Naquiiñe uzuuba binni stiidxa cani runi mandar
13
Naquiiñe uzuuba irá binni stiidxa cani runi mandar ndaani xquidxi,
purti iruti ñuni mandar pa ñaca cadi zeeda ni de Dios,
ne Dios nga gudixhe cani nuu para guni mandar laanu.
2 Nga runi,
tutiica ucaa lú cani runi mandar la?
cucaa lú ni gudixhe Dios,
ne zaguiꞌba donda ique cani guni zaqué ne ziaba ná caꞌ.
3 Purti cadi nuu ca justicia para uchibi ca ni guni jneza,
sínuque ni uchee.
Ne pa racalaꞌdxu cadi idxibi lu justicia la?
biꞌni jneza,
ne ziaanu bien ne laacaꞌ.
4 Purti xhiiña Dios cayuni ca justicia para bien stiuꞌ.
Peru pa uchee lu la?
óraque huaxa zadxibi luꞌ,
purti napa cabe derechu usaba ná cabe lii,
ne cayuni cabe ni na Dios gacaꞌ,
usaba ná cabe cani dxandí cuchee.
5 Nga runi naquiiñe uzuuba tu stiidxa cabe,
cadi purti si ridxibi tu guiaba ná tu,
sínuque laca purti nanna tu jneza ni.
6 Ne laca pur nga ca naquiiñe quixe tu impuestu,
purti laca ni na Dios gacaꞌ nga cayuni cani runi mandar,
ne cayuuya ca guiaxa ni.
Modo ibani xpinni Cristu
7 Laquixe de irá ni nuzaabi tu.
Ra nuzaabi tu manu,
lachigudii manu,
ne ra nuzaabi tu impuestu,
laquixe.
Ni naquiiñe guni respetar tu,
laguni respetar,
ne ni naquiiñe usisaca tu,
lausisaca.
8 Ora ma gudixe tu irá ni nuzaabi tu binni la?
ma riaadxa si ganaxhii tu laacaꞌ.
Ne ora ganaxhii nu stobi la?
cayuni nu ni na ley sti Dios.
9 Purti sicarí na ca mandamientu:
“Cadi chuꞌ neu ni cadi xheeluꞌ,
cadi guuti luꞌ,
cadi cuanuꞌ,
cadi cueeu falsu luguiá binni,
cadi gache lú lu sti stobi.”
Ne pa nuu ru sti mandamientu la?
zuni lu ni na ni pa guꞌnu ni na ca diidxa riꞌ:
“Gunaxhii stobi cásica nadxii lu lii.”
10 Pa nadxii lu stobi la?
qué zuchee neu laa.
Ne ra ganaxhii tu binni ma cayuni tu irá xixé ni na ley.
11 Naquiiñe guni tu irá ca nga,
ne laganna ma ora ireeche bacaandaꞌ,
purti ma zeda yuba dxi gueda caa Dios laanu.
Jma gaxha nuu ni yanna,
cadi casi dxi bini cre nu,
12 casi ñaca ma chi irá gueelaꞌ,
ne ma zeda yaba xpiaani dxi.
Nga runi naquiiñe usaana nu de guni nu ni cadi jneza ni raca lu guelacahui ne chuꞌ nu listu sa nu lu biaaniꞌ.
13 Sa nu jneza casi naquiiñe sa cabe ridxíꞌ.
Cadi sa gueela nu,
nin chuꞌ nu luguiá gunaa,
nin luguiá viciu,
nin tinde nu,
nin guni nu pur gapa nu jma que stobi,
14 sínuque sa né nu Señor Jesucristu ne guni nu ni na,
ne ma cadi uyubi nu guni nu ni na ique nu.