Iruti iníꞌ hermanu stiꞌ
14
Pa nuu ti hermanu huaxiéꞌ napa fe la?
laicaa laa lade tu,
peru cadi uchá tu ni lú.
2 Purti nuu de ca xpinni Cristu ni runi cre zanda go intiisi,
peru laca nuu cani qué riná go intiisi purti huaxiéꞌ ru fe stiꞌ.
3 Peru ni ro intiisi la?
cadi udxii deche ni qué na go intiisi,
ne zaqueca ni qué na go intiisi cadi gaꞌni ná ni ro intiisi,
purti laca xpinni Dios laa.
4 Lii tu naca lu para udxiiba lu donda ique xpinni stobi.
Xpixuaana be nga iníꞌ pa cayuni be jneza o pa cuchee be.
Ne ca xpinni Cristu zuzuhuaa chaahui pe ca purti zuzuhuaa chaahui Cristu laacabe.
5 Nuu tu na jma nandxóꞌ ti dxi,
que sti dxi,
ne nuu tu na igual irá dxi.
Cada tobi chi nanda ni rabi ladxidóꞌ laa jneza.
6 Purti ni na jma nandxóꞌ ti dxi la?
runi ni para Señor;
ne zaqueca ni na igual irá dxi,
laca para Señor runi ni.
Ne ni ro intiisi la?
runi ni para usisaca Señor,
purti rudii diuxquixe Dios pur endaró que.
Ne ni qué riná go intiisi la?
runi ni para usisaca Señor,
ne laca rudii diuxquixe Dios.
7 Nin tobi de laanu cadi nabani nu para laasi nu,
ne nin tobi qué zati para laa si.
8 Pa nabani nu la?
nabani nu para Señor,
ne pa gati nu la?
zati nu para Señor.
Nga runi pa ibani nu o pa gati nu,
sti Señor laanu.
9 Pur nga ca runi guti Cristu ne bibani,
ne nabani de yanna ti gaca Señor sti iráꞌ,
cásica ni ma guti zaqueca ni nabani.
10 Peru lii,
xiñee rudxiiba lu donda ique hermanu stiuꞌ,
ne xiñee rudxii deche lu laa.
Lácaxa cadi irá xixé nu napa nu xidé uzuhuáꞌ nu nezalú Cristu.
11 Purti sicarí cá ni lu Xquiꞌchi Dios:
Naa nga Dios ni nabani ne naa cayabe ndi laatu:
Zadxiña dxi guzuxibi irá xixé binni xañeeꞌ,
ne de irá ca zanna ca naa nga Dios.
12 Zacá nga laani,
cada tobi nu zabidxi Dios cuenta laanu.
Iruti uchenda hermanu stiꞌ
13 Nga runi cadi jneza udxiꞌba saa nu donda ique nu,
sínuque uyubi nu cadi gaca nu casi xiixa ni irenda ñee hermanu stinu,
ti cadi pur laanu guiaba.
14 Nanna dxiꞌche qué zuchéꞌ né nu Dios pa idóꞌ no intiisi endaró,
ne nanna ni purti ma xpinni Cristu naa.
Peru pa nuu ti hermanu para laa ruluíꞌ cadi jneza go intiisi la?
cadi jneza ni para laa.
15 Ne pa pur ni go lo guniná lu hermanu stiuꞌ la?
ma cadi cusihuinni lu pa nadxii lu laa.
Guti Cristu pur laabe.
Yanna cadi guꞌnu xiixa ni usaba laabe.
16 Neca para laatu ruluíꞌ jneza ni,
peru pa zaníꞌ binni la?
cadi guni tu ni.
17 Purti nezalú Dios cadi ni go ca xpinni ne ni gue ca nga risaca,
sínuque ni risaca nga guni ca jneza ne chuꞌ ca tobi si,
ne udii ca lugar usieche Espíritu Santu laacaꞌ.
18 Zieche né Dios ni guni xhiiña Cristu zacá,
ne laca ziulaꞌdxi binni guidxilayú modo guni caꞌ.
19 Pur nga runi,
sa nanda nu ni guni laanu tobi si,
ne ni acané iniisi cada tobi.
20 Cadi uchiá lu dxiiña ni biꞌni Dios luguiá stobi pur ni go loꞌ.
Dxandí qué ribee Dios binni de go intiisi,
peru cadi jneza go lo xiixa pa zusaba ni sti hermanu.
21 Cadi jneza go lo beela pa usaba ni hermanu stiuꞌ,
nin gue lu vinu,
nin guꞌnu intiica ni usaba laabe,
nin ni uchenda laabe,
nin ni ucuí sa laabe atrá.
22 Ni runi cre lu jneza guꞌnu la?
biꞌni ni,
peru ora lii siouꞌ ne Dios.
Nayeche nuu ni nanna cayuni jneza.
23 Peru ni go xiixa ne iníꞌ ique zándaca cuchee purti gudó ni la?
ma dxiꞌba donda ique,
purti neca qué ganna pa jneza ni,
peru cayuni ni,
ne intiisi guni cabe zacá la?
cuchee cabe.