Ra guta xqueja Pablu
24
Xcaayu gubidxa de ngue uyé Ananías sacerdote gola,
laa ne xcaadxi xaíque sti ca judíu ne ti abogadu lá Tértulu.
Ye tixhe ca xqueja Pablu lu gobernador que.
2 Para bisenda caa cabe Pablu,
ne óraque bizulú Tértulu caguu xqueja be,
na:
―Señor gobernador Félix,
pur lii nuu dxí xquidxi du,
ne stale ni galán cayuꞌnu ndaani xquidxi du purti nuu xpiaani luꞌ.
3 Diuxquixe lii,
señor Félix,
saca cayuꞌnu irá nga irá ladu.
4 Peru para cadi cuee du xhiiña lu la?
rinaba lii guꞌnu favor ucaa diaga lu laadu ti ratu huiini si.
5 Biduꞌya du nuu hombre ri casi ti enda huará lade ca judíu.
Canazá be idubi guidxilayú canautinde be laacaꞌ.
Naca be xaíque sti ca xpinni Jesús de Nazaret que.
6 Ne laca ucalaꞌdxi be ñuni yuudxu be yuꞌdu roꞌ stidu peru unaꞌze du laabe ne ucalaꞌdxi du nudxiꞌba du donda ique be casi na ley stidu.
7 Peru biseenda Lisias caadxi soldadu yegaxha laabe lu ná du.
8 Ne biseenda cani caguu xqueja be gueeda ra nuu luꞌ.
Yanna lii zanda caañe lu laabe para gannu xiñee cagúꞌ du xqueja be.
9 Ca judíu ni nuu raqué na ca dxandí irá ni na Tértulu que.
Ni uníꞌ Pablu ra cayuu xqueja
10 Oraque biꞌni gobernador que seña Pablu iníꞌ.
Para na Pablu:
―Cayeche zanda inié nezalú lu xi huayuneꞌ,
purti nanna ma xadxí zuba lu de xaíque sti guidxi riꞌ.
11 Deru raca doce dia de yendaya Jerusalén ziusisaca Dios.
Zanda inaba diidxu pa cadi dxandí ni.
12 Qué nindá cabe naa cadinde diidxa nia tuuxa,
ne cadi cayune yaya binni,
nin ndaani yuꞌdu roꞌ ne nin ndaani yuꞌdu huiiniꞌ,
nin ndaani guidxi que.
13 Ne qué zanda uluíꞌ cabe lii dxandí ni cugaani cabe luguiaꞌya riꞌ.
14 Peru ndi huaxa dxandíꞌ:
rusisaca Dios sti ca bixhoze gola du,
peru modo gudixhe be gusisaca nu laabe yanna.
Nga nga na cabe neza ni cadi dxandí ca.
Peru laca rune cre irá ni bicaa Moisés ne ni bicaa ca profeta.
15 Naa rune cre zusibani Dios gueꞌtuꞌ,
cásica ni nachaꞌhui zaqueca ni cadi nachaꞌhuiꞌ.
Ne nga ca runi cre cabe.
16 Nga runi ruyube cadi uchee nia Dios ne cadi uchee nia binni.
17 Xadxí huiini uzaya xquidxi binni ne óraque bigueta xquidxe para udiee guna ne para udiee ofrenda Dios.
18 Ngue nga cayuneꞌ,
nuaa ndaani yuꞌdu roꞌ,
ma biluxe bine ni cá lu ley stidu guni du.
Raqué nuaa ora biꞌya caadxi judíu de Asia naa.
Cadi lade stale binni nuaaꞌ,
ne cadi cayune yaya binni.
19 Pa na cabe bine xiixa la?
xiñee ca ngue qué ñeeda nduu xqueja yaꞌ.
20 Peru laca zanda iníꞌ cani nuu rarí pa bidxela ca xiixa donda luguiaꞌya ra zuhuaa nezalú ca justicia.
21 Ni bine tiaꞌ la?
bicaa ridxi lade cabe gudxe laacabe cudxiiba cabe donda ique purti rune cre zabani gueꞌtuꞌ.
Ne zándaca nga nga laani.
22 Maca riene Félix xii nga evangeliu,
para na:
―Guiaana gá ni de ora gueeda Lisias.
Oraque gabe laatu xi gaca xa de laani.
23 Ne gudxi be caadxi soldadu gapa Pablu peru cadi cuee ca laa de guni ni racalaꞌdxiꞌ,
ne udii ca lugar guiuu ca xhamigu guꞌya laa.
24 Xhupa xhonna gubidxa de ngue bedané Félix Drusila xheelaꞌ.
Judía xheela be que,
ne guridxi be Pablu para güi né laacabe ximodo runi cre binni Jesucristu.
25 Peru ora beda uzeete Pablu naquiiñe sa binni jneza ne cadi guni ni na ique,
ne ziuu dxi cuidxi Dios cuenta binni la?
bidxibi be ne na be:
―Biaꞌ cá si.
Guyé yanna,
naa ma cuidxe lii ora gapa sti lugar.