23
Oraque biiya dxí be ca justicia ne rabi be laacaꞌ:
―Biche caꞌ,
dede nagasi huazaya jneza,
ne nayá ladxiduáꞌ nezalú Dios.
2 ―Lacapa ruaa be racá,
na Ananías sacerdote gola,
rabi cani nuu gaxha de laabe que.
3 Para rabi be laa:
―Lii ruꞌnu siouꞌ lii nachaꞌhui peru cadi dxandí ni.
Laca zusaba ná Dios lii.
Zubu racá para udxiibu donda ique pa bichee nia ley.
Peru laga lii cuchee neu ley purti cayuni mandar lu capa cabe ruaaꞌ.
4 Oraque na cani nuu raqué rabi laabe:
―Zacá nga icabi ruaa lu sacerdote gola sti Dios la?
5 Para rabi be laacaꞌ:
―Biche caꞌ,
pa ñanna sacerdote gola laabe la?
qué ninié zacá,
purti cá lu Xquiꞌchi Dios:
“Cadi cuꞌ dí lu ni naca xaíque ndaani xquidxi luꞌ.”
6 Ne ora biꞌya be nuu caadxi saduceu raqué ne caadxi fariseu la?
uníꞌ be reciu nezalú justicia que,
na be:
―Biche caꞌ,
naa fariseu naa,
xiiñi fariseu.
Caguu cabe xqueja purti si rune cre zabani gueꞌtuꞌ.
7 Ra uníꞌ be zaqué uyuu dinde ca fariseu ne ca saduceu ne undaa saa caꞌ.
8 Purti ca saduceu na qué zabani gueꞌtuꞌ ne cadi dxandí nuu ángel nin espíritu.
Peru ca fariseu na dxandí nuu irá ni.
9 Oraque uca ti ruidu raqué ne biasa caadxi maistru de ley ni za lade ca fariseu,
na caꞌ:
―Qué ridxela du gasti ni cadi jneza luguiá hombre riꞌ.
Laga pa huandí espíritu o ángel huaníꞌ né laabe yaꞌ.
Cadi galán ucáꞌ lú nu Dios.
10 Biiya si xaíque que jma rusi zirooba enda ridinde que,
bisenda caa soldadu para cuee laabe lu ná cabe,
cuꞌ laabe ndaani cuartel,
purti cadxibi gueda uxuuxe cabe laabe.
11 Sti gueela que bizuhuaa Señor lú be na rabi laabe:
―Cadi idxibi lu,
Pablu.
Cásica byuíꞌ lu stiidxa Jerusalén zacaca naquiiñe güi lu ni Roma.
Ra uníꞌ stiidxa ca judíu guuti Pablu
12 Sti dxi que uníꞌ stiidxa caadxi judíu na caꞌ:
―Gunidé Dios laanu pa idóꞌ no ne idéꞌ nu ante guuti nu Pablu.
13 Jma de cuarenta cabe uníꞌ stiidxa cabe zacá.
14 Uyé cabe ra nuu ca xaíque sti ca sacerdote ne ca xaíque sti guidxi,
ne rabi cabe laacaꞌ:
―Ma uní stiidxa du gunidé Dios laadu pa idóꞌ do ante guuti du Pablu.
15 Laatu lausenda tidxi xaíque sti ca soldadu useenda laabe ra nuu tu casi ñaca racalaꞌdxi tu ganna tu jma de laabe.
Laadu ma cabeza du laabe neza para guuti du laabe.
16 Peru beda ganda diaga xiiñi ti bizaꞌna be ni,
para yetidxi ni laabe ra cuartel.
17 Oraque guridxi be ti capitán rabi be laa:
―Yené hombre huiini ri ra nuu xaíque,
purti napa be xiixa gabi be laa.
18 Para ucuaa Capitán que hombre huiini que yené ra nuu xaíque,
na:
―Guridxi dxa presu lá Pablu que naa.
Unaba gueda nia hombre huiini ri ra nuu luꞌ,
purti napa xiixa gabi lii.
19 Para unaaze xaíque que ná hombre huiini que,
biree né laa ti ladu,
ne na:
―Xii nga napu gaꞌbu naa.
20 Para rabi laabe:
―Ma uníꞌ stiidxa ca judíu inaba ca lii chinéu Pablu ra nuu justicia ixíꞌ,
casi ñaca racalaꞌdxi ca ganna ca jma de laabe.
21 Peru cadi guni cre lu laacabe,
purti jma de cuarenta cabe cabeza cabe laabe neza.
Ma uníꞌ stiidxa cabe gunidé Dios laacabe pa go cabe o gue cabe ante guuti cabe laabe.
Ma cabeza si cabe xi na luꞌ.
22 Oraque na xaíque que rabi hombre huiini que:
―Uyé yanna ne qué chi tidxu iruti pa ma beda tidxu ni naa.
Ra yené cabe Pablu ra nuu Félix
23 Para guridxi xaíque que chupa capitán ne bini mandar cuꞌ cabe listu chupa gayuaa soldadu ne setenta ni dxiꞌba maniꞌ ne chupa gayuaa ni naaze lanza,
para che ca Cesarea huaxhinni que biaꞌ las nueve.
24 Ne guni chaahui ca mani quiba Pablu.
Chi saana ca laabe ra nuu gobernador Félix,
ne guꞌya ca qué izaaca be gasti neza.
25 Ne biꞌni ti carta.
Sicarí na ni:
26 “Estimado gobernador Félix,
lu guiꞌchi ri cugapa diuꞌxe lii.
Naa nga Claudio Lisias.
27 Unaaze ca judíu hombre riꞌ,
ucalaꞌdxi ca ñuuti ca laabe.
Peru ora gunna romanu laabe la?
yeniá soldadu yegaxha laabe lu ná caꞌ.
28 Yeniá laabe ra nuu justicia sticaꞌ,
purti racaladxe ganna xiñee caguu ca xqueja be.
29 Ne biiya cayuu xqueja be pur ni na ley stícabe,
peru qué huayuni be gasti para gati be,
nin para guieguyoo be.
30 Ne ora gunna naguixhe ca judíu guuti laabe la?
biseenda caꞌ laabe ra nuu luꞌ.
Ne ma gudxe cani caguu xqueja be ca che ca ra nuu luꞌ para gabi ca lii xii nga biꞌni be.
Sicarú guiaanuꞌ.”
31 Bixhinni si ucuaa ca soldadu que Pablu casi gudxi xaíque que laaca guni caꞌ.
Yesaana ca laabe Antípatris.
32 Sti dxi que bigueta ca soldadu que ra cuartel.
Peru cani dxiꞌba mani que la?
yené ca laabe dede Cesarea.
33 Ne ora yendá cabe Cesarea bidii cabe guiꞌchi que gobernador ne bisaana cabe laabe lu náꞌ.
34 Biluxe biinda si gobernador guiꞌchi que,
unaba diidxa padé laabe.
Ne ora gunna de Cilicia laabe la?
35 na rabi laabe:
―Zucaa diaꞌga lii ora gueeda cani gueda nduu xqueja luꞌ.
Ne óraque bini mandar guiaapa be ndaani xpalaciu Herodes.