Ra guta sti modo ixá stonda binni
3
Ora riní du zacá,
ñee na tu ma chi ibigueta gabi du laatu tu naca du la?
Ñee naquiiñe chiné du guiꞌchi ra nuu tu para ganna tu tu naca du,
casi runi xcaadxi la?
o naquiiñe gabi du laatu ucaa tu tu naca du lu ti guiꞌchi sa né du la?
2 Cadi zacá di nga laani,
sínuque laatu zeda gaca tu casi ti carta ni cá ndaani ladxidóꞌ do,
ne irá binni ruuya ni ne ruunda ni.
3 Ne laca zeda gaca tu casi ti carta ni bicaa Cristu,
ne rizá né du ni.
Ne cadi ucuá né ni tinta sínuque ne Espíritu sti Dios ni nabani,
ne cadi cá ni lu guie sínuque ndaani ladxidóꞌ binni.
4 Riní du zacá purti racané Cristu laadu ganna dxichi du Dios biꞌni ni.
5 Nanna du gasti qué zanda guni du de laasi du,
sínuque irá ni reeda de Dios.
6 Laa bisiene laadu para ganda usiꞌdi du binni modo gudixhe chuꞌ né cabe laa tobi si,
ma cadi pur ley ni cá lu guiꞌchiꞌ,
sínuque pur Espíritu Santu.
Purti riguixhe ley gati binni,
peru Espíritu Santu rusibani.
7 Bihuinni enda nandxóꞌ sti Dios dxi ucuaa Moisés ley ni ucuá lu guie que,
ne bizaani lú dede qué ñanda ñuuya dxí ca binni Israel lú.
Peru chaahui gá binitilú biaani que.
Ne pa bihuinni enda nandxóꞌ sti Dios ra ucuá ley ni riguixhe gati binni la?
8 jma rusi zahuinni enda nandxóꞌ stibe ra icaa binni ni cudii Espíritu Santu.
9 Pa biaꞌ cá bisaca ley ni rudxiiba donda ique binni la?
jma rusi risaca stiidxa Cristu ni canayuí du,
purti pur laani ma zanda ixá stonda nu.
10 Nandxóꞌ ley chiqué,
peru yanna ma qué risaca ni,
purti ma beeda ni jma nandxóꞌ.
11 Pa bihuinni enda nandxóꞌ lu ni qué nindaa la?
jma rusi zahuinni enda nandxóꞌ lu ni qué ziuu dxi initilú.
12 Nga nga ni cá lú du,
ne nga runi riní du sin idxibi du.
13 Qué runi du casi biꞌni Moisés,
biseegu ti lari lú para qué ñuuya ca binni Israel ra binitilú biaani ni bizaani lú que.
14 Peru cadi lú si Moisés bieeguꞌ,
sínuque ne xquenda biaani ca binni que.
Ne dede yanna ruluíꞌ yeꞌgu ru lu xquenda biaani cabe,
purti qué riene cabe ora ruꞌnda cabe lu Xquiꞌchi Dios ni ucuá chiqué.
Qué huaxele xquenda biaani cabe,
purti Cristu si zanda uxhele ni.
15 Ne dxandí dede yanna ora guꞌnda cabe ni bicaa Moisés,
qué riene cabe ni.
16 Peru pa uyubi cabe Señor la?
zaxele xquenda biaani cabe.
17 Tobi si Señor ne Espíritu Santu.
Ne ra ma nuu Espíritu stibe la?
ma cadi cá cabe yaga lu ná ley.
18 Laanu ma cadi daꞌgu lari que lú nu,
sínuque ma naca nu casi ti espeju ra rihuinni enda nandxóꞌ sti Señor,
ne ze dxi zirooba enda nandxóꞌ stibe luguiá nu,
ziyaca nu casi laabe,
purti laabe cayuni be ni,
ne laabe nga Espíritu Santu.