Dios ulí ca judíu
9
Nuu né Cristu naa,
ne nga runi nanna canié ni dxandíꞌ.
Nanna dxiꞌche cadi cusiguiee diaꞌ,
ne nga ca rabi Espíritu Santu naa.
2 Nuaa triste ne qué ganda iree yuuba ndaani ladxiduáꞌ.
3 Tantu cá ique ca judíu,
ca binni xquidxeꞌ,
ñacaladxe piaꞌ niree de Cristu ne niniteluáꞌ,
tílasi zacá ma ñuu cabe laacabe,
purti biche laacabe.
4 Za cabe de Israel,
ne ulí pe Dios laacabe gaca cabe xiiñiꞌ.
Bihuinni pe Dios lade cabe casi ti za ni ruzaaniꞌ,
ne bidii stiidxa laacabe,
ne bidii ley Moisés para udii ni laacabe.
Laca bisiidi laacabe ximodo guni cabe cultu para laa,
ne gudxi laacabe xi chi guni para laacabe.
5 Laacabe nga xiiñi ca primé bixhoze gola nu,
ne de lade cabe nga beeda Cristu dxi beda gaca binni guidxilayú.
Laa nga Dios de lade irá xixé,
ne laa nga qué ziaana dxí de isaca.
Amén.
6 Peru ca judíu,
neca bidii Dios laacabe irá nga,
ma cadi nuu né cabe Dios tobi si.
Peru cadi pur nga zácaxa nu qué ñaca ni uníꞌ Dios gacaꞌ.
Purti cadi irá cani gule de Israel dxandí naca binni Israel.
7 Ne zaqueca cadi purti si beeda cabe de lade ca xiiñi Abraham,
xiiñi Abraham irá cabe nezalú Dios.
Cadi zacá di nga laani,
purti casi na Dios rabi Abraham chiqué:
“De Isaac si nga gueeda cani dxandí xiiñuꞌ.”
8 Ndi nga ni na ni:
cadi dxandí xiiñi Dios irá ni gale lade ca xiiñi Abraham,
sínuque cani bidii stiidxa si Dios gale,
ca ngue nga riguu Dios cuenta casi xiiñiꞌ.
9 Purti sicarí gudxi be Abraham chiqué:
“Stubiza dxi riꞌ zabiguetaꞌ ne zapa Sara ti xiiñiꞌ.”
10 Ne cadi nga si,
laca uníꞌ né be Rebeca,
dxi ma naca xiiñi xiiñi Isaac,
bixhoze gola nu.
11-13 Ne biree ni modo pe uníꞌ be,
purti naquiiñe gaca ni ma gudixhe be gacaꞌ.
Laabe nga ribí be tu gacalaꞌdxi be ne cadi pur ni ma biꞌni caꞌ.
Dxi uníꞌ be ni,
caꞌru gale ca xiiñi Rebeca,
ne caꞌru guni ca ni jneza nin ni cadi jneza,
peru rabi be Rebeca:
“Xiiñu ni jma huaniisi zuni ni na ni jma nahuiiniꞌ.”
Ne laca cá ni lu Xquiꞌchi Dios:
“Gunaxhiee Jacob ne guca nanaladxe Esaú.”
14 Xi gabi nu yaꞌ.
Ñee cadi jneza runi Dios la?
Jneza pue.
15 Purti gudxi be Moisés:
“Zalaseladxe tu gacaladxeꞌ,
ne ziaꞌya tu gacaladxe guiaꞌyaꞌ.”
16 Ne zacá cadi zeeda ni pur ni racalaꞌdxi binni,
nin pur ni runi,
sínuque purti riá be laacaꞌ.
17 Purti cá lu Xquiꞌchi be ra uníꞌ né be Faraón,
na be rabi be laa:
“Bine lii rey para guꞌya binni enda nandxóꞌ stinne luguiá luꞌ,
ne para gunibiáꞌ idubi naca guidxilayú tu naa.”
18 Zacá riduꞌya nu rilaselaꞌdxi be cani racalaꞌdxi be ne ruquidxi be ladxidóꞌ cani racalaꞌdxi be iguidxi ladxidóꞌ.
19 Zándaca gaꞌbu naa:
“Xiñee rudxiiba ru Dios donda luguiá binni yaꞌ.
Zanda xa uchaa cabe ni ma uníꞌ Dios.”
20 Peru hombre,
tu naca lu para qué guiaanu conforme ne ni runi Dios.
Niníꞌ xa ti guisu ñabi ni bizáꞌ laa:
“Xiñee bizóuꞌ naa sicaríꞌ.”
21 Lácaxa qué gapa ni ruzáꞌ guisu derechu guzáꞌ ti guisu sicarú,
ne óraque de yu queca guzáꞌ stobi ni iquiiñe si para ludé.
22 Nga runi,
xi gabi nu de Dios yaꞌ.
Purti laa gucalaꞌdxi nusaba ná cani cuchiichi laa,
cani ma nuu para initilú,
ne gucalaꞌdxi ñanna ca xii nga enda nandxóꞌ stiꞌ.
Peru ni biꞌni be la?
bicueeza be enda ridxiichi que xadxí.
23 Ne bicueeza be ni para ihuinni pabiáꞌ nga naroꞌba enda nachaꞌhui stibe para cani ilaselaꞌdxi be,
cani maca gudixhe be usisaca be.
24 Ne zanda gabi nu nga nga laanu,
purti ne laanu ulí be,
ne cadi de lade ca judíu si,
sínuque ne lade cani cadi judíu.
25 Sicarí cá lu Xquiꞌchi Dios ni bicaa profeta Oseas:
Ca binni ni cadi xpinne zaca ca xpinneꞌ,
ne cani qué ñanaxhiee gaꞌyaꞌ,
laca zanaxhiee laacaꞌ.
26 Ne ra gudxi Dios laaca chiqué cadi xpinni laacaꞌ,
raqueca nga iree lá ca xiiñi Dios ni nabani.
27 Peru ra bizeete profeta Isaías ca binni Israel la?
sicarí na:
Neca idale ca xiiñi Israel casi yuxi sti nisadóꞌ,
peru caadxi si de laaca zalá.
28 Purti zusaba ná Dios xquidxi cabe casi uníꞌ,
ne zuni ni nagueenda ne qué ziá laacabe.
29 Ne laca na Isaías chiqué:
Pa Dios ni runi mandar irá xixé qué nulá caadxi de laanu la?
ma ninitilú nu casi binitilú ca binni Sodoma ne Gomorra.
Ra biaba ca judíu biasa cani cadi judíu
30 Yanna yaꞌ,
xi gabi nu.
Ndi nga laani:
cani cadi judíu,
cani qué nuyubi ñaca nachaꞌhui chiqué,
yanna ma guca ca nachaꞌhuiꞌ,
o zanda gabi nu ma bixá stonda ca nezalú Dios,
purti ma bini cre caꞌ.
31 Peru ca judíu,
ca binni Israel,
yenanda ca ley ti cadi quiba donda ique ca nezalú Dios,
peru qué ñanda ñuni ca ni na ley que.
32 Xiñee.
Purti qué nuyubi cabe nuxhá Dios stonda cabe ra ñuni cre cabe laa,
sínuque biyubi cabe nixá stonda cabe pur ni cayuni cabe.
Nga runi beda gaca Cristu casi ti guie ni birenda ñee cabe para biaba cabe,
purti qué ñuni cre cabe laa.
33 Sicarí cá lu Xquiꞌchi Dios:
Ndaani guidxi Sion caguixhe tobi ni gaca casi ti guie ni irenda ñee cabe.
Peru ni guni cre laabe la?
qué ziuu dxi gueeda malaya laa.