Zuchéꞌ ru nu la?
6
Yanna yaꞌ,
ñee zinanda nu enda ruchee para jma rusi gaca Dios nachaꞌhui ne laanu la?
2 Coꞌ.
Pa ma gueꞌtu laanu para enda ruchee la?
ximodo zanda chi nanda ru nu ni yaꞌ.
3 Ra beda gaca nu xpinni Cristu ne uyúꞌ nisa nu la?
raqué nga guti né nu laa ra gutiꞌ.
Ñee caꞌru guiene tu nga la?
4 Purti ra uyúꞌ nisa nu guti nu ne bigaꞌchi né nu laabe,
ne nga runi cásica biasa be de lade gueꞌtu pur enda nandxóꞌ sti Dios Bixhoze nu la?
zaqueca laanu ma biasa nu para ibani nu adxé modo.
5 Purti pa guca né nu Cristu tobi si ra guti la?
laca zaca né nu laa tobi si ra guiasa nu casi biasa.
6 Cadi guiaanda laanu,
ucuá né Cristu lu cruz ni guca nu ndaani guidxilayú chiqué,
ne raqué binitilú ni,
ti ma cadi icá nu yaga lu ná enda ruchee.
7 Purti ni ma guti la?
ma bilá de lu ná ni.
8 Ne pa ma guti né nu Cristu la?
runi cre nu laca zabani né nu laa.
9 Nanna nu ma biasa Cristu de lade gueꞌtuꞌ,
ma qué zati ruꞌ,
ma qué zanda guni mandar enda guti laabe.
10 Purti ti tiru si gupa be xidé guti be para gudixe be irá ni huachéꞌ nu,
ne raqué biluxe ni,
ne yanna ra ma nabani be la?
nabani be para Dios.
11 Zaqueca laatu,
laguietenalaꞌdxi ma gueꞌtu laatu para enda ruchee peru para Dios nabani tu,
purti ma tobi si laatu ne Cristu Jesús Señor stinu.
12 Ngue runi laatu laga nabani tu,
cadi udii tu lugar ucaa ru pecadu laatu yaga,
nin ucaa ni laatu guni tu ni na ni.
13 Ne cadi udii tu laatu pecadu para guni tu ni cadi jneza,
sínuque laudii laatu Dios purti nuu tu casi ni ma guti peru ma bibani sti tiru.
Laudii laatu Dios ti iquiiñe tu para guni tu ni jneza.
14 Ma qué zanda di guni mandar pecadu laatu,
purti ma cadi nabani tu xaꞌna ley,
sínuque ma guca Dios nachaꞌhui ne laatu,
ne ma nabani tu pur enda nachaꞌhui stiꞌ.
Enda guti nga saca enda ruchee
15 Yanna yaꞌ.
Ñee zuchéꞌ ru nu purti ma cadi nuu nu xaꞌna ley sínuque nabani nu pur enda nachaꞌhui sti Dios la?
Coꞌ xombre.
16 Pa laape tu udii tu laatu stobi para guni tu ni na la?
óraque ma ni na ngue,
nga guni tu.
Nga runi pa udii tu laatu pecadu la?
zeda iluxe né tu enda guti.
Peru pa udii tu laatu Dios para guni tu ni na la?
zabani tu jneza.
17 Chiqué ucuá tu yaga lu ná pecadu,
peru uyuu tu beda usiidi laatu ximodo ilaa tu de laani,
ne diuxquixe Dios ucuaa tu ca diidxa que de idubi ladxidóꞌ to,
ne ma cayuni tu ni na cani.
18 Ne ra bilaa tu de lu ná pecadu la?
biuu tu lu ná enda nachaꞌhuiꞌ.
19 Canié casi riníꞌ binni guidxilayú purti zacá ti zanda guiene chaahui tu ni cuzeete riꞌ.
Chiqué uzá nanda pe tu ca viciu ne irá ni nadxabaꞌ.
Zaqueca yanna lachinanda ni nachaꞌhui para ganda ibani tu modo na Dios.
20 Ca dxi uyuu tu lu ná pecadu la?
iruti nucaa laatu guni tu ni jneza.
21 Peru xi ulee ndu tu lu irá ni biꞌni tu chiqué yaꞌ.
Ñee cadi rusituí si ni lú tu yanna la?
Xi ru beda iluxe ca ngue pa cadi enda guti.
22 Peru yáquexa ma bilaa tu de lu ná pecadu ne ma biuu tu lu ná Dios la?
ma cayuni tu ni na,
ne ra zeda iluxe ni,
zapa tu enda nabani ni qué zaluxe.
23 Purti ni riaxa pecadu nga enda guti,
peru ni rudii Dios nga enda nabani ni qué zaluxe,
pur Cristu Jesús Señor stinu.