NI BIꞌNI CA APOSTOL
Bidii stiidxa Jesús zuseenda Espíritu Santu
1
Teófilu xhamiguaꞌ,
lu primé guiꞌchi bicaa lú lu que bizeete irá ni biꞌni Jesús ne ni bisiidiꞌ,
dede dxi bizulú xhiiñaꞌ,
2 para dxi ze ibáꞌ.
Peru laga nuu ru be ndaani guidxilayú ulí be ca apóstol ne gudxi Espíritu Santu laabe xi gabi be laaca guni caꞌ.
Oraque ru ze be ibáꞌ.
3 Guti be peru dxi ma bibani be bidxiña be ra nuu ca apóstol.
Biaana né be laaca cuarenta dia,
ne biluíꞌ be laaca dxandí nabani be,
ne bisiidi be laaca de enda runi mandar sti Dios.
4 Ne laga nuu be lade caꞌ,
gudxi be laaca cadi iree ca de ndaani guidxi Jerusalén,
na be:
―Lacueza gueeda ni bidii stiidxa Dios useendaꞌ,
ni maca gudxe laatu que.
5 Purti uluu nisa Juan binni,
peru ne nisa si,
peru laatu zacaa tu Espíritu Santu casi ñaca ñuu nisa tu pur Espíritu que,
ne ma zeda dxiña dxi aca ni.
Ra ze Jesús ibáꞌ
6 Tobi de ca dxi que ra nuu né ca Jesús tobi si,
na ca rabi ca laabe:
―Señor,
ñee yanna nga quixhu guni mandar ca binni Israel sti tiru la?
7 Para rabi be laacaꞌ:
―Bixhoze siaꞌ nanna padxí ne pora gaca ni gudixhe gacaꞌ.
Laatu la?
cadi nexhe di ganna tu ni.
8 Peru ora ma ucuaa tu Espíritu Santu la?
zapa pe tu enda nandxóꞌ sti Dios,
ne óraque ma zanda iree tu,
chi güi tu stiidxa ndaani guidxi Jerusalén ne idubi Judea ne Samaria ne idubi naca guidxilayú.
9 Biluxe si uníꞌ be nga biasa be idubi cayuuya dxí ca laabe ne biseegu ti za laabe ne ma qué ñuuya ru ca laabe.
10 Peru laaca biaana ca cayuuya dxí ca ibáꞌ ra ze be que,
mala zuhuaa chupa hombre nacu lari quichi cueꞌ caꞌ,
11 na rabi laacaꞌ:
―Binni Galilea caꞌ,
xiñee ndi cayuuya dxí tu ibáꞌ.
Jesús ni biꞌya tu ze ibáꞌ ca la?
zacaca zabigueta be cásica biꞌya tu ze be ca.
Guyuu Matías jlugar Judas
12 Oraque ru biree cabe de lu dani Olivo,
bigueta cabe Jerusalén.
Cadi zitu ni,
biaꞌ ti kilómetru si.
13 Ne ora biuu cabe ndaani guidxi que uyuu cabe ndaani ti yoo rairopa pisu.
Raqué riaana cabe:
Pedru,
Jacobo,
Juan,
Andrés,
Felipe,
Tomás,
Bartolomé,
Mateu,
Jacobo xiiñi Alfeu,
Simón ni uyuu lade ca cananista,
ne Judas biꞌchi Jacobo.
14 Irá cabe nuu cabe tobi si ne cadi cayaana dxí cabe de iníꞌ né cabe Dios,
laacabe ne caadxi gunaa ne María jñaa Jesús ne ca biꞌchi Jesús.
15 Lade ca dxi que nuu cabe irá cabe tobi si,
biaꞌ ti gayuaa gande cabe.
Oraque biasa Pedru bizuhuaa lade cabe ne na:
16 ―Hermanu caꞌ,
chiqué uníꞌ David ni gudxi Espíritu Santu laa de Judas,
Judas ni uzá niru lú cani yenaaze Jesús que.
Ne yanna ma uca irá ni uníꞌ David que.
17 Guca Judas tobi de laanu ne bini né laanu dxiiñaꞌ.
18 Peru ra bitoo be Jesús ucuaa be vueltu,
ne bixuíꞌ né vueltu que ti layú.
Ne raqué biaba rilú be,
dede ureza ndaani be bireeche doo xquiꞌ be ne guti be.
19 Ora gunna ca binni Jerusalén ni la?
ulee lá ca layú que Acéldama.
Stiidxa ca la?
riníꞌ ni Layú de Rini.
20 Maca cá ni lu Salmo:
Guiaana stubi lidxi be
ne iruti cueza ndaani ni.
Ne laca cá:
Icaa stobi xhiiña be.
21-22 Nga runi cayabe laatu,
hermanu caꞌ,
naquiiñe cui nu stobi chuꞌ jlugar be para sa né laanu güi né binni dxandí biiya ma bibani Señor Jesús de lade gueꞌtuꞌ.
Gaca ni tobi ni uzá né laanu dxi nuu Jesús lade nu,
de dxi guluu nisa Juan laabe para dxi biasa be lade nu ze be ibáꞌ.
23 Para ulí cabe chupa:
tobi lá José ni rabi cabe Barsabás ne Justu,
ne stobi lá Matías.
24 Ne óraque uníꞌ né cabe Dios,
na cabe:
―Señor,
lii runibiáꞌ lu ladxidóꞌ irá binni.
Biluíꞌ laadu uná de iropa hombre ri ma ulí lu
25 para gaca apóstol ne guni dxiiña bisaana Judas.
Purti Judas ma ze jlugar.
26 Oraque biyubi cabe tu luguiá guiaba suerte que ne biaba ni luguiá Matías.
Para biuu lade once apóstol que.