Ra biseenda cabe Pablu Roma
27
Ne ora ma gudixhe cabe che Pablu Italia la?
bisigapa cabe laa ne xcaadxi presu ti capitán lá Juliu,
ni naca xaíque sti batallón sti Augustu César.
Ne naa nuaa lade cabe.
2 Laca nuu Aristarco,
binni Tesalónica de Macedonia.
Irá du udxiba du ndaani ti barcu de Adramitio ni chi iree che irá puertu sti Asia.
Biréꞌ du ziuu du.
3 Sti dxi que yendá du Sidón.
Nachaꞌhui guca Juliu ne Pablu,
bidii lugar yeganna be ca xhamigu be para udii ca ni caquiiñe be.
4 Biréꞌ du Sidón udidi du Isla Chipre.
Tantu cudxigueta bi laadu la?
biyubi du ladu que purti qué riguiñe bi.
5 Lu nisa que ziuu du udidi du Cilicia ne Panfilia dede yendá du Mira,
ti guidxi sti Licia.
6 Raqué bidxela capitán que ti barcu de Alejandría ni che Italia.
Para bidxiiba laadu lú ni.
7 Bindáꞌ du ne bidii dxiiña laadu para yendá du gaxha Gnido purti cudxigueta bi laadu.
Nga runi biyubi du neza huaxiéꞌ rinaaze bi ra udidi du isla Creta.
Neza que riaana guidxi Salmón.
8 Ne stale dxiiña uzá du gaxha de isla que dede yendá du ti lugar lá Buenos Puertos,
gaxha ti guidxi lá Lasea.
9 Nabé ma bindáꞌ du neza ne ma bidxiña dxi uzulú tiempu nanda,
ma naxoo sa binni lu nisa.
Ngue runi na Pablu rabi laacabe:
10 ―Hombre caꞌ,
ruuya nabé naxoo viaje riꞌ.
Zaniti barcu riꞌ ne irá ni dxá ndaaniꞌ.
Ne cadi nga si,
zándaca dede ne laanu.
11 Peru qué nulabi capitán ni ziné laadu que ni na Pablu,
sínuque jma bicaa diaga ni na ni ziusá barcu que ne xpixuaana ni.
12 Cadi galán raqué para tidi binni tiempu nanda.
Ngue runi casi irá cabe na cabe jma galán iréꞌ du raqué iduꞌya du pa ganda chindá du Fenice,
ti puertu sti isla queca ra qué lica rinaaze bi.
Ne raqué utiꞌdi du ca beeu nananda que.
Ra biete bi yooxho lu nisadóꞌ
13 Casi biꞌya cabe bindubi ti bi nisa na cabe ma chuu du.
Para biréꞌ du ne udidi du gaxha isla Creta que.
14 Laati du biréꞌ du biete ti bi yooxho rabi cabe “Euroclidón” unaaze barcu que.
15 Biyubi du ñuu du,
peru biduꞌya si du qué ñanda,
bidíꞌ du lugar chiné ni laadu ladu na ni.
16 Udidi du ti isla huiini lá Clauda ra jma huaxiéꞌ rinaaze bi.
Zeda xubi yu du ti canuá huiini ne dxiiña para ulúꞌ du ni ndaani barcu que.
17 Undisa si du ni la?
uluu cabe doo barcu que ti cadi ibiá.
Ne óraque undete cabe vela purti cadxibi cabe guiaazi barcu que ndaani yuxi ni rabi cabe Sirte,
ne bidii cabe lugar chiné bi ni.
18 Sti dxi que biiya si cabe cadi cayaana dxí bi que la?
bisaꞌbi cabe irá bultu ziné barcu que.
19 Raguionna gubidxa que ucuaa du irá traste sti barcu que bisaꞌbi du ndaani nisa.
20 Xadxí qué nihuinni gubidxa nin luceru ne cadi cayaana dxí bi que.
Mápeca rabi du qué zalá du.
21 Ma stale gubidxa biaana du sin idóꞌ do,
bizuhuaa Pablu lade cabe,
na rabi laacabe:
―Hombre caꞌ,
pa nucaa diaga tu naa la?
qué niréꞌ nu de Creta para cadi nizaaca nu irá ni cazaaca nu riꞌ.
Ne qué nuniti nu irá ni ma biniti nu riꞌ.
22 Peru yanna cayabe laatu cadi idxibi tu.
Nin tobi de laanu qué zati nu,
neca barcu ri zanitilú.
23 Laatu nanna tu sti Dios naa ne rune xhiiña be.
Nuchi biseenda be ti ángel ra nuaaꞌ,
24 na rabi naa:
“Cadi idxibi lu,
Pablu,
purti naquiiñe chi uzuhuaa lu lu César.
Ne pur lii zulá Dios irá cani zinéu ca.”
25 Nga runi cayabe laatu hombre caꞌ,
cadi idxibi tu,
purti rune cre zuni Dios ni bisenda tidxi naa ca.
26 Peru napa nu xidé iréꞌ cá nu lu xiixa isla.
27 Ma raca chupa semana de canacaa bi que laadu lu nisa,
ti gueela biaꞌ galaa gueela ra zididi du nisadóꞌ Adria bidii cani runi dxiiña lu barcu que cuenta ma cadxiña du uriá.
28 Para uluu biaꞌ cabe pabiáꞌ ziaꞌ raqué.
Napa ni treinta y seis metru.
Uzá si du stindaa bigueta uluu biaꞌ cabe sti tiru.
Raqué ma napa ni veintisiete metru.
29 De raqué ma bidxibi cabe gueda idxela saa ni guie,
para bisaba cabe tapa ancla atrá de laani,
ne para laacabe pa ñanda si ma nirá gueelaꞌ.
30 Oraque gucalaꞌdxi cani runi dxiiña lu barcu que nuxooñe caꞌ.
Biꞌni ca sica ni zindete ca ca ancla nuu delante que.
Abade canuá huiini que candete caꞌ.
31 Peru na Pablu rabi capitán ne ca soldadu que:
―Pa qué guiaana ca hombre ca ndaani barcu ri la?
qué zalá di tu.
32 Oraque bichuugu ca soldadu que stoo canuá huiini que ne bidii ca lugar ze ni.
33 Ma zedará gueela gudxi Pablu laacabe go cabe xiixa,
na:
―Ma chupa semana qué huayasi tu ne qué huayó to gastiꞌ.
34 Rinaba laatu go to ti gapa tu stipa.
Ne cadi chuꞌ tu xizaa,
gasti qué zazaaca tu.
35 Biluxe si uníꞌ be nga ucuaa be ti pan,
bidii be diuxquixe Dios nezalú irá caꞌ.
Para undaa be ni ne bizulú be cayó be.
36 Oraque ru ma qué nidxibi caꞌ,
ne irá ca gudó caꞌ.
37 Biaꞌ chupa gayuaa setenta y seis du nuu du ndaani barcu que.
38 Biluxe si gudó cabe biaꞌ ucalaꞌdxi cabe,
bisaba cabe trigu ziné cabe ndaani nisa para isisi barcu que.
Ra biaazi barcu
39 Ora birá chaahui gueela biiya cani runi dxiiña lu barcu que nuu ra nabidxi,
peru qué runibiáꞌ ca raqué.
Peru biiya ca nuu ti manga sti nisadóꞌ raqué,
nexhe yuxi idubi uriá.
Ne na ca pa ganda uchiña ca barcu que raqué.
40 Para bichuugu ca ca doo sti ca ancla que,
bisaana ca cani ndaani nisadóꞌ,
ne bisitaata ca ca doo liibi timón sti barcu que.
Oraque undisa ca vela ni nuu delante que,
para inaaze bi ni,
ne zaqué ma zidxiña ni lu yuxi.
41 Peru mala yeudxiga ique ni ndaani ti loma huiini yuxi.
Qué lica ñanda ru niniibi ni.
Ne ma careza atrá ni ra cadxela saa ola.
42 Ucalaꞌdxi ca soldadu ñuuti ca ca presu ti cadi xhuꞌba ca uxooñe caꞌ.
43 Peru racalaꞌdxi capitán que ulá Pablu.
Ngue runi qué nudii lugar ñuni cabe ni,
sínuque na,
cani nanna xhuꞌba la?
guiaba gá nisa que,
sa niru iree lu yuxi.
44 Ne ca xcaadxi que,
ni biree lu tabla,
ni biree lu yaga ndahui sti barcu que.
Zacá nga bilá irá cabe.