7
Nga runi,
hermanu ni nadxiee caꞌ,
yáquexa ma bidii stiidxa be laanu la?
usiá nu laanu de irá ni runi dxaba xcuerpu nu ne espíritu stinu,
ti sa nu modo pe naquiiñe sa ca xpinni be,
cani ridxibi laabe.
Cayeche Pablu ma bichaa ca binni Corinto
2 Laganaxhii laadu.
Qué huachéꞌ né du irutiꞌ,
ne qué huayuni du pur uchee irutiꞌ,
ne qué huaguite du irutiꞌ.
3 Cadi cayabe ni laatu para udxiiba donda ique tu,
purti maca gudxe laatu napa laatu ndaani ladxiduáꞌ.
Pa gati nu o pa ibani nu peru nuaa nia laatu tobi si.
4 Napa confianza laatu ne nabé rieche nia laatu.
Neca nuaa lu enda naná,
peru nayeche nuaa ne cadi caree gana.
5 Dede dxi bedandá du Macedonia,
qué ganda chuꞌ dxí ladxidóꞌ do.
Ladu tiica iréꞌ du nuu ni cuchiiña laadu.
Qué riaadxa tu ucaa lú laadu ne cadxibi ladxidóꞌ do.
6 Peru rusieche Dios ni cayacaná ladxidóꞌ,
ne bisieche laadu ra bedandá Titu.
7 Bieche du ra bedandá be,
peru cadi nga si,
sínuque laca bieche du ra byuíꞌ né be laadu pabiáꞌ bisieche tu laabe.
Gudxi be laadu pabiáꞌ napa tu gana guꞌya tu naa,
ne pabiáꞌ ucaná ladxidóꞌ to pur ni guca que,
ne pabiáꞌ riree tu favor stinneꞌ,
ne jma rusi bieche ora gunna nga.
8 Ora biiya ucaná tu chupa chonna gubidxa ra bicaa guiꞌchi que lú tu,
rabe pa ñanna qué nucaa ni.
Peru ma cadi cayeeda di malaya naa.
9 Ma cayecheꞌ,
cadi purti bininá ni laatu,
sínuque purti biquiiñe ni para bixele tu de ni cadi jneza.
Ucaná tu modo na Dios ne zacá qué nuniti tu gasti pur ni bini du.
10 Purti ora racaná ladxidóꞌ binni modo na Dios la?
rudxii lú ca neza ilá caꞌ,
ne qué reeda malaya laaca xiñee biyubi ca neza que.
Peru ora acaná ladxidóꞌ cabe modo racaná cani qué runi cre Dios la?
zati cabe.
11 Laguuya si pabiáꞌ galán biree ni para laatu ra ucaná ladxidóꞌ to modo na Dios,
pabiáꞌ ucuá ique tu guni tu ni jneza ti ihuinni nga ni cuyubi tu guni tu,
pabiáꞌ bidxiichi né tu laca laatu ne pabiáꞌ bidxibi tu,
pabiáꞌ gupa tu gana guꞌya tu naa,
ne pabiáꞌ biyubi tu usaba ná tu ni bichee que.
De irá modo bisihuinni tu ma gasti donda luguiá tu de ni cuzeꞌte nu riꞌ.
12 Cadi ni bichee si que cá ique ra bicaa guiꞌchi que lú tu,
nin ni bichee né be que,
sínuque jma bine ni para uluíꞌ Dios laatu pabiáꞌ risaca du para laatu.
13 Yanna ma nuu dxí ladxidóꞌ do ne laca nabé cayeche du purti nayeche beeda Titu pur irá modo bisieche tu laa.
14 Pa bidxiiba laatu nezalú be ante che be ra nuu tu la?
cadi catuí lua ti bine ni,
purti cásica dxandí irá ni huayabi du laatu la?
zaqueca dxandí ni gudxe laabe que.
15 Ne jma rusi ranaxhii be laatu ora rietenalaꞌdxi be modo bizuuba tu diidxaꞌ ne modo bichagalú tu laabe,
qué ñaca tu nayáꞌ,
ne bidxibi tu laabe.
16 Cayeche purti ma nanna cadi naquiiñe chuaa xizaa pa zuni tu jneza.