GUIꞌCHI BICAA SAN PABLU LU CA XPINNI CRISTU NI NUU GALACIA
1
Naa nga Pablu,
apóstol sti Jesucristu.
Cadi binni ulí naa ne cadi binni biseenda naa,
sínuque Jesucristu biseenda naa,
laa ne Bixhoze ni bisibani laa de lade gueꞌtuꞌ.
2 Naa ne ca hermanu ni nuu né naa rarí cucáꞌ du guiꞌchi ri lú tu,
xpinni Cristu caꞌ,
irá tu casi nuu tu Galacia.
3 Dios Bixhoze nu ne Jesucristu Señor stinu cuꞌ ndaaya laatu ne quixhe dxí ladxidóꞌ to.
4 Jesucristu bidii xpida para gudixe irá stonda nu ti ganda ilá nu de irá ni nadxaba ni nuu ndaani guidxilayú riꞌ,
casi na Dios Bixhoze nu guni be ni.
5 Qué chuꞌ dxi guiaana dxí de isaca be.
Amén.
Tobi si modo rilá binni
6 Nabé cadxagayaa pabiáꞌ nagueenda caxele tu de Dios.
Laa nda bichiña laatu ra nuu,
ra uca Cristu nachaꞌhui ne laanu.
Ne yanna ma adxé modo cayuni cre tu ilá tu.
7 Peru gasti ru modo ilá nu.
Caguite si cabe laatu nga,
ne racalaꞌdxi cabe utiixhi cabe stiidxa Cristu.
8 Tutiica güi né laatu sti modo ilá tu,
cadi casi ni ma byuí né du laatu ca la?
dí nuu,
tutiica naca,
neca pa naa piaꞌ o ti ángel ni guiete de ibáꞌ.
9 Maca gudxe ni laatu ti tiru,
ne yanna chi tidxe ni laatu sti tiru.
Pa chuꞌ tu güi né laatu sti modo ilá tu ne cadi casi ni ma biziidi tu ca la?
dí nuu ngue.
10 Xi na tu yanna.
Ñee cuyube guiaana bien ne binni la?
o cuyube guiaana bien ne Dios.
Ñee ruyube gune ni chuꞌlaꞌdxi binni la?
Pa ñaca nuyube ñune ni chuꞌlaꞌdxi binni la?
ma cadi xhiiña Cristu cayuneꞌ.
Modo bizulú byuíꞌ Pablu stiidxa Cristu
11 Peru racaladxe guiene tu,
hermanu caꞌ,
cadi de binni di zeeda evangeliu ni byue nia laatu ca.
12 Purti ninla qué nicaa ni de binni la?
ne ninla qué niziide ni de binni,
sínuque Jesucristu biluíꞌ ni naa.
13 Ma nanna tu modo uzaya dxi yenanda ni runi cre ca judíu.
Uzaya nanda ca xpinni Cristu,
cani ulí Dios.
Qué lica ñaꞌya laacaꞌ,
dede ucaladxe nuniteluáꞌ laacaꞌ.
14 Ne laca ma bina diaga tu pabiáꞌ udide lú stale binni xquidxe ni biaꞌca naa purti jma yenanda ni runi cre ca judíu ne jma ucuá ique gune irá ni biꞌni ca bixhoze gola du.
15 Dede dxi caꞌru gale maca ulí Dios naa ne ulee chu naa pur enda nachaꞌhui stiꞌ.
Ne dxi ma uyulaꞌdxi be gunebiaꞌya Xiiñi be la?
16 biluíꞌ be laa naa para chi güe stiidxa lade cani cadi judíu.
Peru qué nuyube nusiidi binni naa.
17 Qué ñaa ra nuu ca apóstol ni nuu ndaani guidxi Jerusalén,
cani maca naca apóstol chiqué,
sínuque uyaa Arabia.
De raqué bigueta Damasco sti tiru.
18 Bindaa chonna iza para uyaa Jerusalén.
Dxi que ru binebiaꞌya Pedru,
ne biaana nia laa quince dia.
19 Ne laca biiya Jacobo biꞌchi Señor.
Nin ru sti apóstol qué ñuuyaꞌ.
20 Cadi canié siaꞌ irá ni cucaa lú tu riꞌ,
sínuque nanna Dios dxandí ni.