6
Runi né du Dios dxiiñaꞌ,
ne canaba du laatu usihuinni tu cadi pur gana si uca be nachaꞌhui ne laatu.
2 Purti sicarí cá lu Xquiꞌchi be ra caníꞌ né be binni:
Bigaanda stidxi tu naa,
dxi pe ma nuaa para ucaa diaꞌga laatu,
ne ucaniá laatu dxi ma gudixhe ulaꞌya binni.
Nga na be.
Ne dxandí ma bidxiña dxi acané be binni,
ne yanna ri nga na be ulá be laacaꞌ.
3 Runi du xhiiña du jneza sin uchéꞌ né du irutiꞌ,
ti qué gapa ca xi pur iníꞌ ca laadu nin ni canayuí du.
4 Laga irá modo racalaꞌdxi du usihuinni du xhiiña Dios cayuni du.
Nga runi huadidi du stale ni naná ne qué huaxhacalaꞌdxi du,
neca guiaadxa ni caquiꞌñe du o gueeda xiixa naná luguiá du.
5 Huaguiñe cabe laadu,
huaseguyoo cabe laadu,
huayuni né cabe laadu ruidu pur ni canayuí du.
Huayuni du dxiiña sin iziilaꞌdxi du,
huabee xcaanda du,
huayaana du sin idóꞌ do.
6 Ne laca sicarí rusihuinni du dxandí xhiiña Dios cayuni du:
nabani du modo na,
riene chaahui du ni canayuí du,
qué rixhacalaꞌdxi du de gaca du nachaꞌhui ne binni,
nuu né Espíritu Santu laadu,
nadxii du binni de idubi ladxidóꞌ do,
7 rui du ni dxandí ne racané Dios laadu lu irá ni.
Qué rizá né du xiixa ni ucáꞌ lú né du,
sínuque rizá du modo na Dios ne nga si nga racané laadu ora ugaani cabe xiixa luguiá du,
ne nga ca rucáꞌ lú né du cani cadi cayuni jneza.
8 Nuu tu rudxiiba laadu ne nuu tu rudxii deche laadu.
Nuu tu riníꞌ laadu ne nuu tu rusisaca laadu.
Napa cabe laadu casi ni rusiguii,
peru cadi dxandí rusiguii du.
9 Nuu tiru runi cabe sica ni qué runibiáꞌ cabe laadu neca runibiáꞌ cabe laadu,
ne nuu tiru rusihuinni cabe runibiáꞌ chaahui cabe laadu.
Nuu tiru ruluíꞌ ma chi gati du peru de yanna nabani du.
Huayuniná cabe laadu peru qué huayati du.
10 Neca racaná ladxidóꞌ do peru nayeche nuu du,
ne neca qué gapa du gasti peru stale ni rudíꞌ du binni,
purti neca ruluíꞌ qué gapa du gasti,
ma bidii Señor laadu irá ni.
11 Hermanu de Corinto caꞌ,
huaní né du laatu sin ucaꞌchi du gastiꞌ.
Huayabi du laatu irá ni nuu ndaani ladxidóꞌ do.
12 Laadu nabé nadxii du laatu,
peru laatu huaxiéꞌ nadxii tu laadu.
13 Canié nia laatu casi ñaca tu xiiñeꞌ,
ne rinaba laatu ganaxhii tu naa casi nadxiee laatu.
Laanu nga yuꞌdu sti Dios
14 Cadi gaca né tu cani qué runi cre tobi si,
purti zacá zeda gaca tu casi ti buey ni cadi cá né xcompañeru.
Zanda xa guiuꞌcha ni jneza ni cadi jneza,
o zanda xa guiuꞌcha biaani guelacahui.
15 Zanda xa sa né Cristu binidxaba tobi si.
O zanda xa sa chupa tobi si,
tobi runi cre Cristu,
stobi qué runi cre.
16 Zanda xa chuꞌ né yuꞌdu sti Dios ca bidóꞌ tobi si.
Laatu nga yuꞌdu sti Dios ni nabani,
casi cá lu Xquiꞌchi ra na:
Zabeza nia laacabe ne zazaya lade cabe,
ne zaca Dios stícabe ne zaca cabe xpinneꞌ.
17 Ne laca cá ra na be:
Lairee de lade cabe ne laixele de laacabe,
ne cadi cana tu ni cadi nayá para naa,
ti icaa laatu,
18 ne gaca Bixhoze tu,
ne laatu gaca tu xiiñeꞌ.
Zacá na Dios ni runi mandar iráꞌ.