Dios runi jneza
2
Yanna lii,
hombre,
pur irá ni bina diaga lu ca,
cadi ulabi lu tutiica naca luꞌ,
purti qué gapu xidé udxiiba lu donda ique stobi.
Pa udxiiba lu ni luguiá stobi la?
laca luguióuꞌ guiaana ni,
purti ni cudxiiba lu luguiá stobi que,
ngue ca ruꞌnuꞌ.
2 Laanu nanna dxichi nu,
Dios runi jneza rudxiiba donda luguiá cani runi ca nga.
3 Ne lii,
hombre,
pa rudxiibu donda luguiá stobi ni cayuni cani,
ne zaqueca cayuꞌnu la?
ñee ruzulú lu luguiá si be udxiiba Dios donda,
ne cadi luguiá lu la?
4 Purti si ruuya lu nabé nachaꞌhui Dios ne rudii lugar uchiichi cabe laa,
ne qué rixhacalaꞌdxiꞌ,
nga runi qué ridxibi lu laa la?
ñee caꞌru udiiu cuenta xi pur cadi caxhacalaꞌdxi be la?
Cabeza be tílasi chuꞌ dxi iguudxi ladixdóꞌ loꞌ.
5 Peru lii,
naguidxi ladxidóꞌ lo ne cadi cayuꞌnu pur iguudxi ni.
Ngue runi cutopa lú lu stonda lu para dxi cuidxi be cuenta binni,
purti zabi be laaca xi huayuni caꞌ.
6 Zaguixe be cada tobi biaꞌ biꞌniꞌ.
7 Zudii be enda nabani ni qué zaluxe irá cani qué ixhacalaꞌdxi de guni jneza,
cani ucaa ique guni ni chuꞌlaꞌdxi be,
ne uyubi ni dxandí risaca ne ni qué ziuu dxi initilú.
8 Peru zadxiichi né be cani riulaꞌdxi utinde binni.
Zusaba ná be laacaꞌ,
purti qué ninanda ca ni jneza,
laga ni cadi jneza yenanda caꞌ.
9 Ziuu enda naná ne yuuba para ca judíu ni qué ñuni jneza,
ne zaqueca para cani cadi judíu ni qué ñuni jneza.
10 Peru ca judíu ni guni jneza la?
zusisaca be laacaꞌ,
ne zieche né be laacaꞌ ne zaguixhe dxí be ladxidóꞌ caꞌ,
ne zaqueca cani cadi judíu ni guni jneza.
11 Purti nezalú be biaꞌca risaca irá binni.
12 Irá cani bichee sin ñanna ley ni bidii Dios Moisés la?
zanitilú sin ley.
Ne zaqueca irá cani bichee ma nanna xi na ley la?
zaguiꞌba donda ique pur ley.
13 Purti cadi nayá ladxidóꞌ binni nezalú Dios tisi nanna ley,
sínuque nayá ladxidóꞌ ca pa guni ca ni na ni.
14 Laguuya cani cadi judíu.
Qué gapa di cabe libru sti ley,
peru pa guni cabe jneza casi na ley la?
ngue ma de laasi cabe napa cabe ley neca iruti nudii ni laacabe.
15 Zacá rihuinni ma napa cabe ley ndaani ladxidóꞌ cabe.
Stubi stubi cabe ranna cabe uná nga jneza ne uná nga ni cadi jneza,
ne xquenda biaani cabe rusiene laacabe pa nayá ladxidóꞌ cabe o pa coꞌ.
16 Ne laca zacá nga chi aca ni dxi usihuinni Dios irá ni gaꞌchi ndaani ladxidóꞌ binni,
ne zuni né be ni Jesucristu.
Zacá na stiidxa Cristu ni canayué riꞌ.
Ca judíu ne ley sti Moisés
17 Peru lii nouꞌ judíu lii,
ne cá lú lu ley ni bidii Dios Moisés,
ne raca lu nayá purti na lu nuu né Dios lii.
18 Ruzulú lu ma nannu xii nga racalaꞌdxi Dios,
ne nouꞌ riene lu xii nga jma jneza purti rusiidi ley ni lii.
19 Lii nouꞌ rinaazu ná cani nacheepa lú ne rinéu biaani para cani canazá lu guelacahui.
20 Riulaꞌdxu usiidi lu cani qué ganna gastiꞌ ne usiene lu cani qué riene,
purti lii nannu xi na ley sti Moisés ni rusiidi irá ni naquiiñe ganna binni ne irá ni dxandíꞌ.
21 Yanna lii,
rusiidi lu stobi,
xiñee qué usiidi lu laca lii yaꞌ.
Raꞌbu laacabe cadi cuana cabe,
peru lii ribaꞌna luꞌ.
22 Lii nouꞌ cadi chuꞌ né cabe ni cadi xheela cabe,
peru lii ruꞌnu ni.
Ridxiichi lu purti napa cabe bidóꞌ,
peru rindana lu ra yuꞌdu sti ca bidóꞌ que.
23 Lii raca lu nayá purti nannu ley,
peru qué ruꞌnu ni na ni,
ne zacá runi lu menu Dios.
24 Casi na lu Xquiꞌchi Dios:
“Runi laatu riguu dí cani cadi judíu Dios.”
25 Laatu naca tu judíu ne lu xcuerpu tu riruugu tindaa casi ti seña huandí naca tu xpinni Dios.
Seña ca nga ni rabi cabe circuncisión,
ne zaquiiñe ni lii peru pa guꞌnu ni na ley ni bidii Dios Moisés.
Peru pa qué guꞌnu ni na ley que la?
zeda gaca lu casi tobi ni qué nicaa circuncisión,
neca ma napu seña que lu xcuerpu luꞌ.
26 Ngue runi pa chuꞌ tobi hombre ni qué nicaa circuncisión,
peru laa runi ni na ley,
ñee qué zudii ni casi ñaca ma ucuaa be seña ni napa lu ca la?
27 Ne ni qué nicaa circuncisión lu xcuerpu peru runi ni na ley sti Dios la?
zuchá ni lú lu purti lii nannu ley ne ucuaa lu seña sti Dios,
peru qué ruꞌnu ni na ley que.
28 Ni naca judíu de luguiá si la?
cadi dxandí ni laa.
Ne zaqueca ni napa circuncisión luguiá si xcuerpu la?
qué riquiiñe ni laa.
29 Ndi nga laani:
ni dxandí judíu la?
dede ladxidóꞌ naca ni.
Ne ni dxandí ucuaa circuncisión la?
ucuaa ni de idubi ladxidóꞌ,
purti ucuaa ni de Espíritu sti Dios ne cadi purti si cá ni lu ley,
ne cuyubi ca isaca ca nezalú Dios ne cadi nezalú binni.