Ni uníꞌ Pablu nezalú Agripa
26
Oraque na Agripa rabi Pablu:
―Pa napu xi iníꞌ lu de irá ni na cabe ca la?
ma zanda iníꞌ luꞌ.
Para undisa ná Pablu ne bizulú na:
2 ―Señor rey Agripa,
cayeche zuhuaa lú lu yanadxí para inié xi pe huayune de ni cugaani ca judíu luguiaꞌya ca,
3 jma rusi purti lii riene lu modo nabani ca judíu ne irá ni ricaa yu cabe lade cabe.
Nga runi rinaba lii cadi ixhacalaꞌdxi lu ucaa diaga lu naa.
4 Irá ca judíu nanna ximodo uzaya ndaani xquidxe ne ndaani guidxi Jerusalén,
dede dxi nahuiineꞌ.
5 Laacabe nanna dxichi cabe,
ne ñanda niníꞌ cabe pa ñacalaꞌdxi cabe,
dede dxi nahuiineꞌ fariseu naa.
Ne ca fariseu nga jma rinanda ley sti ca judíu.
6 Ne yanna nuaa rarí cudxiiba cabe donda ique purti rune cre zadxiña dxi usibani Dios gueꞌtu casi bidii stiidxa ca bixhoze gola du.
7 Irá ni za de idubi doce xiiñi Israel cabeza idxiña dxi que.
Nga runi cadi cusaana dxí ca de usisaca ca Dios ridxí ne huaxhinni.
Ne pur nga ca caguu ca judíu xquejaꞌ,
rey Agripa.
8 Laga laatu yaꞌ,
xi na tu.
Ñee na tu qué zanda usibani Dios gueꞌtu la?
9 Zacaca bine chiqué,
rabe jneza cayuneꞌ,
cuyube gune irá ni ganda para uniteluáꞌ stiidxa Jesús de Nazaret.
10 Zacá bine Jerusalén.
Ne stiidxa ca xaíque sti ca sacerdote biseguayuaa stale xpinni be.
Ne ora biiti cabe laacaꞌ,
ne naa unié zaa gati caꞌ.
11 Stale tiru bine naꞌya laaca para nusaana ca ni runi cre caꞌ.
Zacá bine irá ca ra yuꞌduꞌ,
ne tantu cadxiiche nia laaca dede uzabe nanda laaca xquidxi binni.
Ra byuíꞌ Pablu modo bini cre
12 Nga ca cá ique gune biree ziaa Damasco.
Ziniá xquiꞌchi ca xaíque sti ca sacerdote.
13 Guca ni biaꞌ galaa dxi,
señor rey,
ziaa neza,
mala biiya ti biaani de ibáꞌ jma ruzaani que gubidxa.
Ne bizaani ni laadu,
naa ne cani ziniá que.
14 Irá du biaba du layú,
ne óraque bina diaꞌga caníꞌ tuuxa diidxa hebreu na:
“Saulo,
Saulo,
xiñee canazabi nanda lu naa.
Cayuniná lu laca lii casi runi buey ora riguu ñee punta puya.”
15 Oraque rabeꞌ:
“Tu lii yaꞌ,
Señor.”
Para na Señor:
“Naa nga Jesús ni canazabi nanda lu ca.
16 Biasa bizuhuaa.
Unié nia lii para guꞌnu xhiiñaꞌ,
para güi lu irá ni cayuuya lu riꞌ,
ne ni chi ulué ruaꞌ lii.
17 Zulaꞌya lii lu ná ca binni xquidxi luꞌ ne lu ná cani cadi judíu.
Chi useenda lii ra nuu ca
18 para güi neu laaca xii nga ni dxandíꞌ,
ti ixele xquenda biaani ca ne usaana ca irá enda huati sticaꞌ,
uyubi ca xii nga jneza.
Ne cadi chi nanda ca ni na binidxabaꞌ sínuque ni na Dios,
ne guni cre ca naa,
ti gaca perdonar ni huachee caꞌ ne icaa ca ni ma gudixhe Dios gudii cani ma biá ladxidóꞌ.”
Ra byuíꞌ be modo bizuuba be stiidxa Dios
19 Zacá nga laani,
Señor rey Agripa,
bizuuba stiidxa ni uníꞌ né naa de ibáꞌ que.
20 Ne casi bizuluáꞌ byue nia ni ca binni Damasco.
Gudxe laaca inaba ca perdón Dios,
udxii lú ca jneza be ne ibani ca jneza ti ihuinni ma adxé laacaꞌ.
De raqué biree yegüé ni Jerusalén ne idubi Judea ne lade cani cadi judíu.
21 Pur nga unaaze ca judíu naa ndaani yuꞌdu roꞌ,
ucalaꞌdxi ca ñuuti ca naa.
22 Peru huayacané Dios naa,
nga runi dede nagasi duꞌ cayué stiidxaꞌ.
Ne cayué nia ni ni risaca ne ni qué risaca.
Irá ni canié riꞌ maca bicaa ca profeta ne Moisés chi gaca cani.
23 Ne ndi nga ni bicaa cabe que:
napa Cristu xidé gacaná dede gatiꞌ.
Peru nirudóꞌ laa ibani de lade gueꞌtu ne zuiꞌ né binni modo ilá,
cásica binni laadu zaqueca binni sti guidxi.
Ra biyubi be nucuudxi be Agripa
24 Zacá caníꞌ Pablu para ihuinni gasti donda luguiáꞌ ora uníꞌ Festo reciu na:
―Cayaca iꞌcu,
Pablu.
Tantu huayuunda lu de ma ze xpiaani luꞌ.
25 Para na Pablu:
―Coꞌ,
señor Festo.
Cadi cayaca di iqueꞌ,
sínuque cayué diidxa jneza,
ne dxandí ni cayabe laatu ca.
26 Qué ridxibe inié ni purti rarí nuu rey Agripa,
nanna dxandí ni.
Nanna dxiꞌche gunna be guca ni,
purti cadi nagaꞌchi guca ni.
27 Runi cre lu ca profeta la?
rey Agripa.
Nanna runi cre luꞌ.
28 Para na Agripa:
―Xcaadxi si ma ñuꞌnu naa xpinni Cristu.
29 Oraque na Pablu:
―Pa xcaadxi si o pa riaadxa ruꞌ,
peru tila na Dios cadi lii siouꞌ sínuque ne irá cani cucaa diaga naa riꞌ,
gueda gaca ca casi naa,
casi rune cre,
cadi casi caya cadena riꞌ.
30 Casi biluxe uníꞌ Pablu biasa rey Agripa ne Festo ne Berenice ne cani zuba né laaca raqué.
31 Ne ora biree ca na caꞌ:
―Qué huayuni di hombre ri gasti para gatiꞌ,
nin para guieguyoo.
32 Ne na Agripa rabi Festo:
―Ñanda niree be pa ñaca qué ninaba be ñe be ra nuu César.