GUIꞌCHI BICAA SAN PABLU LU CA XPINNI CRISTU NI NUU EFESO
1
Naa nga Pablu.
Naca apóstol sti Jesucristu purti gudixhe Dios gaca ni.
Cucaa guiꞌchi ri lú tu,
hermanu caꞌ,
casi nuu tu ndaani guidxi Efeso.
Ma xpinni Dios laatu purti ma runi cre tu Cristu Jesús.
2 Dios Bixhoze nu ne Señor Jesucristu cuꞌ ndaaya laatu ne quixhe dxí ladxidóꞌ to.
Modo uca Dios nachaꞌhui ne laanu
3 Nabé sicarú ni rudii Dios Bixhoze Jesucristu laanu de ibáꞌ.
Ma nuu ndaaya stibe luguiá nu purti nuu né nu Cristu tobi si.
Nga runi udíꞌ nu diuxquixe laabe.
4 Dede dxi caꞌru cha guidxilayú,
maca ulí be laanu para gaca nu xiiñi be.
Ne gudixhe be gaca ni ra chuꞌ né nu Cristu tobi si.
Ne zacá ma qué zudxiiba be donda ique nu,
sínuque zusiá be ladxidóꞌ no.
5 Nadxii be laanu,
nga runi dede chiqué maca gudixhe be gueeda Cristu para uchiña laanu ra nuu be ti gaca nu xiiñi be.
Ne gudixhe be ni zacá purti zacá gucalaꞌdxi be gaca ni.
6 Nga runi cadi guiaana dxí nu de usisaca nu laabe pur modo guca be nachaꞌhui ne laanu,
ne pur irá ni bidii be laanu ra uca né nu Xiiñi be ni nadxii be tobi si.
7 Nabé nadxii be laanu,
nga runi guti Xiiñi be para bilá laanu,
ne bisiá laanu de irá ni huachéꞌ nu.
8-9 Ne bisihuinni be pabiáꞌ nadxii be laanu ra bixhele be xquenda biaani nu ti ganna nu irá ni gudixhe be gacaꞌ,
ne guiene nu ni qué ñene binni chiqué.
10 Ne ndi nga ni gudixhe be gacaꞌ:
chuꞌ irá ni nuu ibáꞌ ne irá ni nuu ndaani guidxilayú tobi si,
ne gaca Cristu xaíque sti irá xixé.
Ne zaca ni,
ganda si xhi ni.
11 Irá ni ma gudixhe be gaca la?
runi be casi racalaꞌdxi be.
Ne dede chiqué gulí be laanu para chuꞌ né nu Cristu tobi si,
ne para icaa né nu irá ca xpinni be ni chi udii be laacaꞌ.
12 Nirudóꞌ laadu bini cre du Cristu,
ne gudixhe Dios laadu para usihuinni du enda nandxóꞌ stiꞌ,
ti usisaca binni laa.
13 Laatu laca bini cre tu ra bina diaga tu ca diidxa ni dxandíꞌ,
ca diidxa sicarú ni bisiene laatu ximodo ilá tu.
Ne ra bini cre tu Cristu,
uluu Dios Espíritu Santu ndaani ladxidóꞌ to casi ti seña ma xpinni laatu.
Purti maca uníꞌ zudii laabe cani guni cre.
14 Ne Espíritu que nga rusiene laanu dxandí zacaa nu irá ni ma bidii stiidxa Dios udii ca xpinni,
dxi nexhe icaa ca ni.
Usisaca nu Dios pur enda nandxóꞌ stiꞌ.
Canaba Pablu usiene Dios cani ma runi cre
15 Nga runi dede dxi gunna ma runi cre tu Señor,
ne pabiáꞌ nadxii tu irá ca xpinni Dios la?
16 qué huayaana dxie de udiee diuxquixe Dios pur laatu,
ne cada inié nia laabe ruzeete laatu lú be.
17 Rinaba usiene Espíritu stibe laatu ximodo laabe,
ti gunibiáꞌ chaahui tu laabe.
Laabe nga Dios sti Jesucristu Señor stinu,
ne laabe nga Bixhoze nu ni nandxóꞌ.
18 Ne laca rinaba lú be uxhele be xquenda biaani tu ti guiene tu pabiáꞌ galán ne pabiáꞌ risaca ni nexhe udii be irá ca xpinni be.
19 Ne rinaba laabe usiene be laatu pabiáꞌ nandxóꞌ be para acané be laanu,
cani runi cre nu laabe.
Enda nandxóꞌ ri ca nga bisihuinni be
20 ra undisa be Cristu de lade gueꞌtuꞌ,
ne bicuí be laa cueꞌ be ibáꞌ.
21 Biꞌni be laa xaíque sti irá cani runi mandar,
ne irá cani risaca,
ne irá cani nandxóꞌ,
ne tutiica ni zanda uzeꞌte nu.
Cristu nga xaíque sti irá xixé ni ma nuu,
ne irá xixé ni gueeda ruꞌ.
22 Gudixhe Dios irá xixé ni xañee be,
ne biꞌni laabe xaíque sti ca xpinni be.
23 Ca xpinni be zeda gaca casi cuerpu stibe,
ne laabe nga ique ni.
Pa sin laabe gasti nga ca xpinni be purti laabe nga xaíque sticaꞌ,
ne laabe naaze be irá xixé.