Ra nuu cabe Malta
28
Ora ma irá du nuu du lu yuxi que,
gunna du Malta lá isla que.
2 Nabé nachaꞌhui uca ca binni raqué ne laadu.
Biꞌni ca ti gui purti nananda raqué ne cayaba nisa guie.
Ne guridxi ca laadu idxiña du cueꞌ gui que idxaa du.
3 Bitopa Pablu chupa ndaa yaga bidxi uluu lu gui que.
Ne ora unaaze gui ni,
biree yaande ti beendaꞌ,
ucuá lu ná be.
4 Ora biꞌya ca binni raqué nanda beenda que lu ná be,
na caꞌ:
―Señaladu huayuuti hombre ca binni.
Neca bilá be ndaani nisadóꞌ peru ma chi gati be para quixe be ni nuzaabi be.
5 Peru udxibi ná be,
biaba beenda que lu gui,
ne gasti qué ñaca be.
6 Irá ca cabeza si ca idxá be gui o mala guiaba be gati be.
Peru xadxí uleza ca ne biiya ca gasti qué ñaca be.
Oraque ma adxé ni na caꞌ,
ma na ca ti dios laabe.
7 Gaxha de ra cadxaa du que nuu layú sti Publio ni runi mandar isla que.
Gudxi be laadu chuu du ralidxi be.
Nabé bilabi be laadu ne biaana du raqué chonna gubidxa.
8 Ca dxi que pe huará bixhoze be,
nexhe né xindxáꞌ ne yuba ndaaniꞌ.
Para uyé Pablu ra nuu,
ne biluxe si uníꞌ né Dios ulaꞌqui ná luguiá be,
bisianda laabe.
9 Ora gunna ca binni que ni la?
bedané ca stale binni huará,
ne laca bianda caꞌ.
10 Ne bisigaꞌde ca laadu stale cosa.
Ne zaqueca ora ma chuu du,
bidxiiba ca irá ni iquiꞌñe du lu barcu.
Ra yendá Pablu Roma
11 Ma udiꞌdi chonna beeu de nuu du raqué,
ucuaa du ti barcu de Alejandría ni bitiidi ca beeu nanda raqué.
Punta barcu que cá chupa bidóꞌ,
Cástor ne Pólux.
12 Yendá du puertu Siracusa ne biaana du raqué chonna gubidxa.
13 De raqué biréꞌ du uzá du lu nisa ti uriá ti uriá dede yendá du Regio.
Sti dxi que bizulú bindubi ti bi nisa,
ne lu sti dxi que yendá du Puteoli.
14 Raqué bidxaaga du caadxi hermanu ne unaba ca laadu guiaana né du laaca ti semana.
De raqué biréꞌ du ziuu du Roma.
15 Gunna ca hermanu de Roma ma zidxiña du para yendeza ca laadu.
Caadxi beda ndeza laadu Apio ne xcaadxi biaana Tres Tabernas.
Ora biꞌya Pablu laacabe,
bidii diuxquixe Dios ne bieche ladxidóꞌ.
16 Ora yendá du Roma bisaana capitán ziné laadu que irá presu lu ná xaíque sti ca soldadu de raqué.
Peru bisaana cabe Pablu ndaani ti yoo,
laa si ne ti soldadu cayapa laa.
Ra byuiꞌ Pablu stiidxa Cristu Roma
17 Lu chonna gubidxa de yendá du,
guridxi Pablu ca xaíque sti ca judíu de raqué.
Ne ora bidxiña ca rabi be laacaꞌ:
―Biche caꞌ,
qué huachee nia diaꞌ ca binni xquidxi nu,
nin ni bisaana ca bixhoze gola nu guni nu.
Peru unaaze cabe naa Jerusalén,
bitiidi cabe naa lu ná ca romanu.
18 Ne unaba diidxa ca romanu naa ximodo ni.
Ne ora biꞌya ca qué gapa donda para gate la?
ucalaꞌdxi ca nundaa ca naa.
19 Peru qué niná ca binni laanu.
Ngue runi gupa xidé unaba tide lu ná César neca qué gapa xi pur cuaa xqueja ca binni xquidxeꞌ.
20 Ne guridxe laatu para guuya laatu,
ne para güe nia laatu diidxaꞌ.
Liibe cadena ri purti rune cre ma beeda dxa ni cabeza irá xixé judíu.
21 Oraque na ca rabi ca laabe:
―Qué huacaa du gasti guiꞌchi de Judea ra nuzeete ca lii,
nin ca binni laanu de raqué ni beeda rarí qué niníꞌ ca pa cuchee luꞌ.
22 Peru racalaꞌdxi du ucáꞌ diaga du lii,
xi na luꞌ.
Purti irá ladu caníꞌ cabe religión cubi ri.
23 Para gudixhe cabe ti dxi gaca ni.
Ne ora gunda dxi que bidxiña stale binni ra nabeza be.
Bizulú be siadóꞌ ne dede bidxí layú cayuíꞌ né be laaca de enda runi mandar sti Dios.
Biquiiñe be ni bicaa Moisés ne ni bicaa ca profeta para ucuudxi be laaca guni cre ca Cristu.
24 Nuu caadxi ucuaa ni uníꞌ be que,
peru nuu xcaadxi qué ñuni cre.
25 Ma qué ñuu ca tobi si ne bizulú ca caree caꞌ.
Para na be rabi be laacaꞌ:
―Rarí pe nga riaba ni bisiníꞌ Espíritu Santu profeta Isaías chiqué ra na:
26 Uyé ra nuu ca binni que
ne gudxi laaca zuna diaga ca peru qué ziene caꞌ,
ne zuyubi lú ca peru qué zuuya caꞌ.
27 Purti ma biguidxi ladxidóꞌ caꞌ,
ne ma biseegu ca diaga caꞌ.
Ne biseegu ca lú ca
ti cadi guꞌya ca ne guna diaga caꞌ,
ti cadi guiene caꞌ,
uyubi ca naa para ulaꞌya laacaꞌ,
na Dios.
28 Oraque na Pablu:
―Laganna dxichi ma cucheeche Dios stiidxa lade cani cadi judíu ti ganna ca ximodo ilá caꞌ.
Ne laaca huaxa zucaa diaga caꞌ.
29 Ora bina diaga cabe ni uníꞌ Pablu ca,
birá cabe biree cabe zicaa yu cabe ni lade cabe.