GUIꞌCHI BICAA SAN PABLU LU CA XPINNI CRISTU NI NUU ROMA
1
Naa nga Pablu.
Rune xhiiña Jesucristu.
Uníꞌ né be naa gaca apóstol ne ulee chu be naa para canayué de evangeliu sti Dios.
2 Cadi deru yanna cayete evangeliu riꞌ,
sínuque maca bizeete Dios ni dede chiqué lu ca guiꞌchi ni bicaa ca profeta stiꞌ.
3 Rusiidi evangeliu ri de Xiiñi be ni gule lade ca xiiñi David ra beda aca binni guidxilayú,
o gabi nu Jesucristu Señor stinu.
4 Pur Espíritu sti Dios ni napa be biasa be de lade gueꞌtu ne stale enda nandxóꞌ,
ne zacá bihuinni Xiiñi Dios laabe.
5 Pur laabe uca Dios nachaꞌhui ne naa,
ne biseenda naa gune xhiiña irá guidxi ti guni cre irá binni laabe ne guni ca ni na be.
6 Ne lade ca binni que zeeda tu laatu,
purti ma uníꞌ né Dios laatu para aca tu xpinni be.
7 Cuseenda guiꞌchi ri ra nuu tu,
hermanu caꞌ,
casi nuu tu ndaani guidxi Roma ca.
Nadxii Dios laatu ne ulí laatu para aca tu xpinni.
Yanna,
Dios Bixhoze nu ne Señor Jesucristu cuꞌ ndaaya laatu ne quixhe dxí ladxidóꞌ to.
Racalaꞌdxi Pablu che Roma
8 Casi uzuluáꞌ racaladxe inié nia Jesucristu udii diuxquixe Dios pur irá tu,
purti irá ladu ma cuzeete cabe pabiáꞌ napa tu fe ne Dios.
9 Rune xhiiña Dios ne rue de evangeliu sti Xiiñi be de idubi ladxiduáꞌ.
Ne laabe ñanda ñabi be laatu,
qué riaana dxie de uzeete laatu lú be ora rinié nia laabe.
10 Laca rinaba lú be tílasi chuꞌ dxi ganda chaa ra nuu tu,
ne pa nga ni racalaꞌdxi be,
yanna ca ziaaꞌ.
11 Purti napa stale gana guuya laatu para acaniá laatu guiene chaahui tu stiidxa Dios ti uzuhuaa chaahui tu.
12 Ne zacá zacané saa nu pur fe stinu,
purti zacané tu naa pur fe stitu,
ne zacaniá laatu pur fe stinneꞌ.
13 Hermanu caꞌ,
racaladxe ganna tu,
stale tiru huayabe ñaa ra nuu tu,
peru dede nagasi qué huayanda diꞌ.
Napa gana gune dxiiña lade ca binni xquidxi tu para ganda gune ganar caadxi de laaca para Cristu,
cásica huayune ndaani xcaadxi guidxi ra nuu cani cadi judíu,
cani qué ñunibiáꞌ gá Dios.
14 Naa napa xidé güe stiidxa Cristu lade iráꞌ,
cásica ra nuu cani nabeza ndaani guidxi roꞌ,
zaqueca ra nuu cani nabeza guiꞌxhiꞌ,
cásica ra nuu cani nuu xpiaaniꞌ,
zaqueca ra nuu cani huaxiéꞌ riene.
15 Ngue runi para naa nagasi ca ñaa ra nuu tu,
purti laca napa stale gana güe de evangeliu lade irá tu casi nuu tu Roma.
Nandxóꞌ evangeliu
16 Qué rituí di lua güe stiidxa Cristu,
purti laape ni nga ni riquiiñe Dios para ulá irá cani guni cre ni.
Nirudóꞌ beeda ni ra nuu ca judíu,
ne óraque ra nuu cani cadi judíu.
17 Rusiene ni laanu ruxhá Dios stonda nu ra guni cre nu,
ne gasti ru sti modo.
Casi cá lu Xquiꞌchi Dios,
ra na:
“Ni ma bixá stonda ra bini cre la?
zabani.”
Stonda binni guidxilayú
18 Peru xiana sti Dios nuu luguiá irá cani qué rulabi laa,
ne irá cani ruchee,
purti pur irá ni cuchee cabe que,
qué ganda ihuinni ni jneza.
19 Nanna ca cabe tu laabe ne ma biene cabe biaꞌ zanda guiene binni de laabe,
purti ma bisiene be laacaꞌ.
20 Neca qué zanda guꞌya cabe enda nandxóꞌ stibe ni qué ziuu dxi iluxe,
ne qué zanda guꞌya cabe ximodo laabe,
peru dede dxi bizáꞌ be guidxilayú rihuinni dxichi tu naca be pur irá ni biꞌni be,
para cadi iníꞌ cabe qué ganna cabe.
21 Ucabiáꞌ ca cabe laabe,
peru qué ñapa cabe laabe casi Dios,
ne qué nudii cabe diuxquixe laabe,
laga uca huati ique cabe ne bicahui xquenda biaani cabe.
22 Gucalaꞌdxi cabe ñuu xpiaani cabe peru laga uca huati cabe.
23 Bisaana cabe enda nandxóꞌ sti Dios,
ne lugar de ñapa cabe Dios ni qué ziuu dxi gatiꞌ,
gupa cabe bidóꞌ ni bizáꞌ cabe chura binni guidxilayú ni rati,
ne chura mani huiiniꞌ,
ne irá clase maniꞌ,
ne chura beendaꞌ.
24 Ngue runi bisaana Dios laacabe guni cabe enda nayuudxu ni cá ique cabe que,
ne guni cabe ni cadi jneza,
ne zaqué biꞌni dxaba saa cabe xcuerpu cabe.
25 Purti qué ñuni cre cabe ni dxandí ni biluíꞌ Dios laacabe que,
laga yenanda cabe enda rusiguii.
Gunaxhii cabe ni uyáꞌ ne bisisaca cabe laa,
ne qué ñanaxhii cabe ni bizáꞌ irá xixé ni.
Laa nda nga qué ziaana dxí de isaca.
Amén.
26 Nga runi bisaana Dios laacabe aca yuudxu cabe modo gapa cabe gana.
Gunaa ma qué ñuni casi runi gunaa sínuque uyuu né ca laca gunaa.
27 Ne hombre bisaana de ñacabiáꞌ gunaa ne uca ique ne hombre casi laa.
Hombre ne hombre biꞌni ca irá enda nayuudxu sin nituí lú caꞌ.
Zacá beda iree guiaana cabe pur ni bichee cabe que.
28 Biiya si Dios ma qué na cabe ulabi cabe laa,
bisaana laacabe guni cabe ni na xquenda biaani huati cabe,
enda qué iquiiñeꞌ.
29 Ne jma rusi yenanda cabe irá ni cadi jneza:
rapa cabe jnadxii cabe,
riulaꞌdxi cabe quite cabe ique stobi,
qué ridxá cabe ne sti si cabe,
runi cabe ni nadxabaꞌ,
rache lú cabe sti stobi,
ruuti cabe binni,
ridinde cabe,
rusiguii cabe,
ne ni na cabe que,
nga laani.
30 Qué rusaana dxí cabe de iníꞌ cabe binni,
riguixhe cabe mal stobi,
raca nanalaꞌdxi cabe Dios,
ricabi ruaa cabe,
raca cabe nayáꞌ,
ruchá cabe enda naróꞌ stícabe,
ne de laacabe riale irá enda nayuudxuꞌ.
Qué ruzuuba cabe stiidxa bixhoze cabe nin stiidxa jñaa cabe,
31 qué riene cabe ne qué runi cumplir cabe,
qué ranaxhii cabe,
qué runi perdonar cabe,
ne qué riá cabe.
32 Neca nanna cabe xi na Dios ne nanna cabe naquiiñe gati cani guni irá nga,
peru cadi nga si runi cabe sínuque laca rieche cabe guꞌya cabe uchee stobi biaꞌ cuchee cabe.