Modo guiaana nu para Dios
12
Nga runi hermanu caꞌ,
pur ma bilaselaꞌdxi Dios laatu,
rinaba udii tu xpida tu laa,
casi ti ofrenda ni nabani ne nayá,
ne ni chuꞌlaꞌdxi icaa.
Zacá ti zanda usisaca tu laa de idubi ladxidóꞌ to.
2 Ne ma cadi chi nanda tu ni na binni guidxilayú,
sínuque laudii lugar uchaa Dios laatu ne cuee irá ni ucuá ique tu chiqué.
Zacá zanna tu xii nga racalaꞌdxi Dios guni tu,
ni nachaꞌhui ne ni chuꞌlaꞌdxiꞌ ne ni jneza peꞌ.
3 Pur enda nachaꞌhui sti Dios biseenda naa gune dxiiña stiꞌ.
Nga runi chi ulidxe cada tobi de laatu,
cadi udxiiba tu laatu jma que biaꞌ naca tu,
sínuque cada tobi guiaana conforme biaꞌ ma naca si que nga laani,
biaꞌ fe bidii Dios cada tobi.
4 Casi ti cuerpu napa stale ndaa,
peru adxé adxé ni runi cada ndaa,
5 zaqueca laanu,
neca stale nu peru ma naca né nu Cristu tobi si,
ne laca ma naca né nu irá hermanu tobi si.
6 Peru adxé adxé gracia bidii Dios cada tobi,
ne bidii si ni laanu.
Nga runi ni napa gracia para güi stiidxa Dios la?
guni ni biaꞌ fe stiꞌ.
7 O ni napa gracia para acané binni la?
nga nga guni.
Zaqueca ni napa gracia para usiidi la?
naquiiñe ucaa ique usiidiꞌ.
8 Ne ni napa gracia usieche binni la?
ngue nga guni.
Ni rudii la?
naquiiñe udii ni de idubi ladxidóꞌ.
Ni napa cargu la?
naquiiñe guni ni sin ichaabaꞌ,
ne ni rudii ná cani caquiiñe la?
guni ni ne enda nayecheꞌ.
Modo ganaxhii saa nu
9 Laganaxhii saa de idubi ladxidóꞌ to.
Laucaa ná ni nadxabaꞌ,
ne lachinanda ni nachaꞌhuiꞌ.
10 Laganaxhii saa casi enda biꞌchiꞌ,
cada tobi usisaca stobi ne cadi laca laa.
11 Cadi ichaaba tu ne cadi aca tu nayanda,
sínuque laguni xhiiña Señor ne stale gana.
12 Laguieche né ni cabeza tu udii Dios laatu.
Cadi ixhacalaꞌdxi tu neca gueeda xiixa enda naná luguiá tu,
ne cadi usaana tu de iníꞌ né tu Dios.
13 Ora caquiiñe ca hermanu xiixa,
lagacané laacaꞌ.
Lauchagalú cani zeeda de sti ladu.
14 Lainíꞌ né Dios pur cani riguu dí laatu,
lainaba lu Dios cuꞌ ndaaya laacaꞌ ne cadi inaba tu mal para laacaꞌ.
15 Laguieche né cani cayecheꞌ,
laguuna né cani cayuunaꞌ.
16 Lachuu tobi si casi zeeda tu.
Cadi gaca tu nayáꞌ,
sínuque laidxaaga tutiica,
neca huaxiéꞌ risaca.
Cadi guni tu laatu ni nuu xpiaaniꞌ.
17 Neca uchee né cabe laatu,
cadi uquixe tu ni laacabe.
Laguni ni jneza si,
ti qué gapa binni xi pur iníꞌ laatu.
18 Laguni biaꞌ ganda para cadi chuꞌ dinde né tu irutiꞌ.
Zaa guni cabe ni laacabe peru cadi né rusi ca laatu.
19 Hermanu ni nadxiee caꞌ,
cadi uquixe tu ni guni cabe laatu,
sínuque lausaana ni lu ná Dios,
purti cá ni lu Xquiꞌchi be ra na be:
Xcuenta nuu ni,
ne naa uquixe ni laacabe.
20 Laatu sicarí laguni:
pa candaana tobi ni nanalaꞌdxi lii,
bidii ni go,
ne pa cayati nisa bidii nisa gueꞌ,
purti ra guꞌnu zacá zusituí lu lú be.
21 Cadi udiiu lugar cuaqui dxí ni nadxaba lii,
sínuque gudixhe dxí ni nadxaba pur ni nachaꞌhuiꞌ.