2
Nga runi qué ninaꞌya nigune naꞌya laatu sti tiru.
2 Purti pa ñune naꞌya laatu la?
tu ru nusieche naa pa cadi cani bine naꞌya que.
3 Nga runi biseenda guiꞌchi que ra nuu tu,
ne bicaa irá ni bicaa que,
purti rabe lugar de nusieche tu naa laga ñuniná tu naa.
Nanna dxiꞌche pa guieche la?
laca zieche tu.
4 Nabé nagana uca ni para naa,
dede ucaná ladxiduáꞌ ne biete nisa lua ora cucaa guiꞌchi que lú tu,
peru bine ni,
cadi para gune naꞌya laatu,
sínuque para ganna tu pabiáꞌ nadxiee laatu.
5 Cadi naa siaꞌ ucanaꞌya ra bichee tobi de laatu,
sínuque de ti modo la?
irá tu ucaná tu.
Qué racaladxe gune ni jma naroꞌba,
nga runi unié “de ti modo”.
Guni perdonar cabe ni bichee lade cabe
6 Biaꞌ ma bisaba ná tu hermanu ni bichee que la?
biaꞌ cá si laguni.
7 Lausaana dxí nga yanna ne lauyubi usiaanda tu ni biꞌni be que,
ne lausieche laabe ti cadi acaná ladxidóꞌ be dede biaꞌ ra ma qué zanda.
8 Rinaba laatu uluíꞌ tu laabe dxandí nadxii tu laabe.
9 Bicaa guiꞌchi que lú tu,
para guuya pa zuzuuba tu stiidxa de irá ni gabe laatu.
10 Yanna,
tutiica guni perdonar tu la?
naa laca zune perdonar laa.
Ni huayune perdonar la?
huayune ni nezalú Cristu ne bine ni purti ma bini perdonar tu ni.
11 Guni nu zacá ti cadi quixhe dxí binidxaba laanu,
purti ma nanna nu ximodo runi be dxiiñaꞌ.
Ra nuu Pablu Troas
12 Dxi yendaya Troas zigüé stiidxa Cristu.
Ne neca bixhale Señor neza para gune dxiiña raqué,
13 peru qué ñanda ñuu dxí ladxiduáꞌ purti qué nidxela hermanu Titu,
ngue runi biree raqué,
uyaa Macedonia.
Racané Cristu laanu quixhe dxí nu iráꞌ
14 Peru diuxquixe Dios qué rudii lugar quixhe dxí xiixa laanu,
ne raca ni zacá purti nuu né nu Cristu Jesús tobi si.
Ne riquiiñe laanu para ireeche stiidxaꞌ,
casi riahui ti xhoꞌ naxhi.
15 Purti para Dios naca nu casi ti xhoꞌ naxhi ra cayuí nu stiidxa Cristu.
Careeche ni lade cani ilá,
ne zaqueca lade cani cananiti.
16 Para cani cananiti la?
naca nu casi ti xhoꞌ ni rusietenalaꞌdxi laaca de enda guti ni cabeza laacaꞌ.
Peru para cani ilá la?
naca nu casi ti xhoꞌ naxhi sti enda nabani ni udii Dios laacaꞌ.
Tuu ndi ñanda ñuni irá nga.
17 Cadi canayuí du stiidxa Dios para guni ganar du,
sínuque rui du ni de idubi ladxidóꞌ do casi nexhe guni ca xpinni Cristu,
purti ulí Dios laadu.
Ne laa nanna dxandí ni.