Enda nabani ni rudii Espíritu Santu
8
Ngue runi ma qué zudxiiba Dios donda luguiá cani ma nuu né Cristu tobi si,
cani ma cadi nabani modo na ique sínuque modo na Espíritu Santu.
2 Purti rudii Espíritu Santu enda nabani cani ma nuu né Cristu Jesús tobi si,
ne zacá ma bilá ca de lu ná pecadu ni rudii enda guti.
3 Qué ñanda di niquiiñe ley sti Moisés pur ni naca binni guidxilayú,
peru ra biseenda Dios Xiiñi la?
raqué huaxa guca ni qué ñanda ñuni ley que.
Beda gapa Xiiñi be que cuerpu casi cuerpu sti binni guidxilayú,
beda gati para quixe ni bichee binni.
Ne pur ni biꞌni Xiiñi be que ma qué ziuu ru dxi guni mandar pecadu.
4 Biꞌni Dios irá nga ti yanna ma guni nu jneza casi rucaa ley binni guni.
Laanu ma cadi nabani nu modo na ique nu,
sínuque modo na Espíritu Santu.
5 Purti cani nabani casi na ique la?
ruyubi guni ni riulaꞌdxi si,
peru cani nabani casi na Espíritu la?
ruyubi guni ni na Espíritu.
6 Cani ruyubi ni chuꞌlaꞌdxi si la?
rati,
peru cani ruyubi guni ni chuꞌlaꞌdxi Espíritu Santu la?
ricaa ca enda nabani ne raꞌta dxí ladxidóꞌ caꞌ.
7 Raca ni zacá purti ni rucaa ique guni ni chuꞌlaꞌdxi si la?
nanalaꞌdxi Dios.
Qué runi ni na ley sti Dios,
ne neca pe niná ñuni ni,
qué ñanda diꞌ.
8 Nga runi,
ni nabani casi na ique la?
qué zanda ibani casi na Dios.
9 Peru laatu ma cadi nabani tu casi na ique tu,
sínuque casi na Espíritu,
pa huandí nuu né Espíritu sti Dios laatu.
Ne pa nuu tobi ni qué gapa Espíritu sti Cristu la?
cadi dxandí xpinni Cristu laa.
10 Peru pa nuu né Cristu laatu la?
neca casi ñaca ma guti xcuerpu tu runi pecadu,
peru rudii Espíritu Santu enda nabani laatu purti ma bixá stonda tu.
11 Dios nga bisibani Cristu de lade gueꞌtuꞌ,
ne pa nuu né Espíritu stibe laatu la?
laca zusibani be xcuerpu tu ni gatiꞌ,
casi bisibani be Cristu.
Ne zuni né be ni Espíritu stibe ni nuu né laatu.
12 Ngue runi hermanu caꞌ,
nuu ni naquiiñe guni nu,
peru qué gapa nu xidé guni nu ni na ique nu.
13 Purti pa ibani tu modo na ique tu zati tu.
Peru pa uyubi tu acané Espíritu Santu laatu para ma cadi ibani tu modo na ique tu la?
zabani tu.
14 Irá cani runi ni na Espíritu sti Dios,
ca ngue nga xiiñi Dios.
15 Cadi zácaxa tu ma biꞌni be laatu esclavu para idxibi ru tu laabe,
sínuque ma biꞌni be laatu xiiñi be.
Ne rabi Espíritu stibe laanu gabi nu laabe Bixhoze nu.
16 Ne zaqué rusiene Espíritu stibe espíritu stinu ma xiiñi be laanu.
17 Ne pa xiiñi be laanu la?
laca zacaa nu de lú ni udii be ca xiiñi be.
Ne pa chuꞌ né nu Cristu tobi si lu enda naná stiꞌ,
laca zasaca né nu laa ne zacaa né nu laa de lu ni udii Dios laa.
Riguixhe chaahui Dios irá para cani nadxii laa
18 Ndaani guidxilayú ri racaná nu,
peru naa qué rizaaladxe irá nga,
purti nanna zadxiña dxi udii Dios laanu ni nabé galán.
19 Zaqueca de irá ni bizáꞌ Dios,
laca cabeza si idxiña dxi uluíꞌ be uná nga ca xiiñi be.
20 Purti dxi bizáꞌ be guidxilayú bizáꞌ be ni galán,
peru dxi ma biuu enda ruchee ndaani ni,
beda gaca yuudxu ni,
ne cadi laani biyubi ni gaca ni zacá sínuque laabe gudixhe be gaca ni,
runi enda ruchee que.
Peru cabeza ni dxi
21 ilaa né ni ca xiiñi be lu ná enda nayuudxuꞌ,
ti ibigueta aca ni galán,
ne ma iquiiñe pe ni para laabe.
22 Peru laga cabeza ni idxiña dxi ca la?
nuu né ni ti yuuba roꞌ,
casi ti gunaa ora chi xhana,
ruuna dede ricaalaꞌdxiꞌ.
23 Ne cadi laasi ni,
sínuque laca ne laanu nuu né nu ti yuuba roꞌ,
neca ma ucuaa nu caadxi de ni chi udii Dios laanu,
purti ma napa nu Espíritu stiꞌ.
Peru cabeza ru nu dxi icaa be laanu casi xiiñi be,
ne dxi que nga ilaa ca cuerpu stinu lu ná enda nayuudxu que.
24 Laanu bilá nu purti ucuá lú nu ni caꞌru ihuinni.
Pa cayuuya binni ni cabeza la?
cadi dxandí cabeza ru ni.
Ribeza xa cabe ni maca cayuuya cabe.
25 Peru pa cá lú nu ni caꞌru iduꞌya nu la?
qué zaxhacalaꞌdxi nu de cueza nu ni.
26 Ne laca racané Espíritu Santu laanu iní né nu Dios,
purti laanu qué ganna di nu guni nu ni jneza,
peru ora qué ganda idxela nu xi iní nu la?
ricaalaꞌdxi si nu,
ne Espíritu que riníꞌ pur laanu ra nuu Dios.
27 Purti nanna Dios xi nuu ndaani ladxidóꞌ irá binni,
ne riene xi na Espíritu,
purti modo pe na be,
modo que pe rinaba Espíritu pur ca xpinni be.
28 Nanna dxichi nu riguixhe chaahui Dios irá cosa jneza para cani nadxii laa,
cani uníꞌ né para guni ni na.
29 Dede chiqué maca gucabiáꞌ be cani guni cre laabe,
ne ca ngue nga ulee chu be para chi ndee Cristu Xiiñi be,
ne zaqué Cristu nga lugola lade irá biꞌchiꞌ.
30 Ne cani maca ulee chu be dede chiqué laca uníꞌ né be laacaꞌ.
Ne cadi nga si,
laca ruxhá be stonda caꞌ,
ne ora ma bixá stonda ca rusisaca be laacaꞌ.
Gasti zanda uxhele laanu de Cristu
31 Xi zanda gabi nu de irá nga yaꞌ.
Pa nuu Dios pur laanu la?
iruti zanda ucaa lú laanu.
32 Laabe nin qué ña be Xiiñi be sínuque bidii be laa guti pur irá nu.
Yanna,
ñee na tu qué zuni be pur icaa né nu Xiiñi be irá ni udii be laa la?
33 Tu ru zanda cuꞌ xqueja cani ma ulí Dios yaꞌ.
Dios pe uníꞌ ma bixá stonda cabe.
34 O tu zanda udxiiba donda ique cabe.
Cristu la?
coꞌ,
purti laa pe guti pur laanu,
ne cadi nga si sínuque laca bibani de lade gueꞌtu ne ma nuu cueꞌ Dios,
caníꞌ pur laanu.
35 Iruti zanda cuee laanu de Cristu ni nadxii laanu.
Ñee zaxele nu de laabe pur xiixa naná ni gueeda luguiá nu la?
o purti cadidi nu xiixa ni nagana,
o purti cayaadxa ni idóꞌ no,
o ti gasti ni gacu nu la?
Ñee zaréꞌ nu de laabe purti naxoo nuu nu la?
o purti canananda cabe guuti cabe laanu la?
Coꞌ.
Nanna dxiꞌche gasti zanda uxhele laanu de Cristu ni nadxii laanu.
36 Casi cá ni lu Xquiꞌchi Dios ra na:
Purti ma bini cre du lii,
canayuuti cabe laadu idubi dxi.
Napa cabe laadu casi dendxu ni ma chi gati.
37 Peru neca gueeda irá nga luguiá nu,
qué zanda di usaba ni laanu,
purti nadxii Cristu laanu.
38 Nanna dxiꞌche gasti zanda uxhele laanu de Dios ni nadxii laanu:
nin enda guti,
nin enda nabani,
nin ángel,
nin binidxabaꞌ,
nin ni riduꞌya nu yanna riꞌ,
nin ni gueeda ruꞌ,
39 nin ni nuu ibáꞌ,
nin ni nuu xagueteꞌ,
nin gasti ru de irá ni bizáꞌ Dios qué zanda uxhele laanu de Dios ni nadxii laanu,
purti bisihuinni be pabiáꞌ nadxii be laanu pur ni biꞌni Jesucristu Señor stinu.