Enda nabani cubi
7
Hermanu caꞌ,
ma nanna tu ley.
Ñee qué ganna tu pa naquiiñe guni binni ni na ley ca dxi nabani si la?
2 Casi ti gunaa napa xheelaꞌ,
qué zanda ichaganá be sti tiru laga nabani ru xheela be,
purti nga ni na ley.
Peru pa gati xheela be la?
para ley ma qué gapa di be xheela be.
3 Sicarí ni:
pa cueza né be sti hombre adxé nabani ru xheela be la?
cuchee né be xheela be pur ni na ley.
Peru ora ma guti xheela be la?
ma qué zucueeza ley que laabe,
ne cadi cuchee né be xheela be pa ichaganá be stobi.
4 Zacá ca laatu,
hermanu caꞌ.
Ra guti Cristu lu cruz raqué guti tu para ley,
ti ganda icá nú tu stobi,
ne ngue nga Cristu ni biasa de lade gueꞌtu para ganda iquiꞌñe nu para Dios.
5 Adxé modo bibani nu chiqué,
purti yenanda nu ni na ique nu,
ne biquiinde ley que laanu bini nu ni cadi jneza.
Ne zacá beda gati nu para Dios.
6 Peru yanna ma guti nu para ley ni bini mandar laanu que,
ne ma biréꞌ nu lu ná ni.
Ma zinanda nu enda nabani cubi ni rudii Espíritu Santu laanu.
Ma cadi zinanda nu ley ni cá lu guiꞌchiꞌ.
Ley ne enda ruchee
7 Xi na tu yaꞌ,
ñee napa ley que donda la?
Coꞌ,
sínuque ndi nga laani:
pa qué ñaꞌta ley la?
qué ñanna xii nga enda ruchee.
Purti qué ñanna pa cuchee ra cayache lua sti binni,
pa qué ñabi ley naa cadi gache luaꞌ.
8 Ra guꞌta ley la?
jma rusi unaaze dxiichi pecadu naa,
purti ni na ley que cadi guneꞌ,
jma rusi ruchiiña naa guneꞌ.
Peru ra gasti ley la?
nexhe dxí pecadu,
ruluíꞌ ma guti.
9 Uyuu dxi bibane sin nizaaladxe pa cucheeꞌ,
purti caꞌru ganna xi na ley.
Peru ora gunna xi na ley la?
bicuaani ni pecadu ni nuu luguiaꞌyaꞌ
10 ne zacá gute para Dios.
Purti ley ni nexhe udii enda nabani la?
laga enda guti beda udii ni naa.
11 Beda iree caya zacá,
purti biquiiñe pecadu ley que para bisiguii naa ne biiti naa.
12 Peru cadi pecadu di ley,
sínuque de Dios zeeda ni,
ne mandamientu que laca de Dios zeeda.
Jneza irá ni cá lu ni ne nachaꞌhui ni.
13 Zuuti xa ni nachaꞌhui naa.
Qué ziuu dxi.
Pecadu nga biiti naa,
ne zacá bihuinni xi pe nga pecadu.
Peru biquiiñe ni ni nachaꞌhui que para biiti ni naa,
purti ra guta mandamientu que jma rusi birooba ni.
Chupa ni caguba yu
14 Nanna nu de xquenda biaani Dios zeeda ley que,
peru naa rune ni na iqueꞌ,
ne caya yaga lu ná pecadu.
15 Nin naa qué riene diaꞌ xi runeꞌ.
Qué rune ni racaladxe guneꞌ,
sínuque ni qué racaladxe ngue pe runeꞌ.
16 Ne pa rune ni qué naꞌya gune la?
zacá rihuinni nanna jneza ni na ley sti Dios.
17 Zacá ma cadi naa piaꞌ cayune ni,
sínuque pecadu ni nuu luguiaꞌya cayuni ni.
18 Purti naa nanna binni guidxilayú naa,
ne gasti enda nachaꞌhui nuu luguiaꞌyaꞌ.
Neca napa gana gune ni jneza,
qué zanda gune ni.
19 Qué rune ni jneza casi ñuuladxe ñuneꞌ,
sínuque ni cadi jneza ngue runeꞌ,
neca qué racaladxeꞌ.
20 Ngue runi pa rune ni qué racaladxe gune la?
ma cadi naa cayune ni,
sínuque pecadu ni nuu luguiaꞌya cayuni ni.
21 Ma biene ximodo zeeda ni.
Casi naa gacaladxe gune ni jneza,
rutaagu pecadu naa.
22 Purti lu xquenda biaane rieche nia ley sti Dios,
23 peru ruuya ma adxé ley nuu luguiaꞌyaꞌ ne nuu dinde né ni ley ni maca cá lu xquenda biaaneꞌ,
ne laani nga rucaa ni naa yaga lu ná pecadu ni runi mandar naa.
24-25 Ndi nga laani:
xquenda biaane riguba yu naa gune ni na Dios,
peru pecadu caguba yu naa gune ni na.
Pobre de naa.
Nanna xi gueda iree xaꞌyaꞌ.
Tuu nga cuee naa de enda guti ni naaze naa ri pue.
Rudiee diuxquixe Dios purti Jesucristu zabee naa de laani.
Laabe nga Señor stinu.