udxiiba cabe ne usisaca cabe Dios ra guꞌya cabe pabiáꞌ jneza nabani tu.
Para si Cristu nabaneꞌ
12 Hermanu caꞌ,
racaladxe ganna tu,
cadi cucueeza irá ni cazaaca ri de ireeche stiidxa Cristu,
sínuque laga cayacané ni para ireeche ni jma.
13 Purti ma nanna irá ca dxu ni rapa ralidxi rey yeguayuaa purti rune xhiiña Cristu.
14 Ne stale de ca hermanu ora biꞌya ca yeguayuaa la?
jma rusi bidxii lú ca güi ca stiidxa Cristu.
Ma qué rituí lú ca ne cayacané Señor laaca cadi idxibi caꞌ.
15 Huandí nuu caadxi canayuíꞌ stiidxa Cristu purti nanalaꞌdxi ca naa,
ne para uchiichi si ca naa,
peru laca nuu xcaadxi canayuíꞌ ni de idubi ladxidóꞌ.
16-17 Runi ca ni ti nadxii ca naa,
ne nanna ca nuaa rarí purti gulaꞌqui Dios naa güe stiidxa Cristu nezalú cani runi mandar.
Peru ca xcaadxi que la?
cayuni ni purti cuyubi si ca para laca laacaꞌ,
ne cadi dxandí xhiiña Cristu cayuni caꞌ.
Cuyubi si ca modo gaca ni jma nagana para naa ra yeguayuaa riꞌ.
18 Peru para naa la?
gasti naca ti cayuni cabe ni,
purti pa cayuni cabe ni de idubi ladxidóꞌ cabe o pa coꞌ,
peru stiidxa Cristu canayuíꞌ cabe,
ne nga nga ni rusieche naa.
Ne qué ziaana dxie de guiecheꞌ,
19 purti caníꞌ né tu Dios pur naa,
ne laca cayacané Espíritu sti Jesucristu naa,
ne nanna zacané irá nga para iree de ra nuaa riꞌ.
20 Peru ni jma cá iqueꞌ ne ni jma racaladxe nga cadi chuꞌ dxi ituí lua güe stiidxa Cristu,
sínuque inié sin idxibeꞌ,
casi bine chiqué,
ti usisaca Cristu pa ibane ruaꞌ o pa gateꞌ.
21 Purti para si Cristu nabaneꞌ,
ne gasti naca pa gateꞌ.
Jma rusi sicarú nga para naa.
22 Peru pa zanda ru gune xhiiña Señor laga nabane la?
qué ganna xi cueꞌ,
enda nabani la?
o enda guti.
23 Nuaa inchupa.
Qué idxela xi guneꞌ.
Ñacaladxe ñate para ñuaa ra nuu Cristu,
purti nga jma galán para naa.
24 Peru ruuya jma galán para laatu pa ibane ruaꞌ xcaadxi.
25 Ne nga runi nanna ziaana nia ruaꞌ laatu para acaniá laatu iniisi tu lu stiidxa Cristu,
ne jma rusi guieche né tu ni runi cre tu.
26 Ne ora ma nuaa lade tu sti tiru la?
jma rusi zieche né tu naa,
ne zusisaca tu Cristu pur modo ucané naa.
27 Xi si la?
lasá jneza casi na stiidxa Cristu,
ne zacá pa chaa ra nuu tu o pa nuaa sti ladu,
zanna nuu tu tobi si,
ne zuhuaa chaahui tu,
ne irá xixé tu naca tu tobi si,
cucaa lú tu para ireeche stiidxa Cristu ni ma bini cre tu.
28 Cadi idxibi tu cani rucaa lú laatu,
purti zacá zanna ca nexhe initilú caꞌ,
peru laatu ma bilá Dios laatu ne nuu né laatu.
29 Dichoso de laatu purti cadi cayuni cre si tu Cristu,
sínuque ne cayacaná tu pur laa.
30 Ma nuu né tu naa tobi si lu enda naná ni cadide riꞌ.
Ma biiya tu irá ni udide pur Cristu chiqué,
ne cadide ruaꞌ ni de yanna.