Laudii ne gana
8
Hermanu caꞌ,
racalaꞌdxi du güi né du laatu modo huayacané Dios ca hermanu ni nuu Macedonia.
2 Neca huadiꞌdi cabe ra nagana peru nayeche nuu cabe.
Nga runi neca huaxiéꞌ napa cabe peru huadii cabe de idubi ladxidóꞌ cabe para acané cabe stobi.
3 Cayabe ni laatu purti nanna dxandí ni.
Bidii cabe de idubi ladxidóꞌ cabe biaꞌ gunda,
ne dede ni qué gapa cabe bidii cabe.
4 Nabé ucuá cabe lú du udíꞌ du lugar acané cabe ca xcaadxi hermanu,
5 ne cadi nga si,
sínuque biꞌni ru cabe jma:
nirudóꞌ bidii cabe xpida cabe Señor,
ne óraque bisaana cabe ni ladxi ná du,
casi na Dios guni cabe.
6 Yanna ma cayabi du Titu che ra nuu tu para unduuxe ni bizulú lade tu chiqué,
acané laatu utopa tu ti ofrenda para ca xpinni Cristu ni caquiiñeꞌ.
7 De irá modo ma dxiꞌba tu:
runi cre tu Cristu de idubi ladxidóꞌ to,
ne ma nabé riene tu,
ne nanna tu güi né tu ni stobi,
ne runi tu xhiiña Dios ne stale gana,
ne nadxii tu laadu.
Yanna riaadxa si iziidi tu acané tu ca xcaadxi xpinni Cristu.
8 Cadi cayune mandar laatu guni tu ni,
sínuque cuzeete ni biꞌni ca xcaadxi,
ti ihuinni pa dxandí nadxii tu ca hermanu.
9 Purti ma nanna tu pabiáꞌ guca Jesucristu Señor stinu nachaꞌhui ne laanu.
Neca stibe iráꞌ,
peru beda ganna be xii nga enda pobre purti nadxii be laatu,
ne biꞌni be ni ti ganda icaa tu irá ni cayaadxa laatu.
10 Naa rabe galán para laatu unduuxe tu ni bizulú tu udubiza que.
Ne gana bizulú tu acané tu.
11 Zacaca yanna launduuxe ni ne gana casi bizulú tu ni,
ne lachinanda biaꞌ napa tu.
12 Pa udii binni de idubi ladxidóꞌ,
ziulaꞌdxi Dios ni biaꞌ tiica laani.
Nanna be pabiáꞌ napa binni,
ne qué zanaba be laa ni qué gapa.
13 Cadi cayabe laatu udii tu dede irá stitu stobi,
14 sínuque para gapa tu biaꞌca,
biaꞌca.
Laga napa tu yanna la?
laudii cani huaxiéꞌ napa,
ne ora ma qué gapa tu ne napa cabe la?
ma laacabe udii cabe laatu,
ne zacá ziaana tu biaꞌca.
15 Casi cá ni lu Xquiꞌchi Dios:
“Ni bitopa stale la?
qué ñaana ru stiꞌ,
ne ni bitopa huaxiéꞌ qué ñaadxa stiꞌ.”
16 Diuxquixe Dios saca bisiaa Titu laatu,
ne yanna ricá ique Titu acané laatu casi ricá ique laatu.
17 De ndaani ladxidóꞌ be biale che be ra nuu tu purti nadxii be laatu ne cadi purti si bisaana nia ni laabe.
18 Chi useꞌnda né du laabe dxa hermanu ni nabé huayacané ireeche stiidxa Dios que.
Irá ca xpinni Cristu rudxiiba laa.
19 Ne laaca ulí ca laabe chiné be laadu ra chi saana du ni ma bidopa.
Cayuni du irá ni para usisaca du Señor ne ti ihuinni napa du gana acané du.
20 Qué racalaꞌdxi du iníꞌ binni laadu runi bidxichi ni cutopa du riꞌ.
21 Nga runi cuyubi du guni du irá ni jneza,
cadi nezalú Señor si,
sínuque ne nezalú binni.
22 Laca cuseꞌnda né du Titu ne hermanu que sti hermanu.
Huaduꞌya du dxandí napa be gana guni be dxiiña ne jma rusi cá ique be ni yanna purti ma nanna be napa tu gana acané tu.
23 Pa chuꞌ tu inaba diidxa laatu tu naca Titu la?
lagabi laaca huazá né be naa,
ne tobi si huayuni né be naa dxiiña ra ucané du laatu.
Ne pa inaba diidxa cabe de xhupa hermanu que la?
lagabi laacabe ca xpinni Cristu biseenda laaca ne dxandí rusisaca ca Cristu pur modo nabani caꞌ.
24 Yanna lauluíꞌ laacabe nadxii tu laacabe ti ganna irá ca xpinni Cristu ni,
ti cadi na ca ruchee ra ruchaya enda naróꞌ stitu.