Xi modo riaana binni ora ma bixá stonda
5
Ngue runi yanna ma nuu né nu Dios tobi si,
purti bixhá stonda nu ra bini cre nu Jesucristu,
Señor stinu.
2 Cristu nga bichiña laanu ra nuu be ne yanna ma nuu né nu laabe tobi si,
purti bini cre nu Jesucristu.
Ne ma rieche nu purti cá lú nu isaca né nu laabe.
3 Ne cadi nga si nga laani,
sínuque laca rieche nu neca rididi nu ra naná,
purti nanna nu zacá zaziꞌdi nu cadi ixhacalaꞌdxi nu.
4 Ne pa qué ixhacalaꞌdxi nu la?
zieche né Dios laanu,
ne zacá jma rusi zacá lú nu laabe.
5 Ne cadi pur gana si cá lú nu laabe purti ma bidii be laanu Espíritu Santu ne rusiene Espíritu que laanu pabiáꞌ nadxii be laanu.
6 Ca dxi pe caquiꞌñe nu chuꞌ tu acané laanu,
ulaꞌqui Dios gati Cristu para ulá cani ruchee.
7 Nanna nu nagana chuꞌ tu gati pur tobi hombre runi jneza,
peru ñanda ca ñuu tu nidxiña de racá,
ñati pur ti hombre chaꞌhuiꞌ.
8 Peru Dios huaxa rusihuinni pabiáꞌ nadxii laanu purti neca cuchéꞌ né nu laa chiqué,
biseenda Cristu guti pur laanu.
9 Ne yáquexa ma bixá stonda nu ra guti be pur laanu la?
nanna dxichi nu zulá be laanu dxi usaba ná Dios binni guidxilayú.
10 Pa gunda bicueeza enda guti sti Xiiñi Dios de nidxiichi né Dios laanu,
neca cuchéꞌ né ru nu laa la?
lágaxa yanna ma nuu né nu laa tobi si,
jma rusi zalá nu purti nabani Xiiñiꞌ.
11 Ne cadi nga si nga laani,
sínuque laca napa né nu Dios enda nayeche pur Jesucristu Señor stinu,
purti uníꞌ né be Dios pur laanu.
Ni biꞌni Adán ne ni biꞌni Cristu
12 Pur tobi hombre biuu enda ruchee ndaani guidxilayú,
ne guti be purti bichee be,
ne zacá ucuá enda guti que irá xixé binni,
purti laca bichee caꞌ.
13 Riduꞌya nu dede dxi caꞌru udii Dios ley Moisés,
maca nuu enda ruchee ndaani guidxilayú.
Peru xi si la?
qué nulabi Dios ra cuchee cabe dxi caꞌru gata ley que.
14 Peru qué ñaana dxí enda guti ni bizulú né Adán que.
Nuu ru ni dxi guta ley sti Moisés.
Irá xixé binni guti,
dede cani qué nuchee né pe ca stiidxa Dios casi biꞌni Adán.
Adán bizulú enda guti,
peru gudixhe Dios stobi gueeda udii enda nabani.
15 Nabé adxé ni bidii Adán laanu pur enda ruchee stiꞌ para ni cudii Dios laanu yanna pur enda nachaꞌhui stiꞌ.
Stale tu guti purti bichee Adán,
peru uyuu stobi hombre biꞌni jneza ne pur laa biá Dios stale binni,
ne hombre ca nga Jesucristu.
16 Ma adxé ni biꞌni Dios que para ni beda iluxe né enda ruchee sti Adán.
Purti ra bichee tobi si udxiꞌba donda ique irá binni guidxilayú,
peru yanna pur enda nachaꞌhui sti Dios ruxhá stonda binni neca nabé bichee caꞌ.
17 Ra bichee tobi hombre si,
gunda bizulú bini mandar enda guti,
peru yanna pur ni biꞌni stobi que,
zaxá stonda irá cani icaa ni cudii Dios laa de enda nachaꞌhui stiꞌ.
Zapa ca enda nabani ne zuni mandar né ca Cristu.
18 Ndi nga laani:
cásica udxiꞌba donda ique irá xixé binni runi ti hombre ni bichee la?
zaqueca pur tobi hombre ni biꞌni jneza,
zaxá stonda caꞌ,
ne zapa ca enda nabani.
19 Pur hombre ni qué nuzuuba diidxa que,
uyuu stale tu bichee,
ne zaqueca pur stobi ni bizuuba diidxa que,
ziuu stale tu zaxá stonda.