Modo naquiiñe ibani xpinni Cristu
5
Ma xiiñi Dios laatu ne nadxii laatu.
Yanna laucaalaꞌdxi gaca tu casi laa.
2 Intiica guni tu lausihuinni nadxii saa tu casi nadxii Cristu laanu.
Gunaxhii be laanu dede uná be bisigaꞌde be xpida be Dios para biaxa stonda nu.
Ne uyulaꞌdxi Dios ni biꞌni be que dede guca ni casi ti xhoꞌ naxhi para laa.
3 Yáquexa ma xpinni Dios laatu la?
ma cadi lica guiete enda rapa jnadxii lade tu,
nin guni tu gasti ru ni nadxabaꞌ,
nin uyubi tu gapa tu xiixa para laasi tu.
4 Cadi usituí tu lú stobi pur ni iníꞌ tu,
ne cadi iníꞌ tu diidxa guidxa nin diidxa huati,
sínuque laudii diuxquixe Dios.
5 Ma nanna tu,
nin tobi de cani riuu né ni cadi xheelaꞌ,
nin cani runi ru ni nadxabaꞌ,
nin cani ruyubi gapa para laasi,
qué ziuu ra runi mandar Cristu ne Dios.
Purti ni ruyubi gapa para laasi la?
rusisaca ni nuu ndaani guidxilayú ne ma qué rusisaca Dios.
6 Cadi udii tu lugar chuꞌ tu quite laatu,
gabi laatu zaa guni tu irá nga.
Cadi ucaa diaga tu laacaꞌ,
purti nuu xiana sti Dios luguiá irá cani qué na uzuuba stiidxaꞌ.
7 Cadi chuꞌ né tu laacabe tobi si lu enda ruchee stícabe ca.
8 Chiqué la?
casi ñaca uyuu tu ra nacahui,
peru yanna ma nuu tu ra nayaꞌniꞌ,
purti ma nuu né tu Cristu tobi si.
Yanna,
lasá casi naquiiñe sa cani ma nuu ra nayaꞌniꞌ.
9 Purti pa canazá tu ra nayaꞌni la?
zaca tu nachaꞌhuiꞌ,
ne zuni tu ni jneza,
ne qué zusiguii tu.
10 Lauyubi ganna tu xii nga riulaꞌdxi Señor.
11 Cadi idxaaga tu cani canayuni ni cadi jneza,
purti casi ñaca canazá ca lu guelacahui,
sínuque lasá jneza ti uluíꞌ tu laacabe cuchee cabe.
12 Purti dede nituí lua nuzeete ni runi cabe ra nagaꞌchiꞌ.
13 Peru pa chuꞌ cabe ra nayaꞌni la?
zuuya cabe xi naca ni cayuni cabe.
Purti ma bizaani biaani sti Cristu laacabe.
14 Casi cá ni lú Xquiꞌchi Dios:
Bibani,
lii ni nisiaasiꞌ.
Biasa de lade gueꞌtuꞌ,
ne zuzaani Cristu lii.
15 Yanna,
laguuya chaahui ximodo sa tu,
cadi casi cani qué riene,
sínuque casi cani nuu xpiaaniꞌ.
16 Laguni ni iree ndu laga zanda,
purti nabé cayuni binni ni cadi jneza ca dxi riꞌ.
17 Nga runi,
cadi aca huati tu,
sínuque lauyubi ganna tu xi na Señor.
18 Cadi xhudxi tu,
purti zunitilú ni laatu,
sínuque laudii lugar idxá ladxidóꞌ to de Espíritu Santu.
19 Ora cayuíꞌ tu diidxa la?
lauzeete ni cá lu ca salmo,
ne lu ca cantu,
ne lu ca himno ni ruunda né tu Dios.
Laguunda ne lausisaca Señor de idubi ladxidóꞌ to.
20 Cadi guiaana dxí tu de udii tu diuxquixe Dios Bixhoze nu saca irá ni rudii laanu purti xpinni Jesucristu laanu.
Modo ibani né binni xheela ne xiiñiꞌ
21 Cada tobi de laatu guni ni chuꞌlaꞌdxi stobi,
purti ridxibi tu Dios.
22 Ne laatu,
ca gunaa ni ma bichaganáꞌ,
lauzuuba stiidxa xheela tu casi ruzuuba tu stiidxa Señor.
23 Purti xheela tu nga xaíque stitu,
casi naca Cristu xaíque sti ca xpinni.
Laa bilá laacabe,
ne yanna ma naca cabe cuerpu stiꞌ.
24 Ne cásica ruzuuba ca xpinni be stiidxa be la?
zacaca naquiiñe uzuuba tu stiidxa xheela tu de intiica.
25 Ne laatu,
ca hombre ni ma bichaganáꞌ,
laganaxhii xheela tu cásica gunaxhii Cristu ca xpinni,
dede bidii xpida pur laacaꞌ.
26 Ne zacá ulee chu laacabe de ni nadxabaꞌ,
ne bisiá ladxidóꞌ cabe ra uyuu nisa cabe,
purti bini cre cabe stiidxaꞌ.
27 Ne zadxiña dxi uchiña laacabe ra nuu,
ma bia ladxidóꞌ cabe,
ma gasti donda luguiá cabe,
casi ti lari ni nayá guieꞌ ni qué gapa nin ti guisi huiini ra nacuuxhuꞌ,
nin tindaa ra cadi galán.
28 Laca naquiiñe ganaxhii hombre xheela casi nadxii cuerpu stiꞌ.
Ni nadxii xheela la?
nadxii laca laa.
29 Purti iruti raca nanalaꞌdxi cuerpu stiꞌ,
sínuque ruyaana ni ne ranaxhii ni.
Ne zacaca runi Cristu ca xpinni.
30 Zeda gaca ca xpinni be casi cuerpu stibe.
Cada tobi de laanu naca nu tindaa,
casi beela stibe ne dxita stibe.
31 Sicarí na lu Xquiꞌchi Dios:
“Zusaana hombre bixhoze ne jñaa para ichaganá xheelaꞌ,
ne neca chupa cabe peru zaca cabe tobi si.”
32 Rusiidi ca diidxa ca laanu xiixa ni risaca,
neca nagana guiene nu ni,
purti rabe ruzeete ni modo nuu né Cristu ca xpinni tobi si.
33 Peru laca rusiidi ni naquiiñe ganaxhii hombre xheela casi nadxii laca laa,
ne irá gunaa guni ni na xheelaꞌ.