4
Dios bisaana dxiiña ri ladxi ná du purti guca nachaꞌhui ne laadu.
Nga runi qué riréꞌ du gana.
2 Ne sicarí runi du dxiiñaꞌ:
qué rucaꞌchi du gasti ne qué runi du gasti ni nituí lú du pa ñanna binni.
Purti cadi canaguite du binni ne cadi canaucháꞌ du stiidxa Dios,
sínuque canayuí du ni dxandíꞌ.
Ne zacá zanna irá binni jneza cayuni du nezalú Dios.
3 Peru pa ruluíꞌ nacahui stiidxa Cristu ni canayuí du la?
nacahui ni para cani cananiti.
4 Qué runi cre ca purti rusicahui binidxaba xquenda biaani ca ti cadi guiene ca evangeliu ni rusihuinni enda nandxóꞌ sti Cristu.
Laa ruluíꞌ laanu ximodo Dios.
5 Cadi canayuí né du binni tu naca du,
sínuque canayuí du Jesucristu nga Señor.
Ne laadu la?
naca du casi mozo stitu purti nadxii du Jesús.
6 Dios ca ni uníꞌ chuꞌ biaani dxi bizáꞌ guidxilayú,
laca laa bizaani ndaani ladxidóꞌ no yanna,
ti ganda gunibiáꞌ nu enda nandxóꞌ sti ni rusihuinni Jesucristu.
Ibani nu pur ni runi cre nu
7 Nabé risaca ni bisaana né Dios laadu,
peru laadu gasti nga laadu.
Zeda gaca du casi guisu de yu,
ne Dios cayuni irá ni ne enda nandxóꞌ stiꞌ.
8 Ladu tiisi chuu du cabeza ni nagana laadu,
peru ruluíꞌ be laadu modo iréꞌ du de laani.
Stale tiru qué riene du xiñee reeda ni luguiá du,
peru qué riréꞌ du gana.
9 Nuu stale tu canaladxi laadu,
peru qué rusaana Dios laadu.
Neca huayuniná cabe laadu dede ruluíꞌ ma qué zanda guiasa du,
peru riasa du runi seguir du.
10 Ladu tiica chuu du canananda cabe guuti cabe laadu casi biꞌni cabe Jesús,
peru rilá du,
ne zacá rihuinni nabani Jesús ne cayapa laadu.
11 Xpinni Cristu laadu,
nga runi irá dxi zadxagalú du enda guti,
peru nabani ru du,
ti ihuinni canacaa du enda nabani stibe lu cuerpu ni rati riꞌ.
12 Ndi nga laani:
rizá nanda enda guti laadu purti cayuí du stiidxa Cristu,
peru laatu,
cudii ni enda nabani ni qué zaluxe laatu.
13 Casi cá lu Xquiꞌchi Dios:
“Bine cre,
nga runi uniéꞌ.”
Ne zacaca laadu.
Runi cre pe du Dios,
nga runi riní du sin idxibi du.
14 Purti nanna du laabe bisibani be Jesús de lade gueꞌtuꞌ,
ne laca zusibani be laadu casi bisibani be laa,
para uchiña be laanu ra nuu be.
15 Huadidi du irá nga para acané du laatu,
ti icaa jma stale binni ni cudii Dios,
ne zacá jma stale binni udii diuxquixe Dios para usisaca laa.
16 Nga runi qué riréꞌ du gana.
Neca ze dxi ziyaana xcuerpu du sin stipa,
peru espíritu stidu jma rusi ziyapa stipa.
17 Purti cadi naroꞌba enda naná ni nuu luguiá du riꞌ,
tobi zidiꞌdi si ni,
ne zudii ni laadu ti enda nayeche nabé naroꞌba ni qué ziuu dxi iluxe.
18 Nga runi cadi cazaalaꞌdxi du ni caduꞌya du yanna riꞌ,
sínuque cabeza du ni chi ihuinni ruꞌ.
Purti zanitilú ni rihuinni yanna riꞌ,
peru qué ziuu dxi initilú ni qué rihuinni.