6
Baꞌdu caꞌ,
lauzuuba stiidxa bixhoze tu ne jñaa tu,
purti nga nga jneza guni ca xpinni Cristu.
2 Lade ca mandamientu zeeda tobi na:
“Bizuuba stiidxa bixhoꞌzo ne jñoouꞌ.”
Ne nga nga primé mandamientu ra riete xi icaa nu pa guni nu ni na ni.
3 Purti na ni pa guni nu zacá la?
zabani nu nayecheꞌ,
ne zabani nu xadxí ndaani guidxilayú riꞌ.
4 Hermanu caꞌ,
cadi guni tu xiixa para uchiichi si tu xiiñi tu,
sínuque lausiidi laacabe ne laulidxe laacabe.
Lausiniisi laacabe modo na Señor.
Modo guni xpinni Cristu xhiiña binni
5 Ne laatu,
cani cayuni xhiiña binni,
lauzuuba stiidxa xpixuaana tu.
Laidxibi laacaꞌ,
ne laguni dxiiña de idubi ladxidóꞌ to,
casi ñaca xhiiña Cristu cayuni tu.
6 Laguni dxiiña cadi ora si cayuuya cabe,
para guiaana tu bien ne laacabe,
sínuque laguni ni na Dios de idubi ladxidóꞌ to,
purti xhiiña Cristu cayuni tu.
7 Laguni xhiiña tu ne gana purti cadi xhiiña binni cayuni tu,
sínuque xhiiña Señor.
8 Purti ma nanna tu zaguixe Señor cada tobi biaꞌ ni jneza guni,
pa cayuni xhiiña binni o pa laca xhiiña cayuni.
9 Zacaca laatu,
hermanu caꞌ,
lagaca nachaꞌhui ne cani cayuni xhiiña tu sin uchibi tu laacaꞌ.
Laguietenalaꞌdxi tobi si xpixuaana né tu laacabe.
Ne laa nga Señor ni nuu ibáꞌ.
Ne biaꞌca risaca tobi risaca stobi nezalú be.
Lachuu listu casi soldadu
10 Yanna la?
hermanu caꞌ,
lachuu né Señor tobi si,
ti uzuhuaa chaahui tu,
purti nabé nandxóꞌ be ne zacané be laatu.
11 Casi nuu ni riquiiñe soldadu para cadi usaba enemigu sti laa la?
zacaca laiquiiñe irá ni ma bidii Dios laatu para cadi usaba binidxaba laatu ne enda nexhená stiꞌ.
12 Purti cadi binni guidxilayú cadinde né nu,
sínuque cadinde né nu ca xaíque sti ca binidxabaꞌ,
ca espíritu ni runi mandar ndaani guidxilayú cahui riꞌ,
ne irá ca espíritu malu ni nuu neza ibáꞌ.
13 Nga runi,
laiquiiñe irá ni ma bidii Dios laatu,
ti cadi cui sa tu atrá ora ucaa lú ni nadxaba laatu,
ne ti ganda uzuhuaa dxichi tu ora ma gudixhe dxí tu ni.
14 Casi cayabe laatu ca,
lachuu listu casi soldadu.
Ruxhii ca cinturón ndaani ca ti cadi uchiiña xhaba ca laacaꞌ.
Zacaca laatu lauzuhuaa chaahui lu ni dxandíꞌ,
ti cadi chuꞌ ni uchiiña laatu.
Laca rucaa cabe xiixa xpechu cabe para cadi tidi ni guniná laacabe.
Zacaca laguni ni jneza ti qué ganda cuꞌ xquichi binidxaba lade tu.
15 Ne casi rucaa ñee soldadu zapatu para sa né ora chi tinde la?
zacaca lachuu listu para güi tu stiidxa Cristu ni riguixhe dxí ladxidóꞌ binni.
16 Ne nuu ru ni riquiiñe cabe.
Rinaaze cabe escudu para qué cui flecha laacabe.
Zacaca lauzuhuaa dxiichi lu ni runi cre tu ti ganda usuíꞌ tu ca flecha ni cá gui ni undaa binidxaba laatu.
17 Ne laca riguu soldadu cascu ique ti ilá ique.
Zacaca laatu,
laguietenalaꞌdxi ma bilá tu,
ti cadi utiixhi binidxaba ique tu.
Ne rinaaze soldadu espada para ucaa lú né.
Laatu laaca,
laucaa lú ne espada ni rudii Espíritu Santu laatu,
ne nga nga stiidxa Dios.
18 Ne cadi guiaana dxí tu de iníꞌ né tu Dios.
Lainaba ni naquiiñe inaba tu,
ne laguni ni modo uluíꞌ Espíritu Santu laatu.
Lagataná cadi cui sa tu atrá,
ne lainaba pur irá ca xpinni Dios.
19 Laca lainaba lu Dios pur naa ti ganna xi gabe binni ora iniéꞌ,
ne ti cadi idxibe usiene tutiica de stiidxa Cristu ni iruti ñanna chiqué.
20 Neca caya cadena yanna,
peru biseenda be naa güe nia binni ca diidxa ri xcuenta be.
Lainaba laabe acané be naa güe nia ni binni casi racalaꞌdxi be guneꞌ.
Diuxi
21 Chi useenda hermanu Tíquico ni nadxiee ra nuu tu.
Qué rusaana ná be xhiiña Señor.
Ne laabe zabi be laatu ximodo nuaaꞌ,
ne xi cayuneꞌ.
22 Purti para nga cuseenda laabe,
para gabi be laatu ximodo nuu du,
ne para acané be indisa ique tu.