PRIME GUIꞌCHI BICAA SAN PABLU LU CA XPINNI CRISTU NI NUU CORINTO
1
Naa nga Pablu ni ulí Dios ne uníꞌ né para gaca apóstol sti Jesucristu.
Naa ne hermanu Sóstenes
2 cucáꞌ du guiꞌchi ri lú tu,
hermanu caꞌ,
irá tu casi nuu tu ndaani guidxi Corinto ca.
Ma nayá ladxidóꞌ to nezalú Dios purti ma bini cre tu Cristu,
ne pur nga ca ma ulee chu Dios laatu para gaca tu xpinni,
laatu ne binni irá ladu ni runi cre Jesucristu,
Señor sti né nu laacaꞌ.
3 Dios Bixhoze nu ne Señor Jesucristu cuꞌ ndaaya laatu ne quixhe dxí ladxidóꞌ to.
Modo huaguu Dios ndaaya laanu
4 Qué riaana dxie de udiee diuxquixe Dios pur irá modo huaguu ndaaya laatu pur ni biꞌni Cristu Jesús.
5 Purti dede uyuu né tu Cristu tobi si,
ma dxiꞌba tu de irá modo.
Ma riene tu stale ne nanna tu ximodo güi tu de ni ma nanna tu ca.
6 Ne zacá ni purti de idubi ladxidóꞌ to ucuaa tu stiidxa Cristu ni bina diaga tu.
7 Nga runi cadi cayaadxa laatu gasti de ni naguixhe Dios udii irá xpinni laga cabeza tu dxi gueeda Jesucristu Señor stinu.
8 Laabe uzuhuaa chaahui be laatu dede dxi iluxe guidxilayú,
ti cadi chuꞌ tu udxiiba donda ique tu dxi gueeda Señor Jesucristu.
9 Nanna dxichi nu zuni be ni,
purti runi be ni iníꞌ be.
Ne laabe nga uníꞌ né be laatu para gaca né tu Jesucristu Xiiñi be tobi si.
Laa nga Señor stinu.
Cadi indaa saa ca xpinni Cristu
10 Hermanu caꞌ,
pur Jesucristu Señor stinu,
rinaba laatu chuꞌ tu tobi si ne cadi indaa saa tu,
sínuque lagaca tobi si de irá ni iníꞌ ique tu ne ni quixhe tu guni tu.
11 Purti ma gunna cadinde diidxa tu,
hermanu stinne caꞌ.
Gunna ni purti gudxi cani beeda de ralidxi Cloé ni naa.
12 Rabe cadinde diidxa tu purti nuu de laatu na:
“Naa xpinni Pablu naa.”
Ne nuu stobi na:
“Naa xpinni Apolo naa”;
o “Naa xpinni Pedru naa”;
o “Naa xpinni Cristu naa.”
13 Ra cayuni tu zacá la?
cayuni tu Cristu stale ndaa.
Lácaxa Pablu ucuá lu cruz pur laatu,
o lácaxa uyuu nisa tu para gaca tu xpinni Pablu.
14 Rudiee diuxquixe Dios nin tobi de laatu qué niguaa niꞌsaꞌ,
sínuque Crispo si,
ne Gayo,
15 ti qué chuꞌ tu iníꞌ uyuu nisa para gaca xpinneꞌ.
16 Laca uluaa niꞌsa xfamilia Estéfanas,
ne pa nuu ru ni uluaa niꞌsa la?
qué rietenaladxeꞌ.
17 Purti cadi biseenda Cristu naa gueda nduaa niꞌsaꞌ,
sínuque gueda güe nia binni ximodo ilá,
ne cadi uyube inié diidxa nagana ne sicarú para ucuudxe laacabe.
Purti zacá la?
zándaca cabeza ilá cabe pur stiidxaꞌ,
ne cadi purti guti Cristu lu cruz.
Enda nandxóꞌ sti Dios
18 Purti ora riete xi pur guti Cristu lu cruz la?
ruluíꞌ enda huati si ni para cani cananiti,
peru laanu nanna nu laani nga enda nandxóꞌ sti Dios purti pur laani ma bilá nu.
19 Casi cá lu Xquiꞌchi Dios:
Zuniteluáꞌ enda biaani sti cani nuu xpiaaniꞌ,
ne zucaa naya ni riguixhe ca hombre ni riene.
20 Paraa iquiiñe ni nuu xpiaani ne ca maistru de ley ne cani riulaꞌdxi icaa yu intiica uzeete binni de guidxilayú ri yaꞌ.
Ñee cadi ma bisihuinni Dios pabiáꞌ nahuati xpiaani binni guidxilayú la?
21 Purti nanna Dios xi runi,
nga runi qué niná ñunibiáꞌ cabe laa pur enda biaani stícabe.
Jma uyuulaꞌdxi be ulá be binni ra guni cre ni rabi cabe enda huati que ora chuꞌ tu güi né ni laacaꞌ.
22 Purti ca judíu rinaba ca guꞌya ca milagru,
ne ca griegu nisi rucaa ique ca ganna ca stale ni nagana.
23 Peru laadu la?
rui né du binni guti Cristu lu cruz para ilá nu.
Dxandí ruchenda ni ca judíu,
ne napa cani cadi judíu ni de enda huati.
24 Peru para cani ma bichiña Dios ra nuu la?
casi ca judíu zaqueca cani cadi Judiu,
Cristu nga enda nandxóꞌ ne enda biaani sti Dios.
Rihuinni ni purti gudixhe Dios ilá binni ra guti be lu cruz.
25 Ricaa binni ni gudixhe Dios que casi enda huati,
peru jma peca nuu xpiaani ni que enda biaani stícabe,
ne neca para laacabe ruluíꞌ cadi nandxóꞌ Dios,
peru iruti binni guidxilayú nandxóꞌ biaꞌ laabe.
26 Laguuya si laatu,
hermanu caꞌ,
bichiña be laatu neca cadi stale de laatu nuu xpiaani para binni guidxilayú,
ne laca huaxiéꞌ de laatu ni naca tuuxa,
ne huaxiéꞌ de laatu ni risaca para laacabe.
27 Peru ulí Dios cani huaxiéꞌ nuu xpiaani para binni guidxilayú,
ti usituí lú cani nuu xpiaaniꞌ,
ne ulí be cani iruti naca,
para usituí lú cani naca tuuxa ndaani guidxilayú riꞌ.
28 Ne laca ulí be cani qué risaca para binni guidxilayú,
ne cani na cabe qué iquiiñeꞌ,
ne cani qué rulabi binni laa,
para unduuxe be cani risaca para laacaꞌ,
29 ti iruti uchá enda naróꞌ sti nezalú be.
30 Laabe ma uluu né be laatu Cristu tobi si,
ne yanna ma Cristu nga enda biaani stinu purti pur Cristu ma bixhá be stonda nu ne bisiá be ladxidóꞌ no,
ne ma bilá nu.
31 Casi cá lu Xquiꞌchi Dios:
“Tu gacalaꞌdxi uchá enda naróꞌ sti la?
iníꞌ ni biꞌni Señor pur laa.”