Ra zuhuaa Pablu nezalú Festo
25
Chonna gubidxa de zuba Festo biree de Cesarea,
uyé Jerusalén.
2 Ora yendá raqué bidxiña ca xaíque sti ca sacerdote ne xcaadxi ni napa diidxa lade ca judíu,
yenduu ca xqueja Pablu ra nuu be.
Unaba ca laabe,
3 na ca guni be ti favor laacaꞌ,
indete be Pablu Jerusalén.
Peru maca gudixhe chaahui ca cueza ca Pablu neza,
guuti ca laa.
4 Peru rabi be laaca yeguyoo Pablu Cesarea ne mayaca ibigueta be raqué,
5 ne zanda chiné caadxi de cani runi mandar lade ca laabe,
ne raqué cuꞌ ca xqueja Pablu pa biꞌni xiixa.
6 Biaana be raqué biaꞌ xhono o chii gubidxa si para bigueta be Cesarea.
Sti dxi que gurí be jlugar be ne guridxi be Pablu.
7 Ora bidxiña Pablu,
gurí zisi irá judíu ni beeda de Jerusalén que laa.
Cugaani ca stale donda naroꞌba luguiá peru qué ñanda nusihuinni ca dxandí ni.
8 Oraque bizulú Pablu gudxi laacabe cadi dxandí ni cugaani cabe luguiá que,
na:
―Qué huachee nia ley sti ca judíu nin sti César ne qué huayune gasti ndaani yuꞌdu roꞌ.
9 Peru racalaꞌdxi Festo guieche né ca judíu laa para na rabi Pablu:
―Ñee racalaꞌdxu cheuꞌ Jerusalén para quixhe cabe xqueja lu raqué la?
Ne raqué guuya pa napu donda o pa coꞌ.
10 Peru na Pablu:
―Zuhuaa lu ná Cesár.
Rarí nga gata xquejaꞌ,
purti qué huachee nia ca judíu.
Lii ca nannu ni.
11 Pa huayune xiixa cadi jneza ne naquiiñe gate la?
zaa gateꞌ.
Peru pa cadi dxandí ni cugaani cabe luguiaꞌya ri la?
iruti gapa xidé utiidi naa lu ná cabe.
Rinaba utiidi lu naa lu ná César.
12 Oraque uníꞌ né Festo ca hombre nuu xpiaani ni racané laa,
para na rabi Pablu:
―Ra nuu César unaba lu cheuꞌ la?
yanna ma cheuꞌ ra nuu César.
Ra zuhuaa Pablu nezalú Agripa
13 Udiꞌdi xhupa xhonna gubidxa uyé rey Agripa ne Berenice,
yeizaca ca Festo.
14 Bindaa huiini cabe raqué,
ngue runi gunda byuíꞌ né Festo laacabe stiidxa Pablu,
na:
―Bisaana Félix ti hombre rarí yeguyoo.
15 Ne dxi guyaa Jerusalén bidxiña ca xaíque sti ca sacerdote ne xcaadxi xaíque sti ca judíu,
byuíꞌ né ca naa stiidxa be ne unaba ca useenda guute laabe.
16 Peru rabe laaca cadi zacá di runi ca romanu,
sínuque ribidxi nu ni cayuu xqueja que nezalú cani caguu xqueja para iníꞌ pa dxandí ni na cabe que o pa coꞌ.
17 Nga runi ora beeda irá cabe raríꞌ,
qué nibeza nidiꞌdi stale dxi,
sínuque sti dxi queca gurié ne guridxe Pablu.
18 Zaca naa nuzeete cabe biꞌni be xiixa naroꞌbaꞌ.
Peru cadi nga di nga laani,
19 Sínuque cadinde né cabe laabe pur ni runi cre cabe ne pur ti gueꞌtu lá Jesús,
ti Pablu na nabani ru be.
20 Ne cumu qué ganna xi gune nia ni la?
unaba diidxa laabe pa racalaꞌdxi be che be Jerusalén ne raqué gaca chaahui ni.
21 Peru unaba be zaa yeguyoo be laga si che be ra nuu César.
Ngue runi bisaana laabe yeguyoo be laga si ganda useenda laabe.
22 Oraque na Agripa:
―Naa laca racaladxe ucaa diaga laabe.
Para na Festo:
―Ixí ca ucaa diaꞌgu laabe.
23 Sti dxi que bizuchaahui rey Agripa ne Berenice,
biuu ca ndaani yoo roꞌ ra ritixhe binni queja lu Festo.
Biuu né ca ca xaíque sti ca soldadu ne ca hombre napa diidxa ndaani guidxi que,
ne irá binni cusisaca laacaꞌ.
Para bisenda caa Festo Pablu.
24 Oraque na Festo:
―Señor rey Agripa ne irá tu cani nuu raríꞌ.
Chi güe nia laatu stiidxa hombre zuhuaa raríꞌ.
Huaguu ca judíu xqueja be,
cásica Jerusalén,
zaqueca raríꞌ.
Ne cadi cayaana dxí ca de inaba ca gati be.
25 Peru qué idxela diaꞌ gasti donda luguiá be para gati be.
Ne chi useenda laabe ra nuu Augustu César,
purti nga unaba be.
26 Peru qué idxela diaꞌ xi ucaa lu xaíque stinneꞌ.
Nga runi bedaniá laabe ra nuu tu ne jma rusi ra nuu luꞌ,
rey Agripa,
ti ora ma udaañe nu laabe la?
ma ganda gapa xi ucaaꞌ.
27 Purti ruluíꞌ enda huati si useenda tuuxa ra nuu César sin gucaa xiñee yeguyoo.