Cada tobi guni ni chuꞌlaꞌdxi stobi
15
Laanu pa ma zuhuáꞌ dxiichi nu la?
cadi ixhacalaꞌdxi nu de acané nu ca hermanu ni huaxiéꞌ ru riene,
ne cadi guni nu ni chuꞌlaꞌdxi si nu,
2 sínuque guni nu ni chuꞌlaꞌdxi stobi,
ti acané nu laa uzuhuaa chaahuiꞌ.
3 Nin Cristu qué ñuni di ni gucalaꞌdxi laa si,
casi cá lu Xquiꞌchi Dios ra na be rabi be Dios:
“Luguiaꞌya biaba stiidxa cani uluu dí lii.”
4 Laganna dxichi:
irá ni ucuá lu Xquiꞌchi Dios ucuá para usiidi laanu,
ti pur laani gata dxí ladxidóꞌ no ne cadi ixhacalaꞌdxi nu.
Ne zacá cadi guiaana nu de icá lú nu Dios.
5 Dios nga runi pur qué ixhacalaꞌdxi nu ne rusieche laanu,
ne laca laa guni laatu tobi si ra chi nanda tu ejemplu sti Cristu.
6 Ne óraque irá tu zusisaca tu Dios Bixhoze Jesucristu Señor stinu,
ne zuni tu ni juntu casi ñaca tobi si caníꞌ.
Bireeche stiidxa Dios lade cani cadi judíu
7 Hermanu caꞌ,
cadi udxii deche saa tu ti ganda usisaca tu Dios,
casi qué nudxii deche Cristu laatu.
8 Cayabe laatu,
beeda Cristu Jesús casi ti mozo sti ca judíu ti gaca ni bidii stiidxa Dios ca bixhoze gola caꞌ,
ne zacá usihuinni be runi Dios ni ma uníꞌ.
9 Peru laca beeda be para udii cani cadi judíu diuxquixe Dios purti ma bilaselaꞌdxi laacaꞌ.
Casi cá ni lu Xquiꞌchi Dios ra na:
Zusisaca lii lade cani cadi judíu
Ne zudxiiba lii ra guunda cantu.
10 Ne cá sti lugar:
Binni ni cadi judíu caꞌ,
laguieche né cani maca xpinni Dios.
11 Ne nuu ru sti lugar ra cá:
Irá xixé guidxi zusisaca Señor
ne irá xixé binni zaníꞌ pabiáꞌ nandxóꞌ be.
12 Ne laca cá ni uníꞌ profeta Isaías:
De xcu Isaí zaree ni guni mandar cani cadi judíu,
ne zacá lú ca laabe.
13 Dios nga racané laanu para ganda icá lú nu laa.
Rinaba laabe usieche be laatu ne quixhe dxí be ladxidóꞌ to ra guni cre tu laabe.
Zacá zacané Espíritu Santu laatu ti jma rusi icá lú tu laabe.
14 Hermanu stinne caꞌ,
nanna dxiꞌche nabani tu modo na Dios,
ne nanna ma biziidi tu stale,
ne ma nanna tu acané saa tu.
15 Peru hermanu caꞌ,
cadi caguba naya de ucaa chupa chonna cosa lú tu para usietenaladxe laatu ni maca nanna tu.
Cayune ni purti uníꞌ né Dios naa gune ni.
16 Ulí be naa gune xhiiña Jesucristu lade cani cadi judíu,
ne cusiide laaca de evangeliu sti Dios,
ti ora ma biꞌni Espíritu Santu laaca nachaꞌhuiꞌ,
udiee laaca Dios casi ti ofrenda ni chuꞌlaꞌdxi icaa.
17 Ñanda ca nuchaya enda naróꞌ stinne pur irá dxiiña sti Dios ni huayuni né Cristu naa.
18 Peru ridxibe cuaa ruaa xiixa adxé jma que ca dxiiña ni ucané Cristu naa bine lade cani cadi judíu para uzuuba ca stiidxa Dios.
Biquiiñe be ni unié ne ni bine para biꞌni be ni.
19 Uyuu né enda nandxóꞌ sti Espíritu Santu naa para gunda bine seña ne milagru.
Ne zaqué biree de Jerusalén bidiee vuelta dede yendaya Ilírico.
Idubi neza que ma bisiide chaahue stiidxa evangeliu sti Cristu.
20 Purti ndi nga ruluiꞌladxe guneꞌ:
güe de evangeliu,
peru ra caꞌru guna diaga cabe de Cristu,
ti cadi indisa yoo ra ma undaa stobi.
21 Racaladxe gune casi cá lu Xquiꞌchi Dios ra na:
Ra qué huayuu dxi guiete stiidxa be,
zaziidi caꞌ,
ne ra qué huayuna diaga ca de laabe,
ziene caꞌ.
Ra cá ique Pablu che Roma
22 Pur nga runi qué ñanda ñaa ra nuu tu neca gupa gana.
23 Peru yanna huaxa ziaa purti ma qué gapa ra gune dxiiña ladu riꞌ,
ne purti ma xadxí huayacaladxe chaa ra nuu tu.
24 Ngue runi ziaa ora ma nuaa neza chaa España.
Purti racaladxe guuya laatu ora tideꞌ,
ti izaca laatu caadxi ne guieche ladxiduáꞌ,
ne de raqué chi ndee tu naa neza.
25 Peru yanna ri chaa Jerusalén chi gacaniá ca xpinni Cristu ni nuu raqué.
26 Purti uníꞌ stiidxa ca hermanu de Macedonia ne de Acaya utopa ca vueltu para cani caquiiñe ni nuu lade ca xpinni Cristu Jerusalén.
27 Biluiꞌlaꞌdxi cabe guni cabe ni,
ne huandí nuzaabi cabe laaca xiixa.
Purti pur laaca ucuaa cabe ni acané xhialma cabe.
Yanna ma zanda acané cabe laaca de ni caquiiñe caꞌ.
28 Nga runi ora ma yesaana vueltu ri ra nuu cabe la?
ziganna laatu ora tide chaa España.
29 Ne naa nanna ora chaa ra nuu tu la?
ziniá stale diidxa ni usieche laatu lu evangeliu sti Cristu.
30 Hermanu caꞌ,
rinaba laatu iníꞌ né tu Dios pur naa.
Zacá zanda acané tu naa.
Canaba ni laatu purti xpinni Cristu laatu ne purti zuluiꞌlaꞌdxi tu guni tu ni pur amor ni rudii Espíritu Santu laanu.
31 Lainaba lú be ilaꞌya lu ná cani qué runi cre ni nuu Judea,
ne laca lainaba pur ni chi saana ra nuu ca xpinni Cristu ni nuu Jerusalén,
ti chuꞌlaꞌdxi cabe icaa cabe ni.
32 Zaqueca lainaba pa na Dios chi ndaya ra nuu tu ne stale enda nayecheꞌ,
ti ganda iziiladxe caadxi lade tu.
33 Dios ti nga riguixhe dxí ladxidóꞌ binni,
ne yanna laa chuꞌ né irá tu.
Amén.