5
Zeda gaca cuerpu stinu casi ti yoo ra nabeza nu laga nuu nu ndaani guidxilayú,
ne nanna nu pa initilú ni,
nuu stobi bizáꞌ Dios para laanu ibáꞌ,
ni qué ziuu dxi initilú.
2 Yanna para laanu pa ñanda si ma nibixhi nu ndaani yoo ni nuu ibáꞌ que.
3 Casi ñaca nibaqui nu lari para nuseegu laanu ti qué ñaana nu sin cuerpu.
4 Laga nabani ru nu ndaani guidxilayú riꞌ cacaalaꞌdxi nu casi ñaca nua nu xiixa nanaa.
Cadi purti racalaꞌdxi nu gati nu.
Zacá la?
ñaana nu sin cuerpu.
Ni racalaꞌdxi nu la?
icaa nu cuerpu cubi que.
5 Para nga pe nga biꞌni Dios dxiiña luguiá nu ne ma bidii laanu Espíritu Santu casi ti seña zuni ni ma uníꞌ.
6 Nga nga cá lú nu,
ne nanna nu laga napa ru nu cuerpu ri la?
qué zanda chuꞌ nu ra nuu Señor.
7 Rinanda nu ni runi cre nu ne cadi ni riduꞌya nu.
8 Peru casi rabe laatu ca,
cá lú nu iduꞌya nu ni,
ne dede rabi nu zaa ñati nu ne nusaana nu cuerpu ri para ñuu nu ra nuu Señor.
9 Peru cuyubi nu guni nu ni chuꞌlaꞌdxi be,
pa nuu ru nu raríꞌ,
o pa chuu nu ra nuu be.
10 Purti irá nu napa nu xidé idxiña nu nezalú Cristu para quixe laanu ni bini nu laga nabani nu ndaani guidxilayú riꞌ,
pa jneza o pa cadi jneza.
Modo chuꞌ né binni Dios tobi si
11 Laadu ridxibi du Señor,
nga runi ruyubi du ximodo usiene du binni stiidxa be.
Dios nanna tu naca du,
ne zacaca ribeza du ganna tu ni.
12 Cadi cudxiꞌba du laca laadu,
sínuque cayabi si du laatu ni dxandíꞌ,
ti ganda guieche né tu laadu ne para gapa tu xi gabi tu cani rudxiiba tuuxa pur ni rihuinni de luguiá si,
neca cadi dxandí ni ca ngue.
13 Pa ruluíꞌ cayaca ique du la?
cayaca ni para usisaca du Dios,
ne pa ruluíꞌ nuu xpiaani du la?
nuu ni para ganda acané du laatu.
14 Ma biene du tobi si guti pur iráꞌ,
ne nga casi ñaca guti iráꞌ.
Nga runi,
intiica guni du,
runi du ni purti nadxii du Cristu.
15 Cristu guti pur irá nu ti biaꞌ dxi ibani nu ma cadi ibani nu para laanu sínuque para laabe.
Laabe nga guti be ne bibani be para laanu.
16 Chiqué qué nisaca be para laadu,
purti nisi biyubi du binni risaca ndaani guidxilayú riꞌ.
Peru ma qué rulabi du tu naca binni,
ne nga runi ma adxé modo riduꞌya du laabe yanna.
17 Purti cani ma nuu né laabe tobi si,
ma adxé ni cá ique,
casi ñaca ma nacubi.
Ma ulee Dios laa de modo uzá chiqué,
ma irá ni nacubi para laa.
18 De Dios zeeda irá nga.
Laa bichiña laanu ra nuu para chuꞌ né nu laa tobi si pur ni biꞌni Cristu,
ne laca laabe ulí be laadu güi né du binni stiidxa be para ganda chuꞌ né ca laabe tobi si.
19 Ndi nga laani:
pur ni biꞌni Cristu,
biyubi be chuꞌ né be binni tobi si,
ne ma qué zaguu be cuenta ni huachee né ca laabe.
Nga na stiidxa be ni bisaana né be laadu güi né du binni.
20 Biseenda Cristu laadu gueda tidxi du laatu uyubi tu chuꞌ né tu Dios tobi si,
casi ñaca Dios canaba laatu guni tu ni.
21 Qué ñuu dxi nuchee Cristu,
peru bidxiiba Dios irá stonda nu luguiá be ne nga runi ra gaca né nu laabe tobi si ma gasti donda nuu luguiá nu nezalú Dios.