Biá Dios ca judíu
11
Lagabi naa,
ñee ma bisaana Dios ca judíu,
ca xpinni pe la?
Qué ziuu dxi.
Naa laca judíu naa,
binni Israel.
Zaya de Abraham,
de xfamilia Benjamín.
2 Ne nanna cadi cusaana Dios xpinni,
cani maca ulí dede chiqué.
Ñee qué ganna tu xi na lu Xquiꞌchi Dios ra ruzeete ni Elías la?
Cá ra uluu Elías xqueja ca binni Israel lu Dios,
na:
3 “Señor,
ma biiti cabe ca profeta stiuꞌ ne ma binidé cabe ca altar stiuꞌ.
Yanna ma naa siaꞌ biaanaꞌ,
ne laca racalaꞌdxi cabe guuti cabe naa.”
4 Nga ni uníꞌ profeta Elías,
peru xi gudxi Dios laabe óraque.
Na Dios:
Neca ma biꞌni cabe irá nga,
peru ma ulee chua gadxe mil hombre para naa,
cani caꞌru uzuxibi xañee bidóꞌ Baal.
5 Nga ni guca chiqué,
peru yanna ri laca riaana ru caadxi judíu ni ulí Dios pur enda nachaꞌhui stiꞌ.
6 Ulí be laaca purti guca be nachaꞌhui ne laacaꞌ,
ne cadi pur ni biꞌni caꞌ.
Pa ñaca nibí be laaca pur ni biꞌni ca la?
ma cadi enda rilaselaꞌdxi di nga.
7 Xi riaana xa ni yaꞌ.
Cadi idubi guidxi Israel gucuaa ni biyubi,
peru cani ulí Dios la?
ca ngue huaxa ucuaa caꞌ,
ne ca xcaadxi que jma rusi biguidxi ladxidóꞌ.
8 Casi na lu Xquiꞌchi Dios:
Bisicahui Dios xquenda biaani caꞌ,
ne biꞌni lú ca para ma qué niná caꞌ,
ne diaga ca para ma qué ñuna diaga caꞌ,
ne zaqué nuu ca de yanna.
9 Ne laca uníꞌ Dios de ruaa rey David,
na:
Gaca ca saa stícabe trampa para usaba laacabe.
Ne gaca cani casi xiixa irenda ñee cabe,
ne pur laacani guiaba ná cabe.
10 Ne icheepa lú cabe para qué guꞌya cabe,
ne iguude deche cabe para ma qué ganda indisa ique cabe.
Ca judíu ne cani cadi judíu
11 Nga ni uníꞌ rey David chiqué,
peru naa rabe sicaríꞌ:
Ñee birenda ñee ca judíu para biaba ca ca la?
Coꞌ,
sínuque ndi nga laani:
ra qué nuzuuba cabe diidxa la?
gunda bilá cani cadi judíu,
ti gache lú cabe ora guꞌya cabe laacaꞌ.
12 Ne pa gucané enda ruchee sti ca judíu irá binni guidxilayú,
ne gucané ra biaba cabe para biasa cani cadi judíu la?
lágaxa ora ibigueta pe cabe jlugar cabe sti tiru.
Jma rusi xa.
13 Canié nia laatu cani cadi judíu caꞌ,
purti naa nga apóstol sti cani cadi judíu,
ne rusisaca xhiiñaꞌ,
14 ti racaladxe gache lú ca binni xquidxeꞌ,
tílasi zacá ilá caadxi de laacaꞌ.
15 Purti ra bicaa ná Dios ca judíu,
uyuu né idubi guidxilayú tobi si,
ne pa zacá ni la?
xi gaca xa dxi uxhale ná be para ca judíu sti tiru yaꞌ.
Zeda gaca ni casi ra ibani ni ma guti.
16 Pa gucuaa Dios cani uzá niru la?
zaqueca zacaa cani nanda atrá.
Zanda quixhe nu ti yaga casi ejemplu.
Pa nazaaca xcu yaga la?
laca nazaaca ca rama.
17 Peru gabi nu bidxiña dxi bigá caadxi rama sti ti yaga olivo chaꞌhuiꞌ,
ne ra biree ca rama sti pe ni que,
uluu cabe rama sti ti yaga olivo guiꞌxhiꞌ.
Ca rama bigá que zeda gaca casi ca judíu,
ne ca rama olivo guiꞌxhi que nga laatu,
cani cadi judíu.
Ma nuu tu lu yaga olivo que,
ne cacaa tu de irá ni zeeda de xcu yaga que.
18 Peru cadi gaca tu nayá né ca rama ni bigá que.
Purti ante uchá tu enda naróꞌ stitu la?
naquiiñe guietenalaꞌdxi tu cadi laatu naaze tu xcu que,
sínuque xcu que naaze laatu.
19 Zándáca na tu:
“Peru bigá ca rama que para uyúꞌ du.”
20 Dxandí bigá cabe purti qué ñuni cre cabe,
ne laatu ma uluu Dios laatu purti bini cre tu Cristu.
Nga runi cadi gaca tu nayáꞌ,
sínuque laguuya gá laatu.
21 Purti pa qué ñá Dios ca rama sti pe yaga que la?
nin ca laatu qué ziáꞌ.
22 Laguuya pabiáꞌ nachaꞌhui Dios,
peru laca naduxhuꞌ.
Purti naduxhu né be cani bichee,
peru nachaꞌhui be para laatu pa qué ixele tu de enda nachaꞌhui stibe.
Pacaa la?
laca zagá tu.
23 Ne ca judíu laca ziuu ca pa na ca guni cre caꞌ,
purti nandxóꞌ Dios ne zanda cuꞌ laacabe sti tiru.
24 Pa biruugu tu de lu yaga olivo guiꞌxhi ra undani pe tu,
ne beda chuu tu lu yaga olivo chaꞌhui ra qué nindani tu la?
lágaxa cani undani pe lú ni,
jma rusi qué igana ibigueta ca lu yaga sti pe caꞌ.
Rilaselaꞌdxi Dios irá binni
25 Hermanu caꞌ,
chi güe nia laatu xiixa ni deru cusihuinni Dios,
ne racaladxe guiene chaahui tu ni,
para cadi udxiiba tu laca laatu.
Dxandí ma biguidxi ladxidóꞌ caadxi de ca binni Israel laga si ilá ca binni ni cadi judíu,
biaꞌ maca nexhe ilá.
26 Ne sicarí nga ilá idubi guidxi Israel,
casi cá lu Xquiꞌchi Dios,
ra na:
De ndaani guidxi Sion zeeda tobi ni ulá,
zeda ndee ni nadxaba lade cani za de Jacob.
27 Zacá nga bidiee stiidxa laacabe
zuxhaya ca xpecadu cabe.
28 Ra qué nicaa ca judíu evangeliu,
bixele Dios de laaca para guyuu né laatu tobi si.
Peru nadxii ru laacabe pur ca bixhoze gola cabe ni ulí dede chiqué.
29 Purti qué zuchaa Dios ni ma uníꞌ.
Pa ma uluu ndaaya ne ma guridxi la?
qué ziuu dxi udxiguetaꞌ.
30 Laatu laca qué nuzuuba tu stiidxa be chiqué,
peru yanna ma calaselaꞌdxi be laatu purti ma bichee ca judíu.
31 Ne zaqueca yanna cuchee cabe ti laca ilaselaꞌdxi Dios laacabe cásica biꞌni né laatu.
32 Purti laa pe bisaana irá xixé binni lu ná enda ruchee ti ilaselaꞌdxi irá cabe.
33 Nabé riene Dios,
iruti ru nuu xpiaani biaꞌ nuu xpiaani be,
ne iruti ru riene biaꞌ riene be.
Qué zanda di ganna nu xi na xquenda biaani be nin guiene nu xi cayuni be.
34 Casi cá lu Xquiꞌchi be,
ra na:
Tu laa zanda ganna xi chi guni Señor,
o tu bisiene laabe.
35 Zanda xa udíꞌ nu laabe xiixa
ne óraque ru cueza nu quixe be laanu pur ni bidíꞌ nu que.
36 Purti irá xixé zeeda de laabe,
ne pur laabe nuu irá ni,
ne para laabe.
Ne qué ziuu dxi guiaana dxí de isaca be.
Amén.