10
Hermanu caꞌ,
ni nusieche ladxiduáꞌ nga nilá ca binni Israel,
ne rinaba lu Dios gaca ni.
2 Ruuya dxandí rucaa ique cabe guni cabe ni na Dios,
peru cuchee cabe modo na cabe guni cabe ni.
3 Purti qué riene cabe ximodo na Dios uxhá stonda binni,
lágala ruyubi cabe ixá stonda cabe modo na cabe,
ne zacá ma qué na cabe guni Dios ni modo na.
4 Dede beeda Cristu ma qué riquiiñe ley,
purti cadi ra guni cabe ni na ley nga ixá stonda cabe,
sínuque ra guni cre cabe laabe.
Tutiica inaba lu Señor ilá, zalá
5 Sicarí bicaa Moisés,
na:
“Cani cuyubi ilá pur guni ni na ley la?
napa xidé guni irá xixé ni na ni,
pacaa qué zalá.”
6 Iruti zanda guni irá ni na ley sin uchee,
peru zalá ra guni cre Cristu.
Nga runi ma cadi naquiiñe iníuꞌ ndaani ladxidóꞌ loꞌ:
“Zanda xa quiba binni ibáꞌ para chi yubi modo ilá.”
Purti pa niguiꞌba lu ibáꞌ la?
nga casi ñaca cuyubi lu indete lu Cristu de raqué.
Cadi xa ma biete be ti tiru,
beda ulá be laanu.
7 Ne zaqueca cadi ma caníꞌ ique luꞌ:
“Zanda xa guiete binni xaguete para chi yubi ixá stonda.”
Pa ñete lu xaguete la?
nga casi ñaca cuyubi lu indisa lu Cristu de lade gueꞌtuꞌ.
Cadi xa ma biasa be.
8 Ne zándaca na luꞌ:
“Paraa idxela modo ilaꞌya pue.”
Zadxeꞌlu ni pa guni cre lu ca diidxa ni canayuí du riꞌ,
ne gaxha doꞌ rigaa ca diidxa ca laatu.
Nuu ca cani ndaani ruaa tu ne ndaani ladxidóꞌ to.
9 Purti pa iníꞌ lu Jesús nga xpixuaana irá xixé,
ne guni cre lu de idubi ladxidóꞌ lo dxandí undisa Dios laabe de lade gueꞌtu la?
zalá luꞌ.
10 Purti ndaani ladxidóꞌ cabe runi cre cabe para ixá stonda cabe,
ne ra iníꞌ cabe ni nezalú binni la?
zalá cabe.
11 Sicarí na lu Xquiꞌchi Dios:
“Zuni be irá ni uníꞌ be para tutiica guni cre laabe.”
12 Ti Dios si nuu para irá xixé,
ne nezalú be biaꞌca risaca ca judíu,
biaꞌ queca risaca cani cadi judíu.
Nga runi de lu irá ni napa be zudii be tutiisi inaba laabe.
13 Purti zacá cá lu Xquiꞌchi be:
“Tutiica inaba lu Señor ilá la?
zalá.”
14 Peru qué zanda inaba ca ulá be laaca pa caꞌru guni cre ca laabe.
Ne qué zanda guni cre cabe tobi ni qué huayuu dxi guna diaga cabe stiidxaꞌ.
Ne qué zanda guna diaga cabe ni pa qué chuꞌ tu güi né ni laacabe.
15 Ne qué zanda chuꞌ tu güi né ni laacabe pa iruti useenda laa.
Casi cá ni lu Xquiꞌchi Dios:
“Dunabé sicarú ni cayuni ni canayuíꞌ de evangeliu ni rusieche binni.
Purti diidxa galán nga canayuíꞌ cabe.”
16 Peru neca guna diaga cabe ni,
cadi irá cabe zacaa cabe ni.
Casi na profeta Isaías:
“Señor Dios,
iruti ñuni cre ni byuí du.”
17 Peru riale fe ra guna diaga cabe stiidxa Cristu,
ne zuna diaga cabe ni ora chuꞌ tu güi né ni laacabe.
18 Peru naa rabeꞌ:
Ñee cadi ma bina diaga cabe ni la?
Ma pue.
Purti sicarí cá lu Xquiꞌchi Dios:
Ma yendá stidxi cabe irá guidxi,
ne ma bireeche stiidxa cabe dede ra bidubi guidxilayú.
19 Casi cayabe laatu ca:
Ñee cadi ma biene ca binni Israel ni la?
Purti laca cá lu Xquiꞌchi Dios ra bizeete Moisés ni uníꞌ Dios:
Naa zune pur gache lú tu ora guꞌya tu ni chi gune para ca xcaadxi binni ni caꞌru gaca ti guidxi.
Zune pur idxiichi tu pur ti guidxi ni qué lica riene.
20 Ne laca cá lu Xquiꞌchi Dios ra bisiá chaahui Isaías stiidxa Dios:
Cani qué nuyubi naa bidxela ca naa,
ne cani qué ninaba diidxa naa,
uyaa ra nuu caꞌ.
21 Peru ora ruzeete be binni Israel,
na be:
“Idubi dxi bixhale naya para ti guidxi ni qué nuzuuba stiidxaꞌ,
ne ni bicaa lú naa.”