Diuxi
16
Cuseenda hermana Febe ra nuu tu.
Runi be dxiiña lade cani runi cre Cristu ni nuu ndaani guidxi Cencrea.
2 Lauchagalú laabe casi naquiiñe guni nu irá xpinni Cristu,
purti nadxii tu Señor,
ne lagacané laabe intiica iquiiñe be,
purti laabe huayacané be stale hermanu ne laca huayacané be naa.
3 Laudii diuxi hermanu Aquila ne Priscila,
xheelaꞌ.
Biꞌni né cabe naa xhiiña Cristu Jesús.
4 Qué ña cabe xpida cabe pur naa.
Rudiee diuxquixe laacabe,
ne cadi naa siaꞌ sínuque ne irá ca hermanu ni cadi judíu.
5 Laca laudii diuxi cani rie cultu ralidxi cabe.
Laudii diuxi Epeneto,
xhamigua ni nadxieeꞌ.
Laabe nga primé ni biyubi neza sti Cristu lade cani nuu Asia.
6 Laudii diuxi María ni nabé huayuni né laatu dxiiñaꞌ.
7 Laudii diuxi Andrónico ne Junias,
ca binni xquidxeꞌ,
cani uyuaa nia ndaani lidxi guiibaꞌ.
Laacabe risaca cabe lade ca apóstol,
ne maca bini cre cabe Cristu dxi bine cre.
8 Laudii diuxi Amplias,
xhamigua ni nadxiee pur Señor.
9 Laudii diuxi Urbano ni biꞌni né laadu dxiiña sti Cristu Jesús ne Estaquis,
xhamigua ni nadxieeꞌ.
10 Laudii diuxi Apeles ni runi jneza nezalú Cristu.
Laca laudii diuxi ca lisaa Aristóbulo.
11 Laudii diuxi Herodión,
binni xquidxeꞌ,
ne cani ma bini cre Cristu de lade ca lisaa Narciso.
12 Laudii diuxi hermana Trifena ne hermana Trifosa ni runi xhiiña Señor,
ne zaqueca hermana Pérsida ni nadxii nu.
Nabé huayuni be xhiiña Señor.
13 Laudii diuxi Rufo ni risaca nezalú Señor,
ne laca laudii diuxi jñaa be.
Laa gupa naa chiqué casi xiiñiꞌ.
14 Laudii diuxi Asíncrito,
Flegonte,
Hermas,
Patrobas,
Hermes,
ne ca hermanu ni nuu né laacaꞌ.
15 Laudii diuxi Filólogo ne Julia,
ne Nereo ne bizaꞌnaꞌ,
ne Olimpas,
ne irá ca xpinni Cristu ni nuu ra nuu caꞌ.
16 Hermanu caꞌ,
laugapa diuxi saa ne laquidxi saa purti ma biꞌni Cristu laatu hermanu.
Irá xpinni Cristu ruseenda ca stiuxi tu.
17 Hermanu caꞌ,
rinaba laatu guꞌya gá tu cani rindaa saa laatu,
ne cani runi pur uxhale laatu de ni ma biziidi tu.
Laguixele de laacabe,
18 purti laacabe cadi xhiiña Jesucristu cayuni cabe,
sínuque cayuni cabe ni para guni ganar si cabe.
Nabé nanaxhi ruaa cabe,
ne puru diidxa nadóꞌ riníꞌ cabe ora ma nuu cabe ra nuu cani huaxiéꞌ riene.
19 Ma nanna binni irá ladu pabiáꞌ huazuuba tu diidxaꞌ ne rieche nia laatu,
peru racaladxe chuꞌ xpiaani tu luguiá enda nachaꞌhui ne gaca tu huaxiéꞌ para enda nadxabaꞌ.
20 Dios riguixhe dxí ladxidóꞌ no ne laca nagueenda zaguixhe dxí binidxaba xa ñee tu.
Jesucristu Señor stinu gaca nachaꞌhui ne laatu.
21 Ruseenda Timoteu ni rune nia dxiiña stiuxi tu,
ne zaqueca ca lisaa Luciu,
Jasón ne Sosípater,
ca binni xquidxeꞌ.
22 Naa nga Terciu ni bicaa lu guiꞌchi riꞌ ni uníꞌ Pablu,
ne laca cuseenda stiuxi tu pur Señor.
23 Ralidxi hermanu Gayo nuaaꞌ.
Nabé riguu be cani runi cre ndaani lidxi be.
Laca ruseenda be stiuxi tu.
Zaqueca laicaa stiuxi Erasto ni naca tesorero sti guidxi riꞌ,
ne hermanu Cuarto.
24 Jesucristu Señor stinu cuꞌ ndaaya laatu.
Amén.
Usisaca nu Dios
25 Naquiiñe usisaca nu Dios,
ti laa zanda uzuhuaa chaahui laatu.
Zacá na evangeliu ni rue riꞌ,
ne laca laani nga stiidxa Jesucristu.
Biaana evangeliu ri ra nagaꞌchi xadxí,
peru ma bisihuinni Dios ni yanna.
26 Ca guiꞌchi ni bicaa ca profeta que ucuá cani modo na Dios ni qué ziuu dxi gatiꞌ,
ne rusiidi cani irá binni guni cre ca laabe ne guni ca ni na be.
27 Tobi lucha Dios nga riene chaahui irá cosa,
ne qué ziuu dxi guiaana dxí de usisaca cabe laa pur Jesucristu.
Amén.