Ra beeda Espíritu Santu
2
Runi ca judíu ti saa,
rabi cabe ni Pentecostés.
Ne dxi biaba laní que nuu ca xpinni Cristu que tobi si lugar.
2 Mala uxidxi biete xiixa de xaibáꞌ casi ora rundubi ti bi yooxhoꞌ.
Bidxá ni ndaani yoo ra nuu cabe que.
3 Ne biiya cabe casi ludxi bele.
Bireeche ni luguiá cada tobi de laacabe.
4 Ne bidxá ladxidóꞌ cabe de Espíritu Santu.
Bizulú uníꞌ cabe adxé adxé idioma casi bisiníꞌ Espíritu Santu laacabe.
5 Dxi uca ni la?
nabeza caadxi binni Jerusalén,
caadxi judíu ni beeda de adxé adxé guidxi,
ne nabé rie ca yuꞌduꞌ.
6 Ora bina diaga ca ruidu que urí zisi ca ra rí ca xpinni Cristu que.
Qué ganna ca xi cayaca purti cada tobi de laaca cayuna diaga diidxa gule né.
7 Bidxagayaa ca ne unaba diidxa saa ca na caꞌ:
―Ñee cadi binni Galilea irá binni ri la?
8 Peru cayuna diaga nu diidxa gule né pe nu.
Xii ndi cayaca pue.
9 Ne cadi tobi si xquidxi cani nuu raríꞌ.
Nuu binni Partia,
binni Media ne binni Elam ne binni Mesopotamia ne binni Judea ne binni Capadocia ne binni Ponto ne binni Asia
10 ne binni Frigia ne binni Panfilia ne binni Egipto ne binni Africa ni nabeza cherica de Cirene,
ne laca nuu binni Roma.
Caadxi de laaca judíu pe laaca casi laanu,
ne xcaadxi la?
cadi judíu peru ma rie yuꞌdu stinu.
11 Laca nuu binni Creta ne binni Arabia.
Peru irá nu cayene nu ni caníꞌ cabe riꞌ de irá enda nandxóꞌ ni biꞌni Dios,
purti cayuna diaga nu ni diidxa gule né pe nu.
12 Cadxagayaa ca binni que,
ne qué ganna ca xi cayaca.
Canaba diidxa saa cabe,
na cabe:
―Xii ndi cayaca pue.
13 Peru nuu tu biꞌni burla,
ma na naxudxi ca xpinni Cristu que.
Ni gudxi Pedru ca binni que
14 Oraque biasa Pedru bizuhuaa,
laa ne sti once apóstol que,
ne uníꞌ ne gana,
na:
―Hombre de Judea caꞌ,
ne cani nabeza Jerusalén,
laucaa diaga ni chi tidxe laatu riꞌ.
15 Cadi naxudxi di ca binni riꞌ casi na tu ca,
purti deru las nueve ndiꞌ,
16 sínuque cayaca ni bicaa profeta Joel chiqué ra na:
17 Na Dios:
“Zadxiña dxi ucheeche Espíritu stinne luguiá stale binni.
Zusinié ca xiñi gaana tu ne ca xiñi dxaapa tu,
ne zuuya cani nahuiini xiixa casi ñaca lu bacaandaꞌ,
ne zanié nia ca binni gola lu bacaandaꞌ.
18 Ca dxi que zucheeche Espíritu stinne luguiá cani runi xhiiñaꞌ,
hombre ne gunaa,
ne zaníꞌ ca ni gabe laacaꞌ.
19 Zune stale enda nandxóꞌ ibáꞌ,
ne zahuinni seña guidxilayú de rini ne bele,
ne ziasa guꞌxhuꞌ.
20 Zacahui lu gubidxa ne zaca beeu naxiñá rini dxi mayaca idxiña dxi udixhe Dios.
Zaca stale cosa de enda ridxagayaa dxi que,
ne zusihuinni Dios enda nandxóꞌ stiꞌ.
21 Ne irá ni inaba gacané Dios laa la?
zalá.”
22 Yanna laucaa diaga ni chi tidxe laatu riꞌ,
binni Israel caꞌ.
Chi güe nia laatu stiidxa Jesús de Nazaret.
Rihuinni Dios biseenda laabe purti laaca tu nanna tu ucané Dios laabe biꞌni be stale milagru ne cosa de enda ridxagayaa ne bisihuinni be seña nezalú tu.
23 Maca nanna Dios xi chi aca be,
ne laatu biꞌni tu ni gudixhe Dios gaca que.
Unaaze tu laabe,
bidii tu laabe ucaa ca binni malu laabe lu cruz.
Ne zacá laatu biiti tu laabe.
24 Peru bisibani Dios laabe,
ulee laabe lu ná enda guti,
purti qué ñanda ñaana né enda guti laabe.
25 Ndi nga ni uníꞌ David chiqué,
ne casi ñaca Jesús caníꞌ ni:
Nanna dxiꞌche qué rusaana Dios naa.
Nuu be para gacané be naa ti cadi chuaa xizaa.
26 Nga runi bidxá ladxiduáꞌ de enda nayecheꞌ
ne biree diidxa sicarú de ruaaꞌ.
Neca gate peru nanna dxiꞌche zandisa be naa.
27 Purti qué zusaana be naa lade gueꞌtuꞌ,
ne qué zudii be lugar guiuꞌdxu cuerpu sti Xiiñi be ni runi ni na be.
28 Biluíꞌ be naa neza enda nabani,
ne nabé rieche purti nuu né be naa.
29 Biche caꞌ,
irá nu nanna nu guti bixhoze gola nu David,
ne bigaachiꞌ,
ne nuu ru xpaꞌ be rarí de yanna.
30 Peru guca be profeta,
ne biluíꞌ Dios laabe ni chi gaca ruꞌ ne bidii stiidxa laabe de lade xfamilia be zaree tobi ni cui de rey casi urí be.
31 Ne casi ñaca biiya be ra bibani Cristu ne uníꞌ be qué ziaana di lade gueꞌtuꞌ ne qué ziuꞌdxu cuerpu stiꞌ.
32 Racá cuzeete be Jesús ni undisa Dios de lade gueꞌtuꞌ,
ne laadu biduꞌya du guca ni.
33 Undisa Dios laabe ne bicuí laabe cueꞌ ne bidii laabe Espíritu Santu casi gudxi laabe zuni.
Ne yanna ma biseenda be Espíritu Santu que raríꞌ.
Nga nga ni cayuuya tu ne cayuna diaga tu ca.
34 Purti qué niguiꞌba David ibáꞌ,
peru laa pe uníꞌ:
Na Dios rabi Señor stinneꞌ:
36 Yanna laganna dxichi,
binni Israel caꞌ,
Jesús ni bicaa tu lu cruz que nga ma biꞌni Dios xaíque sti iráꞌ,
ne ma biluíꞌ laanu laabe nga Cristu ni ulí que.
37 Ora bina diaga cabe xi na Pedru,
ucaná ladxidóꞌ cabe ne rabi cabe Pedru ne xcaadxi apóstol que:
―Yanna xi guni du yaꞌ,
bichi caꞌ.
38 Para na Pedru rabi laacabe:
―Lainaba perdón Dios ne lachuu nisa para ihuinni ma xpinni Cristu laatu.
Zacá zaca perdonar ni huachee tu ne zudii Dios laatu Espíritu Santu.
39 Purti laatu nexhe icaa tu Espíritu Santu,
laatu ne ca xiiñi tu ne irá ni nuu zitu,
cani cuidxi Señor Dios stinu che ra nuu.
40 Byuíꞌ né ru Pedru laacabe stale diidxa ne bilidxe laacabe,
ne na rabi laacabe:
―Lauyubi ulá Dios laatu de lade ca binni nuu yanna riꞌ,
ti cadi initilú tu ra chi initilú cabe.
41 Ne cani ucuaa stiidxa be la?
uyuu nisa,
ne biaꞌ chonna mil binni bini cre Cristu dxi que.
42 Ne irá cabe yenanda cabe ni bisiidi ca apóstol,
ne uyuu cabe tobi si,
tobi si uníꞌ né cabe Dios,
ne tobi si gudó cabe pan casi bisaana Señor guni cabe.
Modo bibani ca xpinni Cristu
43 Irá binni guidxi que bidxagayaa ra biiya irá milagru ne seña ni biꞌni ca apóstol pur enda nandxóꞌ sti Dios.
44 Tobi si uyuu irá cani bini cre Cristu ne tobi si gupa ca sticaꞌ.
45 Bitoo cabe layú stícabe ne irá ni napa cabe ne biaazi ni lú irá cabe.
Cada tobi gucuaa biaꞌ caquiiñeꞌ.
46 Irá dxi rie cabe ra yuꞌdu roꞌ ne de raqué riree cabe ritó cabe gueta,
caadxi caadxi ralidxi cada tobi.
Tobi si nuu cabe ne nabé rieche cabe.
Iruti nudxiiba laca laa,
47 sínuque irá cabe bisisaca cabe Dios.
Ne irá binni guidxi que uyuulaꞌdxi modo cayuni cabe.
Ze dxi jma rusi zidale cabe purti culá Señor stale binni ne irá ca cayuu ca lade cabe.