Xiñee bixhá Dios stonda Abraham
4
Xi zanda iní nu de Abraham,
bixhoze gola nu ndaani guidxilayú riꞌ.
2 Pa ñaca pur ca enda nachaꞌhui ni biꞌni be bixhá Dios stonda be la?
ñanda ca nuchá be enda naróꞌ stibe,
peru cadi nezalú Dios.
3 Purti sicarí cá lu Xquiꞌchi Dios:
“Bini cre Abraham Dios,
ne nga runi bixhá Dios stonda be.”
4 Pa guni tobi dxiiña ne quixe cabe laa,
iruti zanda iníꞌ ucuaa si be vueltu que,
purti ucuaa be ni saca biꞌni be dxiiñaꞌ.
5 Peru cadi cayabi Dios laanu guni nu xiixa para uxhá stonda nu,
sínuque na be guni cre nu ruxhá be stonda cani huachee,
ne ra guni cre nu,
zuxhá be stonda nu.
6 Rey David laca bizeete pabiáꞌ nayeche ziaana cani uxhá Dios stonda zacá,
cadi pur xiixa ni guni caꞌ.
7 Purti cá ni uníꞌ David que lu Xquiꞌchi Dios:
Tutiica bichee ne ma guca perdonar la?
nayeche ziaana,
purti ma gaꞌchi irá ni bichee caꞌ.
8 Nayeche ziaana cani qué uquixe Dios irá ni bichee.
9 Ñee na be nuu enda nayeche ca para si cani ma napa seña de circuncisión lu xcuerpu la?
o laca nuu ni para cani qué nicaa seña que.
Guietenalaꞌdxi nu de Abraham.
Ma nanna nu bini cre be Dios ne nga runi bixhá Dios stonda be.
10 Yanna xi na tu de laabe.
Ñee ucuaa si be seña de circuncisión que,
óraque ruꞌ bixá stonda be la?
Coꞌ,
purti maca bixá stonda be dxi caꞌru icaa be seña que.
11 Ne óraque ruꞌ ucuaa be circuncisión casi ti seña dxandí ma bixá stonda be.
Peru bixá stonda be purti bini cre be,
ne guca ni dxi caꞌru icaa be seña de circuncisión.
Nga runi gunda biree lá be bixhoze irá xixé cani guni cre Dios sin icaa circuncisión,
purti zuxhá Dios stonda ca ra guni cre ca casi bini cre be.
12 Ne laca biree lá be bixhoze cani ma ucuaa circuncisión,
cadi purti napa ca seña que,
sínuque purti laca runi cre ca casi bini cre be dxi caꞌru icaa be circuncisión.
Ra uca ni gudxi Dios Abraham
13 Bidii stiidxa Dios Abraham ne ca xiiñi zacaa ca guidxilayú,
casi ni rudii binni xiiñi ora ma chi gati,
peru bidii be ni laaca cadi purti biꞌni ca ni na ley sti Moisés,
sínuque purti bini cre ca laabe,
ne nga runi bixhá be stonda caꞌ.
14 Pa ñaca nudii stiidxa Dios cani nabani si xaꞌna ley sti Moisés la?
ma cadi pur guni cre binni nixá stonda,
ne pur gana si nudii stiidxa Dios laacabe.
15 Purti ziaba ná cani ruchee né ley,
peru ra gasti ley la?
qué zuchee né cabe ni.
16 Ngue runi bidii stiidxa Dios uxhá stonda cani guni cre laa,
ti gaca ni de puru enda nachaꞌhui si stibe.
Ne zacá nga bidii stiidxa be irá ca xiiñi Abraham,
cásica cani nabani xaꞌna ley sti Moisés,
zaqueca cani guni cre casi bini cre Abraham.
Laa nga bixhoze irá xixé nu.
17 Casi cá lu Xquiꞌchi Dios ra na Dios rabi Abraham:
“Ma bine lii bixhoze stale guidxi.”
Ni na ni la?
Abraham nga bixhoze irá nu purti ma runi cre nu Dios ni bini cre be.
Dios ri ca nga rudii enda nabani cani ma guti,
ne laa ruzeete ni caꞌru gale casi ñaca ma gule.
18 Neca ruluíꞌ ma qué ñapa Abraham xiiñiꞌ,
peru bini cre ni gudxi Dios laa,
uleza beda aca bixhoze stale binni.
Purti gudxi Dios laabe pabiáꞌ zadale xiiñi be.
19 Qué ñaana dxí be de ñuni cre be ni,
neca ora redasilú laabe ma nagola pe be,
ma udiꞌdi xhi be,
purti ma napa be biaꞌ ti gayuaa iza,
ne nin ora ruuya be Sara ma udiꞌdi de ñapa baꞌduꞌ.
20 Qué ñaana dxí be de ñuni cre be ni gudxi Dios laabe que,
laga jma rusi bidale fe stibe,
ne bidii be diuxquixe Dios.
21 Ne ucuá ique be ni,
purti nanna be pabiáꞌ nandxóꞌ Dios,
ne zuni ni ma uníꞌ.
22 Nga runi bixhá Dios stonda be purti bini cre be laa.
23 Peru ra ruzeete Xquiꞌchi Dios modo bixá stonda be purti bini cre be la?
cadi para laasi be ucuá ni.
24 Laca ucuá ni para laanu,
purti laca zaxá stonda nu pa guni cre nu Dios ni undisa Jesús,
Señor stinu,
de lade gueꞌtuꞌ.
25 Jesús nga ucuaa enda guti saca irá ni bichéꞌ nu,
ne bibani para ma qué quiba donda ique nu.