RAIROPA GUIꞌCHI BICAA SAN PABLU LU CA XPINNI CRISTU NI NUU CORINTO
1
Naa nga Pablu.
Naca apóstol sti Jesucristu purti gudixhe Dios gaca ni.
Naa ne hermanu Timoteu cucáꞌ du guiꞌchi ri lú tu,
hermanu caꞌ,
irá tu casi nuu tu ndaani guidxi Corinto ne laca idubi naca Acaya.
2 Dios Bixhoze nu ne Señor Jesucristu cuꞌ ndaaya laatu ne quixhe dxí ladxidóꞌ to.
Irá nagana udiꞌdi Pablu
3 Udíꞌ nu diuxquixe Dios,
Bixhoze Jesucristu Señor stinu,
purti laca Bixhoze nu laa ne riá laanu.
Laabe nga Dios stinu ne riguixhe dxí be ladxidóꞌ no.
4 Rusieche be laanu ora tiica acaná ladxidóꞌ no,
ne zacá riziꞌdi nu usieche nu stobi ni cayacaná ladxidóꞌ,
cásica bisieche be laanu.
5 Cadidi du stale ra nagana casi udiꞌdi Cristu chiqué,
peru biaꞌca cadale enda naná ca la?
biaꞌ cá ca cusieche be laadu.
6 Ne pa cayacaná du la?
cayacaná du para acané du laatu guieche tu ne para ilá tu.
Purti zacané Dios laadu tidi du ni,
ne zusieche laadu.
Zacá laca zanda tidi tu ni naná casi cadidi du sin quiche ruaa tu,
purti nanna tu laca zusieche be laatu.
7 Ne cadi nuu du xizaa pur laatu purti nanna du cásica nuu né tu laadu tobi si lu enda naná,
zacaca zacaa né tu laadu enda nayeche ni rudii Dios.
8 Hermanu caꞌ,
racalaꞌdxi du ganna tu pabiáꞌ ucaná du dxi nuu du Asia.
De tantu naná ni beeda luguiá du raqué,
zácaxa du ma qué ñanda ñuni huantar ru du.
Rabi du raqué ñati du.
9 Para laadu ruluíꞌ ma nexhe gati du.
Peru guca ni zacá ti cadi icá lú du zanda ulá du laca laadu sínuque icá lú du Dios si zanda ulá laadu,
purti laa dede gueꞌtu rusibani.
10 Ne dxandí bilá be laadu de lu ná enda guti que,
ne nanna dxichi du zulá ru be laadu ora tiisi idxiña sti enda guti zacá laadu,
11 pa acané tu laadu,
iníꞌ né tu Dios pur laadu.
Purti pa stale binni canaba acané Dios laadu la?
laca stale binni zudii diuxquixe laa ora ma ucané laadu.
Xiñee qué ñe gá Pablu Corinto
12 Laadu nanna dxichi du huazá du jneza lade irá binni,
ne jma rusi lade tu.
De ndaani ladxidóꞌ do nanna du dxandí ni,
ne nga ni jma rusieche laadu.
Purti irá ni huayuni du,
huayuni du de idubi ladxidóꞌ do,
casi na Dios.
Cadi beeda ni de xquenda biaani du,
sínuque ucané Dios laadu pur enda nachaꞌhui stiꞌ para gunda bini du zacá.
13-14 Ne ora rucáꞌ du guiꞌchi lú tu la?
rucáꞌ du ni ganda guꞌnda tu ne ni ganda guiene tu.
Ma bizulú tu cayene tu zieche né tu laadu dxi gueeda Jesucristu,
Señor stinu,
cásica zieche né du laatu dxi que.
Yanna racaladxe guiene chaahui tu ni.
15-16 Nga runi gudixhe niganna laatu ora ziaa Macedonia ne laca ora nibiguetaꞌ,
para nusieche laatu chupa tiru.
Oraque ma ñacané tu naa para ñaa Judea.
17 Ñee na tu unié siaꞌ ni la?
Cadi zácaxa tu rune casi runi binni guidxilayú,
riníꞌ zie neca nanna qué zie.
18 Cásica qué rusiguii Dios la?
zacaca qué huayabi du laatu zuni du xiixa ni nanna du qué zuni du.
19 Naa ne Silvanu ne Timoteu byuí du stiidxa Cristu Jesús Xiiñi Dios lade tu.
Ximodo ñanda ñabi du laatu zuni du xiixa pa nanna du qué zuni du ni,
nanna nda du qué ñuu dxi ñuni Cristu zacá.
20 Sínuque laape be beda guni be irá ni ma bidii stiidxa Dios gacaꞌ.
Ngue runi ora riní né nu Dios riní nu “Amén” purti nanna nu zaca ni,
casi guca stiidxa Dios dxi beeda Cristu,
ne zacá rusisaca nu Dios.
21 Dios huayacané laanu uzuhuáꞌ chaahui nu lu neza sti Cristu,
ne laca laa ulee chu laanu para laa.
22 Ne uluu Espíritu Santu ndaani ladxidóꞌ no casi ti seña dxandí zudii laanu ni ma uníꞌ udii,
ne laca Espíritu que nga seña ma stibe laanu.
23 Nanna Dios xi pur qué huayaa ra nuu tu.
Caꞌru chaa purti qué racaladxe gune naꞌya laatu.
Gate pa cadi dxandí ni.
24 Cadi cuyubi du quixhe du xi guni cre tu,
purti ma zuhuaa chaahui tu lu ni runi cre tu.
Ni cuyubi du la?
nga acané du guieche tu.